﻿Zan.
7.
Naa ʋoluma Yesu ɠɛni ziɛzu Galilé yooi zu, mazɔlɔɔ é ɠɛni pɔ ga é Zudé yooi yɛ ná, ʋɛ Zuifuiti ta-ɠundiɠiiti ti ɠɛni pɔ ti paa ná. 
Tama Zuifuiti ta-vɛtii maaɓuɠani niina, nii daaseigi ga Kota vɛtii. 
Deɠeiti ti ɠɛni ma: «Zeɠe ʋɛ, é li Zudé yooi zu, nii a kɛ ɗa-ɠaladopoiti ti ɗa-ɠɛɛwotiiti pɛtɛ. 
Nui nii é pɔ ga ti kwɛɛ, naa la ɗa ga ná-faiti kɛ dɔɔɠuzu. Tɛi tama è faa wolai nii ɠɛɠalaiti kɛɛzu, kɛni è kɛ ʋele-o-ʋele ɛsɛ pɛ ge è ʋɛtɛ.» 
Tama deɠeiti ɓɔɠɔgoi ti la ɠɛni laani da. 
Yesu ɠɛni ti ma: «Wɔun, yeeɠɛɠalai pɛ soloogɛ wo ma, kɛlɛ nɔ̀un nà-yeeɠɛɠalai la dɛ zeelini. 
Wɔun, eteai la zooga wo wɔinzeɠezu, kɛlɛ nɔ̀un wɔ̀inzeɠeʋɛ eteai ma, tɔɔzei nà ɠɛɛzu ma, ná-kɛɛwotiiti é ti ɠɛɛzu, ti la ʋani. 
Naa ɠa é ba, wɔun, à li fɛtii zu, kɛlɛ nɔ̀un gè la liizu, mazɔlɔɔ nà-yeeɠɛɠalai la dɛ ʋaani.» 
Kpegai ma ga naama wooi wo ti ma, é yɛni Galilé yooi zu. 
Anɛɛ naa ʋe, deɠeiti ti lɛai ma fɛti zu, tɔ ɓalaa é lɛɛni, kɛlɛ dɔɔɠuzu, é la ɠɛni ɓɔɠɔ ɠulani kɛlɛma. 
Fɛtii ɠula ziɛgi zu, Zuifuiti ta-ɠundiɠiiti ti ɠɛni gaiziɛzu, ti ɗa ɠɛ ma: «Mini ɠa mu é ná?» 
Kpɔɛzuɠula mɔinmɔingi ɠɛni bɛbɛi zaama ná-faa zu, tanigaa ti ɗa ɠɛ ma: «Nu ʋagɔ ʋe.» Zɔiti ti ɗa ɠɛ ma: «Ɓa-o, tɔun toɠa ɛsɛ pɛ yaavazu.» 
Kɛlɛ tɛi ti ɠɛni luazu Zuifuiti ta-ɠundiɠiiti ba, ti tanɔpɛ ti la ɠɛni zoosu ti ʋa ná-fai wo ga yiima ʋele. 
Ti ɠɛni niina ɠulani fɛtii zaama, eyɛsu Yesu lɛ GALA sei ʋɛlɛi wu, é ɗa kalagi wo. 
Zuifuiti ta-ɠundiɠiiti ti wola laavɔɔni, ti ɗa ɓɔɠɔ ɠaazaɠa ga: «É GALA sɛʋɛiti kwɛɛgɛ ɠale, tɛigi é la lɔɔni kala bu?» 
Yesu ti wooɠaaʋoteni, é ɠɛ ma: «Nii kpein gè feezu ga kalagi, tanɔpɛ ge la zeɠezu nà ɓɔɠɔi pɔ, kɛlɛ ta zeɠezu naa ʋɔ, nii é tèʋegai. 
Zɔi nɔpɛ é pɔ ga é GALA ziimai ɠɛ, naama nui ɠa kwɛɛ ni kalagi niiti gè ti wosu, ta zeɠezu GALA pɔ, ɓaa ni nà bosu ga nà ɓɔɠɔ nà-zobogi. 
Zɔi é ɓɔɛzu tɔ ɓɔɠɔ daaseigi zu, naa ɠa lɛbiyai ɠaiziɛzu ɓɔɠɔ ʋɛ. Kɛlɛ nu nɔpɛ é pɔ ga é lɛbiya ve naama nui ʋɛ, nii é tɔun teʋegai, naa ɠa ga gaama nui, ta telebotala vaa nɔpɛ ge la ma nui yiimaʋɛ. 
Moize tɔgi veeʋɛ wo ya, kɛlɛ wo tanɔpɛ ge la kɛɛzu é ʋa ziɛ ga tɔgi ná-deveiti. Lee vaa zu mu wo nɔ̀un gaiziɛzu ga wo pàa?» 
Bɛbɛ gooɠaaʋoteni, ti ɠɛ ma: «Inɛgi ɠa é è zu! Ɓɛ ɠa é pɔ ga é è ʋaa?» 
Yesu ti wooɠaaʋoteni, é ɠɛ ti ma: «Kɛɛwoti ɠila kpe nɔ ɠa gè kɛa, naa wo laavɔa! 
Tatipɛlɛʋolu vai la zɔlɔɔni Moize ya, kɛlɛ wo-mɛmɛwolani. Tɛi Moize devei veeni wo ya ga wo ɗa tatipɛlɛʋolui ɠɛ, wa yeezeizu bu ga wo naa ɠɛ, anɛɛ dooɠo foloi. 
Ni nu ɠa zunu loungoi latisu pɛlɛʋolu dooɠo foloi, nii a kɛ Moize ná-tɔgi mina ɠoloɠolo, toɠa ɠale mu wo yiiɠaawanazu mà, siɛgi zu gè zunui ɓusɛi ʋaloa la mɛtu dooɠo foloi? 
À ɓe tukpɔi ɠaaleʋezu nɔ ga nii nɔ wo-ɠaazuʋɛ pɛtɛsu, kɛlɛ à tukpɔi ɠaaleʋe ga telebodai.» 
Zeluzalɛme nui tanigaa ti ɠɛni ma: «Nii lɛi ti gaiziɛzu ga ti paa? 
Tama wɛlɛ nu ba, é ɓɔɛzu ɛsɛ pɛ gaazu, nu nɔpɛ ge la faa wosu ma! Ada-ɠundiɠiiti ti ʋa ɠɛ laa da mu ga tɔ ɠa é ga Kilista ɓaa? 
Anɛɛ naa ʋe, niima gelei, ade seɠezuʋɛ ɠwɛɛ, kɛlɛ siɛgi zu Kilista a ʋaana la, nu nɔpɛ ge la seɠezu ɠwɛɛga.» 
Yesu ɠɛni kalagi wosu naama ziɛgi zu GALA sei ʋɛlɛi wu. É wooɠulani, é ɠɛ ma: «Gaamazu wo kwɛ̀ɛni, wo sèɠezuʋɛ ɓalaa kwɛɛ! À suɠwɛɛ ga nà ɓɔɠɔ lɛi gè ʋa da ɠisu nɔ ga gè ʋa. Zɔi é ga gaama nui, naa ɠa é tèʋegai. Wo la naa ɠwɛɛ. 
Nɔ̀un gè kwɛɛ, tɔɔzei pɔ bɛ ɠa sèɠeai ná, gè ʋa, tɔ ɠa é tèʋegai.» 
Ti ɠɛni so keleɠele gaiziɛzu niina, kɛlɛ tama nu nɔpɛ ge la ɠɛni yeevɔɔɠuni ba, tɔɔzei ná-yeeɠɛɠalai la ɠɛni dɛ zeelini. 
Anɛɛ naa ʋe, bɛbɛi zaama nu mɔinmɔin ge ɠidaaleʋeni ma, ti ɗa ɠɛ ma: «Siɛgi zu Kilista a ʋaana la, toɠa laavɔɔ vaa ɠili kɛ mɔnɔ, é leʋe zunui nii nɔnɔi ʋa ɓaa?» 
Faliziɛinti ti naa mɛnini, nii bɛbɛi ɠɛni bosu é ʋilɛ Yesu ʋa. Naa ɠa é kɛɛni, zalaɠa ɠula ɠundiɠiiti ta Faliziɛinti ti salaʋusuiti teʋeni ga ti so. 
Yesu ɠɛni ma: «Nà dɛ yɛsu wo ʋa yeeɠɛɠala go laawu, naa ʋoluma gè ɠale ma naama nui ʋɔ, nii é tèʋegai. 
Wa gàiziɛ, kɛlɛ wo la kàa, wo la zooga ɓalaa ʋaazu ʋɛ gè liizu ná.» 
Zuifuiti ta-ɠundiɠiiti ti ɓɔɠɔ ɠaazaɠani, ti ɠɛ ma: «Mini ɠa é liizu ná, ada gaiziɛ, ade la ka, é ʋa li Zuifuiti saama, niiti ti vazagai zii ɠiligiti saama, é ɗa zii ɠiligiti kala ɓaa? 
Lee ɓɔɠɔɓɔɠɔ ka é pɔ é bo ga nuuma wooi ga: ‹Wa gàiziɛ, kɛlɛ wo la kàa, tɔɔzei ʋɛ gè liizu ná, wo la zooga ʋaazu ná›?» 
Fɛtii ma volo ɠaaɓelagi, nii é ɠɛni ga folo wolai, Yesu loni, é wooɠula, é ɠɛ ma: «Zɔi kpɔɔle wɔin ma, é ʋa pɔ̀, é ɓɔɔle. 
Zɔi a ɠidaaleʋe mà, ʋelei GALA Sɛʋɛi bosu la, zɛnvu su ɗɛ wolaiti ta ɗa ɠula ziimaʋɛ, ti ɗa yei.» 
Siɛgi zu é ɠɛni naa wosu da, é ɠɛni vaazu Zɛnvu Ɲadegai ma, nii naama nuiti ti ʋaazu sɔlɔɔsu, niiti ta ɠidaaleʋe ma. Tɔɔzei naama ziɛgi zu Zɛnvu Ɲadegai la ɠɛni dɛ veeni, mazɔlɔɔ Yesu ná-lɛbiyai la ɠɛni dɛ ɠulani kɛlɛma. 
Bɛbɛi zaama, zɔiti ti naama wooiti mɛnini, ma mɔinmɔin ge ɠɛni ɠɛɛzu ma: «Gaamazu, zunui nii ɠa ga GALA goo wo nui.» 
Tanigaa ti ɗa ɠɛ ma: «Nii ɠa é ga Kilista.» Taɠiligaa ti ɗa ɠɛ ma: «Wa kaazu ga Kilista ɠa ɠɛɛzu ga Galilé nu ɓaa? 
Kɛbɛ GALA Sɛʋɛi bogɛ ga Kilista ɠa ga Davide mavofodai, ta toɠa zɔlɔɔsu Davide ná-taazuʋɛ Ɓɛteleyɛme, kɛlɛ?» 
Tɔun maaʋele ma, bɛbɛi ɠaaɠwɛɛni su fele. 
Ti zaama, tanigaa ti ɠɛni ɠɛɛzu, ti so, kɛlɛ nu nɔpɛ ge la ɠɛni yeevɔɔɠuni ba. 
Salaʋusuiti ti ɠaleni ma zalaɠa ɠula ɠundiɠiiti pɔ bɛ ta Faliziɛinti, naati ti ɠɛ ti ma: «Lee vaa zu wo la ʋaani la?» 
Salaʋusuiti ti ɠɛni ti ma: «Kaipa nu nɔpɛ ge la dɛ ɓɔɛni ga zunui nii ɠɛʋele!» 
Faliziɛinti ti ɠɛni salaʋusuiti ma: «Wa ɓalaagi wo ɓɔɠɔ yɛga ná é wo yaava ɓaa? 
Kundiɠii tanigaa ɓaa Faliziɛin tanigaa ti ɠidaaleʋea ma ɓaa? 
Kɛni bɛbɛi nii zu nuɓusɛiti nɔ, niiti ti la faa nɔpɛ kwɛɛ tɔgi zu, ti pɛ ti ɠotoʋɛ.» 
Faliziɛinti ti-wɔɔlai gila ge ɠɛni ná, nii daaseigi ɠɛni ga Nikodɛme. Tɔ ɠa é ʋaani Yesu ʋɔ bɛ mɔunpa, naa ɠɛni ti ma: 
«Ada-lɔgi vaaʋɛ nɛi bu ga ade nu lukpɔɠaaleʋe, ni ade la goomɛnini, ta ade ʋa kwɛɛ, nii é kɛai?» 
Ti gooɠaaʋoteni, ti ɠɛ ma: «Ɗa ɓalaa ɗa ga Galilé nu ɓaa? GALA sɛʋɛiti kala nɔ, ɗa pɛtɛ ga GALA goo wo nu nɔpɛ ge la ɗa ga zeɠe Galilé yooi zu.» 
Naa ʋoluma ɛsɛ ge ɠaleni ma ná-pɛlɛi wu. 
