﻿Zakali.
13.
Naama volo ná, ziɛungi laa ɠa lao Davide ná-pɛlɛyeɠei ʋɛ ta Zeluzalɛme nuiti bɛ, é ta-ɠotoiti ta ta-ɠɔzɔba vaiti gba. 
«Naama volo ná, nà kɔɔɠɔ ganigiti folo zooi ʋa, nu nɔpɛ ge la mɔ ti-laasei boga. Nà ma ɠala goo wo nuiti ɓalaa kula zooi ʋa, ta kɔzɔba ɠisiɛiti pɛ,» Ɠɔoɠɔ GALAGI, Fai-Pɛ-Maliɠii wooi ɠana. 
«Naazu, zɔi nɔpɛ é ɠɛɛzu GALA goo wosu, sɔlɔɔ kɛɛɠɛi, ta sɔlɔɔ deei ta ɠɛ ma: ‹È la mɔ yɛga vulua mazɔlɔɔ zɛɛ ɠala gooi ɠa è bosu Ɠɔoɠɔ GALAGI lɔɠɔi zu.› Sɔlɔɔ nuiti ɓɔɠɔgo ɠa naazu ti bɔɔzu, siɛgi zu é ɠɛɛzu GALA gooi wosu da. 
Naama volo ná, ma ɠala goo wo nuiti ti pɛ ti laa ɠa ve ga unfegi, siɛgi zu ti gala gooi wosu da, ti sɔlɔɔsu ta-ɠulakɛlɛmaiti su. Ti la mɔ kɛa pɛ, ti ʋa sua leɠa zeɠe wolai ta loo ɠɔba, ti ʋa ɗa nuiti yaava. 
Ti ɠilagilagi a ɗa ɠɛ ma: ‹Gè la ga GALA goo wo nu, nà ga tii ɠɛɛ nu nɔ, tii ɠɛ yooiti ta zèa kaite mà nu niinɛ ziɛ su.› 
Ni ta gaazaɠana, ti ɠɛ ma: ‹È palai niiti sɔlɔɔgɛ ɠale, ti è-ɠɔlɔgi ma?› Toɠa ti wooɠaaʋote, é ɠɛ ma: ‹Gè ti zɔlɔɔgɛ nɛ̀ɛɲɔɠɔiti ta-ʋɛlɛi wu.› » 
«Boɠa zɔkpɔi wuzeɠe nà-baala makɛ nui laalɔɠɔma, nɛ̀ɛɲɔɠɔi laalɔɠɔma!» Ɠɔoɠɔ GALAGI, Fai-Pɛ-Maliɠii wooi ɠana. «Baala makɛ nui loɠa, baalagiti ti zuvaza, nà ma goiti ɓalaa doɠa. 
Zooi zu nuɓusɛiti gaa ɠa ɠwɛsu saʋa, seizu felegɔi ɠa za, ti undaaʋili, kɛlɛ seizu ɠilagi ɠa yɛ vulua zooi zu,» Ɠɔoɠɔ GALAGI wooi ɠana. 
«Nà seizu ɠilagi naa lɔ abui zu, gè gaawuun kɔzɔi ɠula ba, ʋelei nu a ɗa walii ɠaawuun da kɔzɔi ɠula ba, nà nɔɠɔi ɠula ba, ʋelei nu a ɗa zanugi ma ɠɔzɔi ɠula la ba. Naazu ta fàli, gè ti wooɠaaʋote. Nà ti loli ga: ‹Nà-nuɓusɛiti›. Tiya ma, ta ɠɛ ma: ‹Ɠɔoɠɔ GALAGI ɠa é ga gá-ƓALAGI!› » 
