﻿Matiyo.
16.
Faliziɛin tanigaa ta Saduseyɛinti ti ʋaani Yesu ʋɔ, nii a kɛ ti suɠɔɠɔ. Ti gaazaɠani ga é laavɔɔ vai ta ɠula kɛlɛma, é ɠulazu geeɠɔlɔgi zu. 
É ti wooɠaaʋoteni, é ɠɛ ma: «Folo ɠae a kpɔina, wa ɗa ɠɛ ma: ‹Lina woza ɠa ʋasu, tɔɔzei geei ɠaaɓɔiʋɛ.› 
Ɓaa wozai ɠa seɠena ma, wo ɠɛ ma: ‹Za tonai ɠa ʋuuzu, tɔɔzei tonaɓiin kpɔigi ɠa geei ɠa.› Wo zoogɛ geeɠɔlɔgi ɠaa vaiti gaaɠaazu, kɛlɛ wo la zoosu wo ʋa niima yeeɠɛɠalai ma ʋoogiti gaaɠa. 
Niizuʋɛ nuɓusɛ ɲɔiti, niiti ti ga wooʋalada nuiti GALA bɛ, naati ka ti laavɔɔ vaa maaɠaazaɠabosu! Tama poo kili nɔpɛ ge la vea ti ya, kɛni Zonase ná-poogi.» Naa ʋoluma é ti yɛni ná, é li. 
Ti ɠɛai ma ziɛi ɓudɛzu, kaladopoiti ti yeemani, ti la ɓulua zeɠeni. 
Yesu ɠɛni ti ma: «À ɓɔɠɔ zo, wo dama ga Faliziɛinti ta Saduseyɛinti ta-lɛʋɛi.» 
Kaladopoiti ti zɛba ti ɗa ɠɛ ɓɔɠɔ ma: «Tɛi ade la ɓulu zeɠeni, naa ɠa é nuuma wooi wosu da.» 
Tɛi Yesu ti ɠisu vai ɠwɛɛni, é ɠɛni ti ma: «Lee vaa zu wo kpɔɛi zuɠulazu ga tɛi wo la ɓulu zeɠeni? Ee, wa-ɠidaaleʋei lɔiʋɛ dɛ ɗɛ! 
Wo la dɛ gaaɠaani? Wo-ɠi ge la looni ɓulu lɔɔlugɔi zu, nii gaaɠwɛɛni nu waadɔɔlugɔi (5.000) ʋa, kpɔlɔ dielegɔ ɠa é yɛni, wo gaalɛɛni ba? 
Ɓulu lɔfelai ɓalaa, nii gaaɠwɛɛni nu waanaanigɔi (4.000) ʋa, kpɔlɔ dielegɔ ɠa é yɛni, wo gaalɛɛni ba? 
É leʋe ɠale, wo la naa ɠaaɠaazu ga ɓului lɛi, gè ʋa ɠɛ vaazu ma, siɛgi zu gè ɠɛɛzu la wo ma: ‹À dama ga Faliziɛinti ta Saduseyɛinti ta-lɛʋɛi›?» 
Ti gaaɠaani niina ga lɛʋɛ ɓɔɠɔi lɛi, é ʋa ɠɛ ɠɛɛzu ti ma: «À dama la.» Kɛlɛ toɠa ɠɛɛzu ti ma: «À dama ga Faliziɛinti ta Saduseyɛinti ta-ɠalagi.» 
Yesu liini Sezalé Filipe ɠoʋii zu. É ná-kaladopoiti gaazaɠani, é ɠɛ ti ma: «Nuiti ta ɠɛɛzu Nu ná-Doun Zunui ɠa ga ɓɛ?» 
Ti gooɠaaʋoteni, ti ɠɛ ma: «Tanigaa ti ɠɛ, ɗa ga Zan Ɓatisete, zɔiti ti ɠɛ Eli, taɠiligaa ti ɠɛ Zelemi ɓaa GALA goo wo nui ta.» 
É zɛba é ɠɛ ti ma: «Wɔun, wa ma, wo ɠɛ nà ga ɓɛ?» 
Simon Piyɛlɛ gooɠaaʋoteni, é ɠɛ ma: «Ɗa ɠa è ga Mesi, zɛnvu su ƓALAGI ná-Doun Zunui.» 
Yesu zɛba é ɠɛ ma: «È undaanɛɛʋɛ, Simon, Zonase ná-doun zunui, tɔɔzei nuɓusɛi lɛi é ʋa naa lɛɛ ga ɗe, kɛlɛ Kɛ̀ɛ nii é geeɠɔlɔgi zu, naa ɠa é dɛa ga ɗe. 
Nɔ̀un nà ɠɛɛzu è ma, ɗa ga Piyɛlɛ, tama kɔtui naa ɠa gè nà-Egilisii losu ma, nii saai ɓɔɠɔi mu ge la zobo nɔpɛ sɔlɔɔga ma. 
Nà geeɠɔlɔgi ma masadai ma ɓaɠuiti feezu è ya. Nii nɔpɛ ɗa pele leʋe tuɠɔ zooi ma, pele ɠa leʋe naa luɠɔ geeɠɔlɔgi zu. Nii ma è pele viesu tuɠɔ zooi ma, pele ɠa vie naa luɠɔ geeɠɔlɔgi zu.» 
Naa ʋoluma é kaladopoiti daa maaɓakpani ga ti mina ɠɛ nu nɔpɛ ma, tɔ ɠa é ga Kilista. 
É zo naama yee ma, Yesu tɔɔzeini ga é ɗa ɠɛ ná-kaladopoiti ma, kɛni é li Zeluzalɛme, é kpɔlɔ mɔinmɔin sɔlɔɔ totuɠɔiti ta zalaɠa ɠula ɠundiɠiiti zea, naa ʋɛɛ tɔ kalamɔinti ba. Kɛni ti paa, naa ʋolu é wuzeɠe, é ɠula saai ya foloi zaʋasiɛi. 
Piyɛlɛ zɛba é seɠe, é lii la yɛ, é tɔɔzei ga é ɗa zelii lo ma, é ɗa ɠɛ ma: «GALA mina kɛ, Màliɠii! Naa la ɠɛa ga ɗe pɛ!» 
Kɛlɛ Yesu latini, é ɠɛ Piyɛlɛ ma: «Maaɠooza bà, Setana! Ɗa nà-pelei zu ga kɔɠɔziɠa zaɓu, mazɔlɔɔ ɗa-ɠisiɛiti ti la ga GALA nɔnɔ, kɛlɛ ta ga nuɓusɛ ɠisiɛiti.» 
Naa ʋoluma, Yesu ɠɛni ná-kaladopoiti ma: «Zɔi é pɔ ga é ʋilɛ pòlu, kɛni é ɠikula ɓɔɠɔ zu, é zaa wului zeɠe, é ʋilɛ pòlu. 
Tɔɔzei zɔi é pɔ é zɛnvui ɠizo, naama nui ɠa ʋala ma. Kɛlɛ zɔi a ʋala zɛnvui ma nà-faa zu, naama nui ɠa sɔlɔɔ ʋolu. 
Ni nui ta a etea zɔlɔɔ ganii pɛ sɔlɔɔna, kɛlɛ é ʋala zɛnvui ma, kulanuma ɓɛgele ɠa é bɛ? Ɓɛgele ɓɔɠɔɓɔɠɔ ka nu a zoo feezu ga zɛnvui unmɔɔ ganii? 
Mazɔlɔɔ Nu ná-Doun Zunui ɠa ʋaazu ta ná-geezuɠeelai, Kɛɛɠɛ ná-lɛbiyai zu, é ɛsɛ pɛ mɛɛin ve, é zoloo ma nu ɠɛɛwotiiti ma. 
Gè bo wo ma ga gaamai, tanigaa ta ʋɛ, ti la zaa, eyɛsu ti Nu ná-Doun Zunui ɠa, é ga masagi, é ɗa ʋa.» 
