﻿Luke.
5.
Yeeta Yesu ɠɛni loni Zenezalɛte ɓoigi laaʋɛ, bɛbɛi ɠɛni zɔɔzu ɓɔɠɔ ʋa maaɠoolii zu, ti ʋa woilo GALA daawooi ma. 
É kein felegɔ ɠaani kpoigi ɠobaʋɛ, kale ɓɛɛ nuiti kulaai ti zu, ti ɗa ta-lumɔiti gba. 
Yesu lɛɛni keingi gila su, nii é ɠɛni ga Simon nɔnɔi. É naa maanɛɛnɛni ga naa keingi tago maaɠooza kakei ʋa. Naa ʋoluma é zeini keingi zu, é tɔɔzei ga bɛbɛi ɠalaga. 
Kpegai ma ga kpɔɛi zuɠula, é ɠɛni Simon ma: «Li ga ɗa-ɠeingi ziɛ zaamaʋɛ, wo wa-lumɔiti pili ziɛi wu, kale ɓɛɛ vai ma.» 
Simon gooɠaaʋoteni, é ɠɛ ma: «Kalamɔn, gi botii ɠɛɛʋɛ kpidii ɲɛgɛlɛin daawu, gi la ani nɔpɛ soni. Kɛlɛ nà losu è-wooi ma, gè tumɔiti pili ziɛi wu.» 
Ti tumɔiti piligai ma ziɛi wu, ti kale mɔinmɔin soni, tumɔiti ti tɔɔzei vɔlɔ ga ʋalia ga. 
Ti ta-wotiɠɛɲɔɠɔiti tolini ga yeeɓeɠa, niiti ti ɠɛni keingi ɠilagi zu, ga naati ti ʋa, ti kpɔba ɠɛ ti ʋɛ. Naati ti ʋaani, ti kein felegɔi pɛ daave, kalei mɔin ʋele ma keingiti ti ɠɛnina lɔɔzu ziɛi wu. 
Simon Piyɛlɛ miná ɠaai ma, é ʋilɛni ɲiibiɠa Yesu ɠɔɠɔwu, é ɠɛ ma: «Maaɠooza bà, Màliɠii, tɔɔzei nà ga kotoba nu.» 
Mazɔlɔɔ, ta bɔɔlaiti ti wola luani, tɔɔzei kale mɔinmɔingi ʋa, ti kpɛɛni. 
Ʋele nɔ ɠana é ɠɛɛni la ɓalaa ga Simon ná-botiɠɛɲɔɠɔ felegɔiti, Zeɓedé ná-doun zunu felegɔi Zake ta Zan. Yesu ɠɛni Simon ma: «Mina lua, mazɔlɔɔ za ʋoluma, nuiti ka ɗa ɠɛ ti ɠaiziɛzu.» 
Ti liini naazu ga ta-ɠeingiti kakei ma, ti fai pɛ zɛ ná, ti ʋilɛ Yesu ʋolu. 
Tama tɛi Yesu ɠɛni taa wolai gila su, zunui ta ɠɛni ná, nii geei ɠɛni ma nɔ ɠilikpikpi. É Yesu ɠaai ma, é laaʋɛɛni zooi ma, é maanɛɛnɛ, é ɠɛ ma: «Màliɠii, ni ɗa vaana bu, ɗa zoo è ɲàde.» 
Yesu yeemaaleni, é vɔɔɠu ba, é ɠɛ ma: «Gè vaa bu, ɲade!» Gaamago nɔ, gee zeeɓɛi zeɠeni zunui ʋa. 
Naa ʋoluma é devei veeni zunui ya, é ɠɛ ma: «Mina faa wo nu nɔpɛ ma. Kɛlɛ li, è ɓɔɠɔ lɛ ga zalaɠa ɠula nui, é è ɠɛʋele ʋɛtɛ, naa ʋoluma è ɗa-ɲade fai ma zalaɠai ɠula, eɠɛʋelei Moize ma levei veeni la. Naa ɠa ɠɛ ga zeele woo, nuiti bɛ.» 
Tɔɠɔ ʋagɔi ɠɛni liizu ga ɠulaa, naa ʋoluma bɛbɛ wolai ɠɛni maaɓɔsu koba goomɛni fai zu, ta ti ɠɛdɛ fai zu ta-zeeɓɛiti ma. 
Kɛlɛ tɔun é ɓena ɠula ʋolu, é li teʋebai zu, é ɗa GALA fali ná. 
Yeeta Yesu ɠɛni kalagi wosu. Faliziɛinti ta tɔ kalamɔinti ti ɠɛni zeini ná, ti zeɠeai Galilé ta Zudé laaiti pɛ su, naa ʋɛɛ Zeluzalɛme ʋa. Maliɠii ná-zɛbɛi ɠɛni Yesu ʋa ga é nuiti kɛdɛ. 
Nui tanigaa ti ʋaani ga kɔlɔsama nui ta betei zu, ti ɠɛni ɠɛɛzu, ti tɛ pɛlɛi wu, ti da Yesu ɠakala. 
Tɛi bɛbɛi mɔin ʋelei ma, ti la ɠɛni leʋesu ɠaani, ti lɛɛni pɛlɛ ɠɔmaʋɛ, ná ga dooɠo bosuʋɛ, ti ná ta laalao, ti zɛ betei zu, ti zei bɛbɛi zaama Yesu ɠakala. 
Yesu ta-ɠidaaleʋei ɠaai ma, é ɠɛni ma: «Zunu, ɗa-ɠotoiti suvaayɛga è ʋɛ.» 
Tɔ kalamɔinti ta Faliziɛinti ti tɔɔzeini ga ɠisiaa, ti ɗa ɠɛ ɓɔɠɔ ma: «Ɓɛ ɠa ga zunui nii, é woo ɲɔiti bosu GALA daalɔɠɔma? Ɓɛ ɠa a zoo kotoiti suvaayɛsu, é ɠula GALA gila kpe polu?» 
Yesu ta-ɠisiɛi ɠwɛɛni, é ɠɛ ti ma: «Lee vaa zu wo ɠisiɛzu ɠana wo-yiimaʋɛti? 
Ɓɛgele ɠa boda nɛai, nu ɠɛ ma: ‹Ɗa-ɠotoiti suvaayɛga è ʋɛ,› ɓaa nu ɠɛ ma: ‹Wuzeɠe, è ziɛ›? 
Wa ma, wa kwɛɛ ga nii maaʋele ga zobogi ɠa Nu ná-Doun Zunui ʋɛ zooi ma ga é kotoiti suvaayɛ.» É zɛba é ɠɛ kɔlɔsama nui ma: «Ɗa ɠa gè ɓɔɛzu è ʋɔ, wuzeɠe, è ɗa-ʋetei zeɠe, è li ɗa-ɠoizu.» 
Gaamago nɔ, zunui naa wuzeɠeni ti ɠaazu, é betei zeɠe, nii é ɠɛni laani su, é ɗa li ná-koizu ga lɛbiyai vea GALA bɛ. 
Zɔiti pɛ ti laavɔɔni, ti ɗa lɛbiyai ve GALA bɛ. Dualuagi lɔɔni ti pɛ su, ti ɗa ɠɛ ma: «Ade kulafiliba vaiti kaaʋɛ za.» 
Naa ʋoluma, Yesu ɠulani, é mulu zo nui ta ɠa, nii daa ɠɛni ga Levi, é zeini mulu zo nuiti ta-wotii ɠɛɛzuʋɛ. Yesu ɠɛni ma: «Ʋilɛ pòlu!» 
Levi ná-fai pɛ zɛni ná, é wuzeɠe, é ʋilɛ polu. 
Naa ʋoluma, Levi fɛti laamii ɓɛtɛni bɛ ná-pɛlɛi wu. Mulu zo nuiti ma ʋɛbɛ wolai ʋaani ná, ta nu ɠiligiti, ti ɗa daamii wo ta tiye. 
Faliziɛinti ta ta-lɔ kalamɔinti ti ɠɛni unsuyelii losu, ti ɗa ɠɛ ná-kaladopoiti ma: «Lee vaa zu wo laamiizu, wo ɗa ɓɔɔle ʋɔɔma, wa mulu zo nuiti ta kotoba nuiti?» 
Yesu ti wooɠaaʋoteni, é ɠɛ ti ma: «Zɔiti ti ɠɛdɛgai, naati kpɛdɛ la ɗɔɠɔtɔlɔi ʋa, kɛni seeɓɛ nuiti. 
Gè la ʋaani ga gè telebo nuiti toli, kɛlɛ kotoba nuiti ka gè ti lolisu ga ti ti-ziɛ ʋelei maavalibo.» 
Ti ɠɛni Yesu ma: «Zan ná-kaladopoiti ta Faliziɛinti ta-ɠaladopoiti ta ɗa zugi zo valafala, ti ɗa GALA faliiti kɛ. Kɛlɛ ɗɔun, ɗɔnɔiti ta daamii wosu, ti ɗa ɓɔɔle.» 
Yesu ti wooɠaaʋoteni, é ɠɛ ti ma: «Nuiti ti loligai vulu ɠɛɛzuʋɛ, wa zoo ɓaa wo kɛ, ti zugi zo, siɛgi zu anzazini niinɛi ti ʋa la dɛ? 
Kɛlɛ yeeɠɛɠalai ta ɠa ʋaazu, siɛgi zu ta anzazini niinɛi zeɠe la ti ʋa. Názu ɠa ta zugi zo la niina.» 
É niima vaalaalii woni ti ma mɔnɔ, é ɠɛ ti ma: «Nu nɔpɛ ge la ɗa ga seɠe niinɛi ʋali ga, è ʋa ti laɠa ɓɔɠɔ ʋa ta seɠe zaɠai. Naa ɠa ɠɛɛna, seɠe niinɛi ɠa ʋali ga, tama seɠe niinɛi ma ɓuɠaiti ti la zolooga ɓɔɠɔ ma ta seɠe zaɠai. 
Nu la ɗa ga dɔɔ niinɛi ʋu ɓalaa kɔlɔ woole wɔlɔmaiti su. Naa ɠa ɠɛɛna, dɔɔ niinɛi ɠa kɔlɔ woole wɔlɔmaiti fuka, dɔɔi ɠa ʋu ya, gooleiti ta ɠoloɠolo. 
Kɛlɛ kɛni nu a ɗa dɔɔ niinɛi ʋu kɔlɔ woole niinɛiti su. 
Nu nɔpɛ ka ɓena ga dɔɔ wɔlɔmai ɓɔle, ma niinɛi wɔin la mɔ ɗa ga so, mazɔlɔɔ toɠa ɗa ɠɛ ma: ‹Ma wɔlɔmai vizɔgɛ.› » 
