﻿Misé.
6.
À woilo deɠɛmu naa ma, nii Ɠɔoɠɔ GALAGI bosu: Wuzeɠe, è lukpɔ gizeiti kakala, gize goiti ti è-wooi mɛni! 
À woilo, wa ʋe, gizeiti, Ɠɔoɠɔ GALAGI ná-tukpɔɠaaleʋeai ma, wa ɓalaa zooi wu ɓɛdɛgiti ti la ɲiikpiga pɛ! Mazɔlɔɔ tukpɔi ɠa Ɠɔoɠɔ GALAGI ta ná-nuɓusɛiti zɔɠɔzu, kpɔɛi ɠa ti yɔɠɔzu ta Izilayɛle nuiti. 
Maliɠii ɠɛ ma: «Nà-nuɓusɛiti, leeni ɠa gè kɛai ga woye? Leeni ɠa gè wo ɓɔlɔni la? À gòoi ɠaaʋote dɛɛ! 
Tɔɔzei gè wo ɠulani Ezipete yooi ʋa, wo ʋa ʋɛ. Gè wo unmɔɔni, gè wo ɠula duɔlai zu. Gè Moize ta Aalɔn ta Miliyameni toni wo luɠɔ. 
Nà-nuɓusɛiti, à ɠizɛ su ga, Moaɓe masagi Ɓalake faa ɲɔi leveni wo laalɔɠɔma, wo ɠizɛ naa zu, nii Ɓeyɔɔl ná-doun zunui Ɓalaame gooɠaaʋoteni da. Gè yɛni wo ʋa, é zo Sitime é li Gilegale, wo kɛ̀ɛwotiiti kaani, niiti ti zɔlegai, nɛ̀i gè ga Ɠɔoɠɔ GALAGI.» 
Leeni ɠa nà li gè lo da, Ɠɔoɠɔ GALAGI ɠaazu, siɛgi zu gè liizu nɔkɔsu da tɔun bu, GALAGI é Anii-Pɛ-Unda? Gala zalaɠaiti ka nà li ga tiye pɔ ɓaa, ti ga kona gila nikɛ yiʋoiti? 
Ɠɔoɠɔ GALAGI ɠa yeezei nɛi, baala sinɛ ɓulugiti bu? Ɓaa gulɔi ma ɓoigi la eɠɛ ziɛ wolaiti? Ɓaa gè dòun mɔungi ve nà-tɔ koloɠologiti faa zu, nii a kɛ é nà-kotoiti suvaayɛ? 
Ee, ɗa ʋe nui, ti è ɠalagɛ ga tuʋa ʋele ʋagɔi, ta nii Ɠɔoɠɔ GALAGI wɔinni ga è kɛ, toɠa ga è ziɛ ga sɔledai, wooɠɛɠiladai nɛɛ è ʋɛ, è ɗa ziɛ la, è ziɛ ga pagɔ unmaayei zu, ga ɗa-ƓALAGI yiima ʋelei. 
Ɠɔoɠɔ GALAGI ɠa ɓɔɛzu taa wolai ʋɔ, ɠimalai ɠa ga nu unfe daaseigi ma: «À woilo zelii ma, é losu wo ma, wo maaɠolo vai zu, wo woilo naa wooi ma, zɔi é devei wosu! 
Nà zoo nɛi gè va bu ga faa ɲɔu ɠɛ nuiti ti ta-ʋɛlɛiti buulaave ga naavoloi sɔlɔɔgai yaavai zu? Ta zɛɛ ɠɔɠɔ bo ganiiti, ti la kula ɠɛɛni su, naati wɔin la mà? 
Gè la zeliloga naati ma ɓaa, zɔiti ti zɛɛ ɠɔɠɔ ganiiti seɠezu ta-ɓɔlɔi zu, ti ɗa nuiti yaava la? 
Taai tɛi su naavolo nuiti ta ga tooma nuiti, taaʋeai tɛiti ta ɗa zɛɛi wo, yaava nɛgi ɠa é ti-la. 
Naa ɠa é ba, nà wo zopele ɲɔuzu eyɛsu wo zeeɓɛ, gè wo ɠoloɠolo wa-ɠotoiti faa zu. 
Wa daami wo, wo la yiɠoa, pului la zeɠea wo ma. Zɔi wa makɛ, naa la makɛga. Zɔi wa ɓaa maazu, nà naa ɠoloɠolo ga kɔɔi. 
Wa faza, kɛlɛ wo la teʋea. Wa wolive wulɔi ɓɛtɛ, wo la wo-maavaa ɠɛa ga ta, wa dɔɔɓɔigi ɓɛtɛ, kɛlɛ wo la ma lɔɔi ta pa kpɔlea. 
Wa ziɛzu ga pele ɲɔi masagi Womeli dɛɛni, ta Akaɓe ná-pɛlɛyeɠei ziɛ ʋelei ɠa wo ziɛzu la. Naa ɠa é ba, nà ʋaazu ga wa-laai ɠoloɠolo saɓui. Nà wo ɠɛ ga ɲɛɛɠulasu anii, nà-nuɓusɛiti ta-unfegi ma ɠasɔi ɠa la wo unma.» 
