﻿Misé Ná-Sɛʋɛi.
1.
Wooiti ka ga niiti Ɠɔoɠɔ GALAGI ti laazeelini Molesɛte nui Misé ma, Zuda masa saʋagɔiti ta-yeeɠɛɠalaiti, Yotame, ta Aɠaze ta Ezekiase. Kulakɛlɛmai naati ti ʋilɛni taa wolaiti ba, ti ga, Samali ta Zeluzalɛme. 
Nuɓusɛiti pɛ à woilo! Zooi ta wɔiti wo zooi ɠa, à ɠida bu! Maliɠii Ɠɔoɠɔ GALAGI ɠa yɛsu seizu ɲadegai, é zeele wooi wo wo laalɔɠɔma! 
Wɛlɛ Ɠɔoɠɔ GALAGI ɠana ɠula seizuʋɛ, é yei, é ɗa ɠɔɠɔziɛ zalaɠa ɠula adaʋɛti su. 
Gizeiti ti ɗa ɓusɛ kɔɠɔwu, pɛtugiti sulaa ɗa lao, eɠɛ kedoi ɠaa ɠa ɠɛ wuunsu abui ɠa, eɠɛ ziɛ a ɠɛ gizei yeizu. 
Naa pɛ ka ga Zakɔɓe mavofodaiti ta-lɔ koloɠologi, Izilayɛle ʋɛlɛyeɠei ná-kotoi maaʋele ma. Ɓɛ ɠa é Zakɔɓe liizu tɔ koloɠologi ma? Ná-taa wolai Samali laade ɓaa? Ɓɛ ɠa é Zuda liizu ani ɠɔɔ vaiti ma? Zeluzalɛme laade ɓaa? 
Maliɠii ɠɛni ma: «Naa ma, nà Samali ɠɛɛzu ga kɔtu ziɠigi dɔɓɔi zu, ti ɗa leezɛn ɓelei la ma, nà ná-kɔtuiti kilikili, ti la nɛmɛi zu, gè kpale ná, ma wuulaagiti ti maaɠala. 
Ná-kɔɔɠɔ gani kpɛtɛaiti su ɠa ɠaleɠale, ná-tɔnɔ ɲɔiti pɛ ti ɠala. Ná-vololiba zaɠaaiti, gè naati suɓulukpulu, tɔɔzei naati ti ɓɛtɛni ga ná-koloɠologi ma ɠulanumai, ta ʋaazu ɠɛɛzu ga koloɠologi taɠiligaa ma ɠulanumai.» 
Naa ɠa é kɛɛzu gè ɠaalɛizu, gè ɗa wɔlɔ, gè ɗa ziɛ ga ɠɔɠɔa ɲakai, kɔ̀ba ɲakai, gè ɗa kpeei loo eɠɛ koʋei, gè ɗa kpalagi wo eɠɛ saa wɔnigi. 
Mazɔlɔɔ maanɔɠɔi seeliai Samali ma, é la ɠulaa su pɛ. É zeelia Zuda yooi ma ta Zeluzalɛme taa ziɠidaʋɛ, ʋɛ nà-nuɓusɛiti ti zeini ná. 
À mina daazeeli Gate taazuʋɛ, à mina wɔlɔ! Ɓɛte-Leafala nuiti, à ɠilikili fufiligi zu! 
Safiil nuiti, à leʋe ga ɠɔba ɲakai ta wa-unfegi! Saanan nuiti ti la zoosu ti ʋa ɠula taa ʋa. Gɔlɔi ɠa wosu Ɓɛte-Ɠayɛsɛle taazuʋɛ, kpɔba zobo ge la mɔ ná. 
Malote taaʋeaiti sasu ɠa ɓalizu ta-ɠulanumaiti ma vaa zu. Mazɔlɔɔ nimiza vai Ɠɔoɠɔ GALAGI teʋegai é zeelia Zeluzalɛme taa ziɠidaʋɛ ma. 
Lakise laaʋeaiti, à wa-ɠɔɔɠɔ wotoloiti ta sooiti kɛʋele ɓɛtɛ. Wo ʋokɔɠɔni Izilayɛle ná-wooʋaladai ma, wo Zeluzalɛme lɔ tɔ koloɠologiti su. 
Naa ma, Zuda nuɓusɛiti à bali ma wa Molesɛte-Gate nuiti. Akiziɓe taa wolai la ɠɛa ga kula faa zu ani Izilayɛle nuɓusɛiti ta-masagiti bɛ. 
Maliɠii ɠa wo lɔɔzu nu niinɛ yeezu Malesa nuiti. Izilayɛle ɠundiɠiiti ti lɔɠɔɠulaai, ta ʋelazuʋɛ ɠaiziɛ Adulame ʋugi zu. 
À wɔungiti bo, wo ti ɓuye ma, Zeluzalɛme taaʋeaiti, kpaanagi ɠɛ wo-unmaʋɛ, eɠɛ ɗuai nɔungi, à wo yiima lointi ta-wɔlɔi wo, mazɔlɔɔ ta liizu ga tiye duɔlai zu, ti maaɠooza wo ʋa. 
