﻿Zonase.
3.
Ɠɔoɠɔ GALAGI ɓɔɛni ʋolu Zonase ʋɔ, é ɠɛ ma: 
«Wuzeɠe, è li Ninive taa wolai zu, è naa laazeeli ná, nii gè bogai è ma.» 
Zonase ʋilɛni pelei ma, é ɗa li Ninive, ʋelei Ɠɔoɠɔ GALAGI boni la ma. Tama Ninive ɠɛni ga taa wolai, kɛni nu a la kɛ ga folo saʋagɔ è ɗa ziɛ, è ʋa maaleʋe. 
Zonase folo ɠilagi ɠɛɛni, é ɗa ziɛ taazuʋɛ, é ɗa ɠɛ ma: «É yɛga nɔ ga folo ʋuunaanigɔ (40), Ninive ɠoloɠolo!» 
Taai zu nuɓusɛiti ti GALA gooi zoni ga zɔɓela. Ti deveni ga ti zugi zo, ta ti ɠilagilagi pɛ, é zo seizumaanɛgiti ma, é li bala nuiti pɔ, ti ɓɔɠɔ maaɠilini ga saa wɔlɔ wo seɠei. 
Ninive masagi naama wooi mɛnigai ma, é ɠulani ná-masa kpɔkpɔgi ɠa, é masa seɠei ɠula ɠɔba, é saa wɔlɔ wo seɠei loo ɠɔba, é zei zuʋui zu. 
É devei veeni ga ti zeze ga niima wooi Ninive taa wolai zu, ti ɠɛ ma: «Masagi ɠɛ ta ná-botiɠɛ nu wolaiti ti tɔgi loga ga nuiti kpein ta suaiti tanɔpɛ ge mina daami wo, ta mina ɓɔɔle. 
Nuɓusɛiti kpein ta suaiti ti maanɛɛʋɛ ga ti saa wɔlɔ wo seɠeiti too ɠɔba, ti wooɠula GALA ma ga zɛbɛi pɛ. Naa ʋoluma ɛsɛ pɛ ge zeɠe zɔ ɲɔi ʋolu ta toomai nii giliai ɛsɛ zeei ʋa. 
Tanisu GALA ka zeɠe ná-kisiɛi ʋolu, é ʋɛɛ yiima, é la ade undaaʋiliga.» 
GALA ge Ninive nuiti kɛʋelei ʋɛtɛni, é kaani ga naati ta zeɠezu ti-zɔ ɲɔiti polu. Naa ɠa é kɛɛni, maanɔɠɔi nii é ɠɛni ɠɛɛzu é kɛ ga tiye, é naama ɠisiɛi maavaliboni, é la mɔ ɠɛni kɛɛni. 
