﻿Zan.
5.
Ku ɠɛai ma fele, Yesu ɠaleni ma ʋolu Zeluzalɛme, Zuifuiti ta-vɛtii ta zu. 
Tama Zeluzalɛme miná, Baala Siɠidaʋɛ ɠobaʋɛ, kpoi gila ge ɠɛni ná, daaseigi ga Ɓɛtezata, Eɓulu wooi zu. Kota lɔɔlugɔ ɠɛni kpoigi naa ɠoba. 
Seeɓɛ nu mɔinmɔingiti ti ɓena laa kotai niiti bu: gaazuɠole nuiti, mɛɠɛlɛ nuiti, ta kɔlɔsama nuiti. Ti ɓena ziɛi ɲiikpi fai maaɓɔun. 
Tɔɔzei geezuɠeelai gila ge ɠɛni yeizu yeeɠɛɠalai tanigaa zu, é ɗa ziɛi ɲiikpi. Zɔi nɔpɛ a la yeina ziɛ ɲiikpigai wu mɔunpa, seeɓɛi ma zii nɔpɛ a la ɠɛna ma nu ʋa, é ɓena ʋalo. 
Zunu ɠila ge ɠɛni miná, nii é kɛɛni seeɓɛi zu ga kona ʋuusaʋagɔ maazu lɔsaʋa (38). 
Yesu kaani laani ná. É kwɛɛgai ma ga naa lɛbiga seeɓɛi zu, é gaazaɠani, é ɠɛ ma: «Ɗa pɔ è ʋalo?» 
Seeɓɛ nui gooɠaaʋoteni, é ɠɛ ma: «Màliɠii, siɛgi zu ziɛi ɲiikpisu da, nu la bɛ̀, nii a pìli bu. Siɛgi zu gè ɠɛɛzu la, gè li ná, taɠili ka yeizu bu tùɠɔ.» 
Yesu ɠɛni ma: «Wuzeɠe, è ɗa-zaɓai zeɠe, è ziɛ.» 
Gaamago nɔ, zunui naa ɠɛdɛni, é ná-saɓai zeɠe, é tɔɔzei ga é ɗa ziɛ. Naama vai ɠɛɛni ga dooɠo foloi ta. 
Zuifuiti ta-ɠundiɠiiti ti ɠɛni zunui ma, nii kɛdɛga ɠɛni de nɔ feya: «Za ɠa ga dooɠo foloi, tɔgi la vaani bu ga è ʋa ɗa-ʋetei zeɠe.» 
Zunui naa ti wooɠaaʋoteni, é ɠɛ ti ma: «Zunui nii é bàloai, naa ɠa kɛai mà: ‹Ɗa-zaɓai zeɠe, è ziɛ.› » 
Ti ɠɛni ma: «Ɓɛ ɠa kɛai è ma: ‹Ɗa-ʋetei zeɠe, è ziɛ›?» 
Kɛlɛ zunui nii é ʋaloni, naa la ɠɛni kwɛɛni, tɔɔzei Yesu ɲɛɛlɛni bɛbɛi zaama, nii é ɠɛni ná. 
Naa ʋoluma Yesu kaani yeeta GALA sei ʋɛlɛi wu, é ɠɛ ma: «Ɗa ɠana, è ʋaloai, mina mɔ koto ɠɛ, naa ɠa a kɛ faa mina zeeli è ma, nii gola a ɲɔu.» 
Zunui naa liini, é bo Zuifuiti ta-ɠundiɠiiti ma ga Yesu ɠa é baloni. 
Naa ɠa é kɛɛni, Zuifuiti ta-ɠundiɠiiti ti ɠɛni Yesu wɔinzeɠezu, tɔɔzei é ɠɛni naama vaiti kɛɛzu ga dooɠo foloi. 
Kɛlɛ Yesu ti wooɠaaʋoteni, é ɠɛ ti ma: «Zaaɠaza Kɛ̀ɛ ɠa botii ɠɛɛzu, nà ɓalaa, nà botii ʋa, gè ɗa kɛ.» 
Naama wooi maaʋele ma Zuifuiti ta-ɠundiɠiiti ti wola zɛbɛzeɠeni ga ti Yesu ʋa, tɔɔzei é ɠɛni dooɠo foloi ma lɔgi ɠoloɠolosu, naa ʋoluma é ɠɛni ɠɛɛzu GALA ka ga Kɛɛɠɛ ɠitei, é ɗa ɓɔɠɔ ɠɛ ga GALA kɛʋele. 
Yesu ti wooɠaaʋoteni, é ɠɛ ti ma: «Gè bo wo ma ga gaamai, Doun Zunui la ɗa ga faa nɔpɛ kɛ ɓɔɠɔ ʋɛ, kɛni nii nɔ é Ɠɛɛɠɛ GALA kaazu, é ɗa kɛ. Tama nii kpein Ɠɛɛɠɛ GALA ge kɛɛzu, Doun Zunui ɠa naa ɠɛɛzu ɓalaa. 
Tɔɔzei Ɠɛɛɠɛ GALA ge Doun Zunui nɛɛʋɛ ʋɛ, ta nii pɛ é kɛɛzu, toɠa naa lɛɛzu ga Doun Zunui. Toɠa zobogi ve zea, ga é faa ɓaaza golai taɠiligaa ɠɛ, niiti ti leʋegai niiti ba, wo ti ɠaai, naa ɠa a kɛ wo laavɔ. 
Tɔɔzei ʋelei Ɠɛɛɠɛ GALA ge gɔvɛiti buzeɠezu la, é ti ɠula saai ya, é zɛnvui ve ti ya, zenɔ ɠana Doun Zunui ɓalaa ɠa zɛnvui veezu naama nui ya, nii é pɔ é fe bɛ. 
É ɓudɛ naa maazu, Ɠɛɛɠɛ GALA tɛi a ɗa nuiti ta-lukpɔi ɠaaleʋe, kɛlɛ é tukpɔɠaaleʋe vai pɛ zɛgɛ Doun Zunui ya, 
naa ɠa a kɛ nuiti pɛ ti unfemai ve Doun Zunui ya, ga Ɠɛɛɠɛ GALA kɛʋele. Zɔi é la unfema veeni Doun Zunui ʋɛ, naama nui la unfema veezu Ɠɛɛɠɛ GALA bɛ, nii é tɔun teʋegai. 
Gè bo wo ma ga gaamai, zɔi nɔpɛ a woilo gòo ma, é ɠidaaleʋe naa ma, nii é tèʋegai, ɠɔoɠɔ zɛnvui ɠa naama nui ya, tukpɔɠaaleʋe la mɔ maala, kɛlɛ kulaʋɛ niina saai ya, é ʋa zɛnvui ʋɔ. 
«Gè bo wo ma ga gaamai, yeeɠɛɠalai ɠa ʋaazu, tɔun vɔlɔ é zeelia, siɛgi zu zɔiti ti zaai, ti ʋaazu GALA Doun Zunui wooi mɛnisu da, tama zɔiti pɛ ta gooi mɛni, naati ta zɛnvui wo. 
Tɔɔzei Ɠɛɛɠɛ GALA ɠa ga zɛnvui ma ungi, é zobogi veeʋɛ Doun Zunui ɓalaa ya ga é ɠɛ ga zɛnvui ma ungi. 
Tɛi é ga Nu ná-Doun Zunui, GALA ge zobogi veeʋɛ zea ga é ɠɛ ga tukpɔɠaaleʋe nui. 
Wo laa mina vɔ, yeeɠɛɠalai ɠa ʋaazu, zɔiti pɛ ti kabaiti su, ta Nu ná-Doun Zunui wooi mɛni. 
Naazu ti ɠula kabaiti su. Zɔiti ti faa ʋagɔi ɠɛai, naati ta wuzeɠe, ti ɠula saai ya, zɛnvui wo fai ma. Niiti ti faa ɲɔi ɠɛai, naati ta wuzeɠe, ti ɠula saai ya, ta-lukpɔɠaaleʋe vai ma. 
Nɔ̀un gè la zooga faa nɔpɛ kɛɛzu ga ɓɔɠɔ zobogi. Nà tukpɔɠaaleʋezu eɠɛʋelei Ɠɛɛɠɛ GALA ge dɛɛzu la ga ze. Tama nà-tukpɔɠaaleʋei zɔlegɛ, tɔɔzei nɔ̀un ziima vai lɛi gè ʋa ɠɛ kɛɛzu, kɛlɛ zɔi é tèʋegai, naa yiimai ɠa gè kɛɛzu.» 
«Ni nà ɓɔɠɔ nɔ ɠa gè zeele wooi wosu nà ɓɔɠɔ nà-faa zu, nà-zeele wooi la ɠɛni ɠɛa ga gaama. 
Kɛlɛ zeele ɠili ka zèa, tama gè kwɛni ga ná-zeele wooi ɠa ga gaama. 
«Wɔun, wo faa wuuɠaiziɛ ɠeelaiti teʋeni Zan ma, tama é zeele wooi woni gaamai ʋɛ. 
Nɔ̀un kpɛdɛ la ba ga nu zeele woo wo bɛ̀, kɛlɛ nà nii wosu, nii a kɛ wo ɠizo. 
Gaamazu Zan ɠɛni ga fitinai abui sosu ba, nii ma wozakalagi ɠɛni volozu. Wɔun, é nɛɛni wo ʋɛ ga wo ɠoozunɛ yeeɠɛɠala go laawu ná-wozakalagi ɠa. 
«Nɔ̀un, zeele woo ɠa zèa nii bɔɔlɔai é leʋe Zan nɔnɔi ʋa. Kɛɛwotii niiti Ɠɛɛɠɛ GALA ti veai zèa ga gè kɛ, naati ka ti dɛɛzu kpezekele ga Ɠɛɛɠɛ GALA ɠa é tèʋegai. 
É ɓudɛ naa maazu, Ɠɛɛɠɛ GALA ɓɔɠɔi é tèʋegai, naa ɠa zeele wooi wosu bɛ̀. Kɛlɛ kaipa wo la dɛ gooi mɛnini, wo la dɛ ɓalaa gaazuʋɛ ɠaani. 
Daawooi la yɛni wo ɠisu, tɔɔzei wo la ɠidaaleʋeni naama nui ma, nii é teʋegai. 
Wa ɠaaɓaazu kele, wo ɗa GALA sɛʋɛiti kala, tɔɔzei wo laaʋɛ da ga wa ɠɔoɠɔ zɛnvui zɔlɔɔ naati saɓui zu. Tama naati mu ka ti zeele wooi wosu nɔ̀un bɛ. 
Kɛlɛ wo la ʋaazu pɔ̀, wo ʋa zɛnvui zɔlɔɔ. 
«Gè la ɓɛdɛni ga nuiti ti lɛbiya ve bɛ̀. 
Kɛlɛ faa ɠila ka gè kaazu, naa ɠa ga nɛɛbɛ nɔpɛ ge la wo-yiimaʋɛti GALA bɛ. 
Nɔ̀un, pàaʋɛ Ɠɛɛɠɛ GALA laaseigi zu, wo la kɛɛzu, wo ʋa yeezei bù. Kɛlɛ ni nu ɠili ka ʋaana ɓɔɠɔ laasei su, wa yeezei naa wu. 
Tɔun vɔlɔ, wa la zoo ɠidaaleʋezu ɠale, wɔigiti wo lɛbiyai ɠaiziɛzu ɓɔɠɔ ya wo ɠilagilagiti, wo la lɛbiyai ɠaiziɛzu, nii é zeɠezu GALA pɔ bɛ nɔ? 
«À mina vɔlɔ ɠisiɛ ga nà ɠa gè ʋaazu wo ʋeelalazu Kɛ̀ɛ ɠakala. Moize ɠa é ʋaazu wo ʋeelalazu, Moizei nii wo ɠitogai ba. 
Mazɔlɔɔ ni wo laani Moize la ga ɠite, wa la la nà ɓalaagi la, tɔɔzei nà ɠa é nà-faa wogai ná-sɛʋɛiti su. 
Kɛlɛ ni wo la ɠidaaleʋeni naama zɛʋɛiti su wooiti ma, wa zoo ɠale ɠidaaleʋezu nɔ̀un gooiti ma?» 
