﻿Matiyo.
4.
Naa ʋoluma, GALA Zɛnvui loni Yesu luɠɔ, é lii la teʋebai zu, nii a kɛ Inɛgi tɛ ga. 
Kpegai ma ga zugi zo folo ʋuunaanigɔ (40) ta kpidi ʋuunaanigɔi (40) laawu, pului soni. 
Tɛga nui maaɓuɠani ba, é ɠɛ ma: «Tɛi è ga GALA Doun Zunui, devei ve kɔtui niiti zea, ti valibo ga ɓului.» 
Kɛlɛ Yesu gooɠaaʋoteni, é ɠɛ ma: «Sɛʋɛʋɛ GALA Sɛʋɛi zu ga: ‹Nui la zɛnvui woga ga daamianigi nɔ, kɛlɛ kɛni wooiti pɛ maaʋele ti ɠulazu GALA da.›» 
Naa ʋoluma, Inɛgi liini la Zeluzalɛme, taa ɲadegai, é pilɛ GALA sei ʋɛlɛi ungaʋɛ, 
é ɠɛ ma: «Tɛi è ga GALA Doun Zunui, ʋili bu, mazɔlɔɔ sɛʋɛʋɛ GALA Sɛʋɛi zu ga: ‹Toɠa devei ve ná-geezuɠeelaiti zea ɗa-vaa zu.› Bogɛ ɓalaa ga: ‹Ta è la yeezu, nii a kɛ è-ɠɔɠɔi mina ziɠa kɔtu ʋa.› » 
Yesu gooɠaaʋoteni, é ɠɛ ma: «Sɛʋɛʋɛ ɓalaa GALA Sɛʋɛi zu ga: ‹Mina Maliɠii ɗa-ƓALAGI zuɠɔɠɔ.›» 
Naa ʋoluma, Inɛgi liini la gize gaaɠooza golai ta unmaʋɛ, é eteai zu masadai pɛ dɛɛ la, naa ʋɛɛ ma lɛbiyai pɛ ba, 
é ɠɛ ma: «Nà nii pɛ fe è ya, ni ɗa nɔkɔna bù.» 
Názu ɠa Yesu ɠɛni ma la: «Zeɠe kòba, Setana! Tɔɔzei sɛʋɛʋɛ GALA Sɛʋɛi zu ga: ‹Nɔkɔ Maliɠii ɗa-ƓALAGI wu, tɔ ɠila kpe nɔ ɠa ɗa dɛbi.›» 
Naa ʋoluma, Inɛgi zeɠeni koba. Geezuɠeelaiti ti ʋaani, ti ɗa maaleʋebo. 
Yesu mɛnigai ma ga ti Zan ʋiligɛ kasoi ɠa, é liini Galilé yooi zu. 
Naa ʋoluma, é zeɠeni Nazalɛte, é li, é zei Kapɛɛlɛnawume taazuʋɛ, Galilé ɗɛ wolai ɠobaʋɛ, Zaɓulɔn ta Nɛfɛtali ɠoʋii ma, 
naa ɠa a kɛ GALA goo wo nui Ezayi wooi ʋilɛsu, nii é boni ga: 
«Zaɓulɔn ta Nɛfɛtali yooi, niiti ti kpoloɗɛi ma ʋelei zu, Zuludɛn ziɛ ʋoluʋelei yooi, Galilé yooi, ʋɛ zii ɠiligiti ti zeini ná: 
Nuɓusɛi niiti ti zeini kpidii zu, naati ti wozakala golai ʋɛtɛga. Niiti ti zooi zu kpidi ɓɔii zu, wozakalagi ɠulaa naati bɛ.» 
Naama ziɛgi zu ɠa Yesu tɔɔzeini la niina ga GALA daawooi laazeelia, é ɗa ɠɛ ma: «À wo-ziɛ ʋelei maavalibo, tɔɔzei geeɠɔlɔgi ma masadai maaɓuɠaa.» 
Yeeta, Yesu yɛni leʋesu Galilé ɗɛ wolai laaʋɛ, é ɠɛɛɠɛloun felegɔ ɠa. Ma mɔungi laaseigi ɠɛni ga Simon (nii é lolisu ɓalaa ga Piyɛlɛ), kɛɛɠɛloin laaseigi ɠɛni ga Andelé. Ti ɠɛni kale ɓɛɛ lumɔi ʋilisu ziɛ wolai wu, tɔɔzei ti ɠɛni ga kale ɓɛɛ nuiti. 
Yesu ɠɛni ti ma: «À ʋilɛ pòlu, nà wo ɠɛ ga nu ɠaiziɛ nu.» 
Gaamago, ti ta-lumɔiti zɛni ná, ti ʋilɛ polu. 
É yɛni liizu ga ná-pelei naa nɔ, é ɠɛɛɠɛloun felegɔ ɠiligaa ɠa: Zeɓedé ná-doun zunui Zake, ta kɛɛɠɛloin Zan. Ti ɠɛni keingi zu ta ti-ɠɛɛ Zeɓedé, ti ɗa ta-lumɔiti kpɛtɛ. É ti lolini. 
Gaamago, ti ta-ɠeingi yɛni ná ta ti-ɠɛɛ, ti ʋilɛ Yesu ʋolu. 
Naa ʋolu, Yesu ɠɛni leʋeteʋesu Galilé yooi zu ná pɛ, é ɗa kalagi wo GALA dɛbi ʋɛlɛiti bu, é ɗa GALA ná-masadai ma Woo Niinɛ Ʋagɔi laazeeli, é ɠɛni seeɓɛ nuiti ta maalɛɠɛfɛ nui ma zii pɛ kɛdɛsu. 
Tɔɠɔi ɠulani, é zeeli Siili yooi zu ná pɛ. Ti ɠɛni ʋaazu pɔ ga seeɓɛ nuiti ta niiti kpein ti ɠɛni zoolɛzu ga ʋe kɛʋelei pɛ su, inɛ su nuiti, fɔlivɔli nuiti, kɔlɔsama nuiti, tama é ɠɛni naati pɛ kɛdɛsu. 
Bɛbɛ wolai ɠɛni ʋilɛsu polu, ti ɗa zeɠe Galilé yooi zu, ta Taa Wola Puugɔiti su, ta Zeluzalɛme, ta Zudé yooi zu, naa ʋɛɛ Zuludɛn ʋoluʋele yooiti ba. 
