﻿Luke.
11.
Yeeta Yesu ɠɛni GALA falizu adaʋɛ ta. Kpegai ma, ná-kaladopoi gila ge ɠɛni ma: «Màliɠii, gi maalɛlɛ ga GALA falii, ʋelei Zan ná-kaladopoiti maalɛlɛni la.» 
É ɠɛni ti ma: «Siɛgi zu wo GALA falizu la, wa ɗa ɠɛ ma: Ɠɛɛɠɛ, è-laaseigi ɲade. Ɗa-masadai ʋaana. 
Folo ɠilagila kɔnɔgi ve gi ʋɛ. 
Gi zuvaayɛ ga gá-ɠotoiti, mazɔlɔɔ gá ɓalaa gá nuiti suvaayɛsu, niiti ti ɓaaɠosu gi ma. Mina va bu, gi ʋa loo tɛgai zu.» 
É ɠɛni ti ma ʋolu: «Ni bɔɔla a ɠɛna wo ta ya, é zɛba é li naa ʋɔ bɛ ga kua zaamai, é ɠɛ ma: ‹Bɔɛ, dɔ̀dɔ ga ɓulu saʋagɔ, 
mazɔlɔɔ bɔ̀ɔlai gila paaʋɛ pɔ̀ bɛ, é zeɠe siɛi ma, tama ani nɔpɛ ge la zèa, gè ʋa fe zea.› 
Bɔɔlai naa zɛba é yɛ pɛlɛ ɠoozuʋɛ, é ɠɛ ma: ‹Mina kpɔ̀lɔ, pɛlɛi laaɠulugɛ niina, gá dòinti gá na laani, gè la mɔ zooga wuzeɠezu, gè ʋa ɓuluiti fe è ya.› 
Gè bo wo ma ga gaamai, ni é la wuzeɠeni, é ʋa ɓuluiti fe zea bɔɔla vai ma, kɛlɛ tɛi naa ɓɔizu da, toɠa wuzeɠe, nii nɔpɛ naa pɔ, é fe zea. 
«Nɔ̀un, nà bosu wo ma ga: À falii wo, wa sɔlɔɔ. À gaiziɛ, wa ka. À pɛlɛi laaloɠa, daa ɠa lao wo ʋɛ. 
Mazɔlɔɔ zɔi é falii wosu, naa ɠa sɔlɔɔ. Zɔi é gaiziɛi wosu, naa ɠa ka. Zɔi é pɛlɛi laaloɠazu, daa ɠa lao naa ʋɛ. 
«Doun kɛɛɠɛi ɓɛ ɠa é wo zaama, ni ná-doun zunui ɠa kalei valina ma, a kaalii ve naa ya ga kalei ʋotogi? 
Ɓaa a akuɠɔtɔkaalii ve naa ya, ni naa ɠa tɛɛ ɠain valina ma? 
Wɔigi wo wola ɲɔuɗai, ni wo ani ʋagɔi vee ʋelei ɠwɛɛ wo-lointi zea, Ɠɛɛɠɛ nii é geeɠɔlɔgi zu, naa la kɛa, é ʋa ɓudɛ wɔnɔi maazu ɓaa, é ʋa Zɛnvu Ɲadegai ve naati zea, niiti ti falizu ma?» 
Yesu ɠɛni inɛgi ta ɓɛɛzu zunui ta zu, nii é ɠɛni ga ɓoɓoi. Inɛgi ɠulaai ma zunui zu, gaamanɔ ɓoɓoi tɔɔzeini ga é ɗa ɓɔɛ. Bɛbɛi laavɔɔni. 
Kɛlɛ tanigaa ti ɠɛni ma: «Inɛ kundiɠii Ɓeelezeɓule ná-zobogi ɠa é inɛgiti kpɛɛzu la.» 
Zɔiti ti ɠɛni pɔ ti suɠɔɠɔ, naati ti gaazaɠani ga é laavɔɔ vai ta ɠula kɛlɛma, é ɠulazu geeɠɔlɔgi zu. 
Kɛlɛ tɛi Yesu ɠɛni ta-ɠisiɛi ɠwɛɛni, é ɠɛni ti ma: «Masadai nɔpɛ su nuɓusɛiti ti ɠaaɠwɛɛzu su ɓɔɠɔ laalɔɠɔma, naa ɠa ɗa ɠoloɠolo. Pɛlɛyeɠei nii gaaɠwɛai su, naa ɠa loo. 
Ni mu Setanai ná-masadai ɠa ɠaaɠwɛɛzu su ɓɔɠɔ laalɔɠɔma, naama masadai ɠa zoo yɛsu ná ɠale? Tɔɔzei wo ɠɛ Ɓeelezeɓule ná-zobogi ɠa gè inɛgiti kpɛɛzu la. 
Ni nɔ̀un, nà inɛgiti kpɛɛzu ga Ɓeelezeɓule ná-zobogi, wa-ɠaladopoiti ta ti ɓɛɛzu ga ɓɛ ná-zobo? Naa ɠa é ba, tiya ɓɔɠɔgo ɠa ti ʋaazu wa-lukpɔi ɠaaleʋezu. 
Kɛlɛ ni GALA ná-zobogi ɠa gè inɛgiti kpɛɛzu la, deɠɛmu GALA ná-masadai ʋaa, é zeeli wo ma. 
«Ni zɛbɛsu nui nii kɔɔɠɔ zɔɔlaiti ti zea, a ɠɛna ɓaa ná-pɛlɛi maazu, zeaɠɔligiti pɛ makɛgɛ naazu ga pagɔ. 
Kɛlɛ ni zunui taɠili ka ʋaana, nii sɛbɛi wɔɔlɔai nɔnɔi ʋa, naa ɠa ná-kɔɔɠɔ zɔɔlaiti pɛ kula zea, niiti é ɠɛa laani ti la, é kɔligiti gaaɠwɛ. 
Zɔi nɔpɛ é la nɔ̀un ba, naa ɠa dàalɔɠɔma. Zɔi é la ɓɔsu bà, gi ʋa gaalɛbai wo, naa ɠa suvazagi wosu.» 
«Siɛgi zu kɔzɔba yɛnvui ɠulazu la zunui ta zu, toɠa ɗa li, é leʋeteʋe teʋebai zu, é ɗa zeizu ɠaiziɛ, kɛlɛ é la ná ta ɠaani. Naazu, toɠa ɠɛɛzu ɓɔɠɔ ma: ‹Nà ɠalesu ma nà-pɛlɛi wu, ʋɛ kùlaai ná.› 
Siɛgi zu é ɠalesu da ma, é ná ɠa, ná ɓalegai, fai pɛ seiɗai kpasu ná ga pagɔ, 
toɠa ɗa li naazu, é zɛnvu lɔfela ɠiligaa zeɠe, niiti ti ɲɔuɗai ti leʋe ba, ti ʋa ʋɔɔma, ti zei ná. Zunui naa ná-fai ɠaaɓelagi ɠa ɲɔu, é leʋe ma mɔungi ʋa.» 
Yesu ɠɛai ma ɓɔɛzu ɠana, anzanu ɠila ge wooɠulani bɛbɛi zu, é ɠɛ ma: «Undaanɛ nu ɠa ga anzanui naa, nii é è zɔlɔɔgai, ta è ná-ɲiimii ɓɔleai!» 
Yesu gooɠaaʋoteni, é ɠɛ ma: «Ungo. Kɛlɛ undaanɛ nu ɠitei ɠa ga naati, niiti ti woilosu GALA daawooi ma, ti ɠolo bɛ!» 
Tɛi bɛbɛi mɔinni, ti ɗa ɠaalɛ ba Yesu ɠoba, é tɔɔzeini ga ɠɛa ma: «Niizuʋɛ nuɓusɛiti ɲɔuʋɛ. Ta laavɔɔ vaa maaɠaazaɠabosu, tama poo kili nɔpɛ ge la vea ti ya, kɛni Zonase ná-poogi. 
Mazɔlɔɔ ʋelei Zonase ɠɛni la ga poogi Ninive nuiti bɛ, ʋele nɔ ɠana Nu ná-Doun Zunui ɠɛɛzu la ga poogi niizuʋɛ nuɓusɛiti bɛ. 
Tukpɔɠaaleʋe voloi, lɛkpɛmaʋɛ nu yeezazu ʋelei ma masa anzanui ɠa wuzeɠe, é niizuʋɛ nuɓusɛiti peelala, tɔɔzei tɔun é zeɠeni kenein zou ɓela ga, é ʋa woilosu Salomɔn ná-ɠima ɓɔɛiti ma. Tama zɔi é ʋɛ, naa wɔɔlɔʋɛ Salomɔn ʋa. 
Tukpɔɠaaleʋe voloi, Ninive nuiti ta wuzeɠe, ti niizuʋɛ nuɓusɛiti peelala, tɔɔzei tiya mu Zonase ná-GALA goo wogai maaʋele ma, ti ti-ziɛ ʋeleiti maavaliboni. Tama zɔi é ʋɛ, naa wɔɔlɔʋɛ Zonase ʋa.» 
«Nu nɔpɛ ge la ɗa ga lanboi ɠaazo, é ʋa sei dɔɔɠuzuʋɛ, ɓaa é ʋa dɔ aniɲakai wu, kɛlɛ toɠa ɗa sei lanbo zei anii ɠa, naa ɠa a kɛ zɔiti ti lɛɛzu pɛlɛi wu, ti wozakalagi ɠa. 
È-ɠaazuɠɛzɛiti ka ti ga eɠɛ lanboi kpusɛi ʋɛ. Ni è-ɠaazuɠɛzɛiti kɛdɛgɛ, è-ɓusɛi pɛ daa ɠa ve ga wozakalagi. Kɛlɛ ni è-ɠaazuɠɛzɛiti ti la ɠɛdɛni, è-ɓusɛi pɛ daa ɠa ve ga kpidii. 
Ɓɔɠɔ ʋɛtɛ mu sɛ, ɗa-wozakalagi mina ɠɛ ga kpidii. 
Ni è-ɓusɛi pɛ ka ɠɛna ga wozakalagi, kpidi la ná tanɔpɛ su, toɠa ɠɛ ɓɔɠɔ ma naazu kala, eɠɛʋelei lanboi a ɠɛna zoga da, a ɗa wozakalagi ve la è ya.» 
Yesu ɠɛai ma ɓɔɛzu, Faliziɛin gila ge tolini ga é li, é folo laamii wo pɔ bɛ. É lɛɛni, é zei daami laɓalii ɠakala. 
Faliziɛin laavɔɔni ga Yesu la yeagbani, eɠɛʋelei maanɛai é ɠɛ la, é ʋa daamii lɔɔzei. 
Maliɠii ɠɛni ma: «Wɔun, Faliziɛinti, wa wa-ɓɔɔle aniɲakaiti ta daami aniɲakaiti maaʋɛ gbazu fo. Kɛlɛ wo-ɠoozu ʋelei, wo laavegɛ ga unma wo fai ta suɲɔulai. 
Ee, ɠimalala nuiti! Zɔi é maaʋɛ ɓɛtɛai, naa nɔ lɛi é ʋa suʋɛ ɓɛtɛ ɓalaa ɓaa? 
À wo-yiimaʋɛ ve lɛɛ dɛ ga vebɛani, gaamanɔ wa ɲade fo. 
«Maanɔɠɔi ɠa wo ʋɛ, Faliziɛinti! Tɔɔzei wa puusiɛi ɠulazu tufa maku nɛɛnɛgi ʋa, ta tufa ɠonai, ta guluwulugi ma zii pɛ, kɛlɛ telebodai maanɛai wo ziɛ su, ta nɛɛbɛi maanɛai wo kɛ GALA bɛ, wo ɗa naa la ɠoba. Tama naa ɠa maanɛɛni ga wo ɗa kɛ, wo mina fai mɔtaiti da ɠoba. 
Maanɔɠɔi ɠa wo ʋɛ, Faliziɛinti! Tɔɔzei wo wɔinʋɛ ga lɛbiya zeizuʋɛti GALA dɛbi ʋɛlɛiti bu, ta ti ɗa wo luʋɔ kɛlɛmaʋɛti. 
Maanɔɠɔi ɠa wo ʋɛ! Tɔɔzei wo ɠɛɛʋɛ eɠɛ kabai nii poo nɔpɛ ge la ba, ta nu ziɛzu ma, é la suɠwɛɛ.» 
Tɔ kalamɔin gila ge kpɔɛi zeɠeni, é ɠɛ ma: «Kalamɔn, ɗa ɠɛna ɓɔɛa ɠana, ɗa gá ɓalaa gi ʋoomusu.» 
Yesu gooɠaaʋoteni, é ɠɛ ma: «Maanɔɠɔi ɠa wo ʋɛ, wa ɓalaa, tɔ kalamɔinti! Tɔɔzei wa kasɔiti daazu nuiti unma, nii seɠezu ɓaai, nii wa ɓɔɠɔi wo la yeeɓeɠa go pa fɔɔɠuzu ba ta zeɠe vaa zu. 
Maanɔɠɔi ɠa wo ʋɛ! Tɔɔzei wa GALA goo wo nuiti ta-ɠabaiti kpɛtɛzu, tama wo-mɛmɛwolani ka ti ti ʋaani. 
Naa ɠɛa ga wo ʋa zeelei ga wo vaaʋɛ wo-mɛmɛwolani ta-ɠɛɛwotiiti bu. Tɔɔzei wo-mɛmɛwolani ti GALA goo wo nuiti paaʋɛ, wɔun, wo ɗa ta-ɠabaiti kpɛtɛ. 
Naa ɠa é kɛai GALA ge boni la ga ɠimalai, é ɠɛ ma: ‹Nà GALA goo wo nuiti ta keelaiti teʋe ti ma, ta tanigaa ʋa, ti tanigaa wɔinzeɠe.› 
Naa ɠa a kɛ, é zo eteai ɓɛtɛ yee ma, é zeeli za ma, GALA goo wo nuiti kpein ti ti ʋaai, ti-ma ɲamai maaɠaazaɠa ge wo niizuʋɛ nuɓusɛiti ma, 
é zo Aɓɛle ma, é zeeli Zakali ma, nii ti paani zalaɠa ɠulazuʋɛti zɔɠɔzuʋɛ ta seizu ɲadegai. Gè bo wo ma, ti-ma ɲamai maaɠaazaɠa ka wo niizuʋɛ nuɓusɛiti ma. 
Maanɔɠɔi ɠa wo ʋɛ, tɔ kalamɔinti! Tɔɔzei wo faaɠwɛgi ma ɓaɠui zeɠea. Wa ɓɔɠɔi wo la lɔɔni su, wo la ɓeni zɔiti ba, wɔin ɠɛni ti ma, ti ʋa lɔ su.» 
Siɛgi zu é zeɠeni la miná, tɔ kalamɔinti ta Faliziɛinti ti ɠɛni ɓɔizu da, ti ɗa daaɠula ga é ɓɔɛ, é ʋilɛ faa mɔinmɔin ba. 
Ti ɠɛni bali lɛɛzu tuɠɔ kpɔɛzuɠulai zu, nii a kɛ ti so ga tɔ ɓɔɠɔi gooi. 
