﻿Zakali.
10.
À Ɠɔoɠɔ GALAGI vali ga é yeeɠɛɠala mɔungi ma lonai ʋu. Tɔ ɠa a ɗa sabalagiti pu, toɠa tonai ve ga pooʋama, toɠa ɛsɛ gilagilagi ná-kpalaga aniiti kpɛtɛ. 
Mazɔlɔɔ pɛlɛ wu zaleiti ta wo wooɠaaʋotesu ga zɛɛi, ungaiziɛ nuiti ti ɗa zɛɛ ɠulakɛlɛmaiti ka, kɛzɛsulala ze gooiti ka ti suɠulazu, yaava ɠaanɛɛnɛi ɠa ti bosu. Naa ɠa é kɛa nuɓusɛiti ti lia poun maanɔɠɔi zu, eɠɛ baala kpulugiti makɛ nu la ti ʋɛ. 
«Baala makɛ nuiti ka zìiɠaawanaai ti ma, boli zinɛiti ka gè ti loɠazu. Mazɔlɔɔ Ɠɔoɠɔ GALAGI, Fai-Pɛ-Maliɠii ɠa ɠaaɓaazu tɔ ɓɔɠɔi ná-baala kpulugi ma, nii é ga Zuda ʋɛlɛyeɠei. Toɠa ti ɠɛɛzu ga ná-lɛbiya zooi, é liizu la kɔɔɠɔzuʋɛ. 
Tɔ ɠa kundiɠii ma zii pɛ ka ɠula su, ti ɠɛai eɠɛ sɔɓelama ɠɔtu wolai, eɠɛ seɠe ɠotai ma zuzo kɔlui, eɠɛ kɔɔɠɔ mɛɛin. 
Ta ɠɛ eɠɛ kɔɔɠuluɓaiti, ta kɔɔi ɠɔ, ti ɗa koi yɔɠɔzu ʋalaʋalagi ɠaayɔ ga ɠɔɠɔi, mazɔlɔɔ Ɠɔoɠɔ GALAGI ɠa ɠɛɛzu ti ʋa. Unfegi ɠa yei ga ti zili nuiti, ti sooiti kɔma. 
«Nà Zuda ʋɛlɛyeɠei zɛbɛlɔ, gè Zozɛfe ná-pɛlɛyeɠei ɠizo. Nà ti zei ʋele ɓɛtɛ ʋolu ga niinɛ, tɔɔzei nà ti maawɔinɠa, eɠɛ vɔlɔ kaipa gè la ɠɛni ɠɛlɛni ti ʋa. Mazɔlɔɔ nà ɠa gè ga Ɠɔoɠɔ GALAGI, ta-ƓALAGI, nà ta-maanɛɛnɛ wooiti gaaʋote. 
Zɛbɛi ɠa ɠɛ Efelayime nuiti ba eɠɛ kɔɔɠuluɓaiti, ti laa ɠa ve ga koozunɛɛi, eɠɛ ta dɔɔ ɓɔle. Siɛgi zu ti-lointi ta miná ɠaa la, ti ɠoozu ɠa nɛ, ti ɠoozu ɠa nɛ ga Ɠɔoɠɔ GALAGI maaʋele. 
Nà ti loli ga foe wooi ti ɠaalɛ ba, mazɔlɔɔ gè ti unmɔɔga. Ta mɔin ga mɔungi ɠɛʋele. 
Gè ti zuvazagɛ zɔɔma ziiti saama, zooiti su ti maaɠoozaai, ti-ɠi ka loo sù miná, ta yɛ ná ta ti-lointi, naa ʋoluma ti ɠale ma, ti ʋa. 
Nà ti ɠula Ezipete yooi zu, ta Asiili yooi zu, gè ʋa ga tiye Galaade, ta Liɓan yooi zu, kɛlɛ miná ɓalaa ge la kula ɠɛa ti ʋa. 
Izilayɛle nuiti ta kidaaʋili kpoloɗɛi ɓudɛ, Ɠɔoɠɔ GALAGI ɠa kpoloɗɛi ma lakpatakpagi loɠa, ziɛ wolai Nile ɠa vɔ, é zeeli kpoma. Asiili ná-wasogi zu ɠa ɠale, Ezipete ná-masa tukpɔi ɠa ɠula zea. 
Nà ɓɔɠɔi, Ɠɔoɠɔ GALAGI, nà zɛbɛi ve Izilayɛle nuiti bɛ, ti ziɛ ga zìimai,» Ɠɔoɠɔ GALAGI wooi ɠana. 
