﻿Woo Niinɛ Ʋagɔi Nii Matiyo Sɛʋɛni.
1.
Yesu Kilista mɛmɛwolaiti dɔlɔ sɛʋɛi ɠa ga nii, é ɠɛni ga Davide ta Abalaame ti-mavofodai: 
Abalaame Izaake zɔlɔɔni, Izaake Zakɔɓe zɔlɔɔ, Zakɔɓe Zuda ta kɛɛɠɛlointi sɔlɔɔ, 
Zuda Pelɛze ta Zela zɔlɔɔ Tamaal ʋa, Pelɛze Ɠɛsɛlon zɔlɔɔ, Ɠɛsɛlon Alame zɔlɔɔ, 
Alame Aminadaɓe zɔlɔɔ, Aminadaɓe Naason zɔlɔɔ, Naason Salema zɔlɔɔ, 
Salema Ɓoaze zɔlɔɔ Laɠaɓe ʋa, Ɓoaze Woɓɛde zɔlɔɔ Lute ʋa. Woɓɛde Izayi zɔlɔɔ, 
Izayi Davide zɔlɔɔ. Masagi Davide Salomɔn zɔlɔɔ Ilii anza wɔlɔmai ʋa, 
Salomɔn Loɓoame zɔlɔɔ, Loɓoame Aɓiya zɔlɔɔ, Aɓiya Aza zɔlɔɔ, 
Aza Zozafate zɔlɔɔ, Zozafate Yolame zɔlɔɔ, Yolame Woziase zɔlɔɔ, 
Woziase Yotame zɔlɔɔ, Yotame Aɠaze zɔlɔɔ, Aɠaze Ezekiase zɔlɔɔ, 
Ezekiase Manasé zɔlɔɔ, Manasé Amon zɔlɔɔ, Amon Zoziase zɔlɔɔ, 
Zoziase Yekonia ta kɛɛɠɛlointi sɔlɔɔ, Izilayɛle nuiti dii ziɛgi duɔlai zu Ɓaɓilɔne. 
Ɓaɓilɔne luɔlai ɠulaai ʋoluma ga, Yekonia Seyalitiyɛle zɔlɔɔni, Seyalitiyɛle Zoloɓaɓɛle zɔlɔɔ, 
Zoloɓaɓɛle Aɓiyude zɔlɔɔ, Aɓiyude Eliakime zɔlɔɔ, Eliakime Azɔɔl zɔlɔɔ, 
Azɔɔl Sadɔke zɔlɔɔ, Sadɔke Akime zɔlɔɔ, Akime Eliyude zɔlɔɔ, 
Eliyude Eleazaal zɔlɔɔ, Eleazaal Matan zɔlɔɔ, Matan Zakɔɓe zɔlɔɔ. 
Zakɔɓe Zozɛfe zɔlɔɔni, nii anzai ɠɛni ga Mali, nii Yesu zɔlɔɔgai ba, é lolisu ga Kilista. 
Naa ɠa é ba, nuɓusɛi mavofoda puugɔ maazu naanigɔ (14) ɠa é Abalaame yɔɠɔzu ta Davide. Naa ʋoluma, nuɓusɛi mavofoda puugɔ maazu naanigɔ (14) ɠɛ Davide yɔɠɔzu ta Izilayɛle nuiti dii ziɛgi duɔlai zu Ɓaɓilɔne. Naa ʋoluma, nuɓusɛi mavofoda puugɔ maazu naanigɔ (14) ɠɛ Izilayɛle nuiti dii ziɛgi yɔɠɔzu duɔlai zu ta Kilista zɔlɔɔ siɛgi. 
Wɛlɛ Yesu Kilista zɔlɔɔ pelei ʋa. Dee Mali maazoga ɠɛni de Zozɛfe ʋɛ, kɛlɛ ti ʋa ɠɛ ti zeeli ɓɔɠɔ ma ga zinini ta anza, Mali kogi zeɠeni ga Zɛnvu Ɲadegai ná-zobogi. 
Zozɛfe, nii é ɠɛni ʋaazu ɠɛɛzu ga sinigi, naa ɠɛni ga telebo nu. É la ɠɛni pɔ ga é naa unfe kɛlɛzu. Naa ɠa é kɛɛni, é ɠisiɛni nɔ ga é ɠɛlɛ ba dɔɔɠuzu. 
É yɛni ɠisiɛzu naama vai zu, eyɛsu Maliɠii ná-geezuɠeelai gila ge ɠula bɛ kɛlɛma segi zu, é ɠɛ ma: «Davide mavofodai Zozɛfe, mina lua Mali zeɠe vai ʋa ga è-anza, mazɔlɔɔ doin é koozu, Zɛnvu Ɲadegai laazɔgi ʋe. 
Toɠa doun zunu zɔlɔɔsu, nii è ʋaazu daaseigi ʋɛɛzu ga Yesu, tɔɔzei tɔ ɠa é ʋaazu ná-nuɓusɛiti kizosu ta-ɠotoiti ma.» 
Naa pɛ ge ɠɛɛni, nii a kɛ Maliɠii wooi nii ʋilɛsu, nii GALA goo wo nui boni ga: 
«Wɛlɛ, anzalopo ɓeai, nii é la dɛ zunu vaa ɠwɛɛ, naa ɠa kogi zeɠezu, é zunu loun zɔlɔɔ, ta daasei pɛɛ ga Emanuwɛle.» Daaseigi naa ʋoluʋɛ ɠa ga «GALA ka ade ʋa». 
Zozɛfe wuungai ma, é naama wooi zoni, nii Maliɠii ná-geezuɠeelai deveni ma, é Mali zeɠeni ga anza. 
Kɛlɛ ti la ɓɔɠɔ ɠwɛɛni pɛ ta naa, eyɛsu naa doin zɔlɔɔ ga zunu, nii Zozɛfe daaseigi ʋɛɛni ga Yesu. 
