﻿Amɔse.
7.
Wɛlɛ nii ʋa, Maliɠii Ɠɔoɠɔ GALAGI kulani bɛ̀ kɛlɛma: Koto kpulugi ɠɛni ɓɛtɛzu, siɛgi zu tufai nii gaaleʋeni mɔunpa masagi ʋɛ, naa ɠɛni lɛnusu la. 
Tɛi ti ɠɛni zooi ɠaa lufai pɛ miizu, gè ɠɛni ma: «Màliɠii Ɠɔoɠɔ GALAGI, nà è maanɛɛnɛzu, ɗa-nuɓusɛiti suvaayɛ! Ni naa laade, Zakɔɓe mavofodai ɠa zoo yɛsu ná ɠale? Ti wola maalɔiɗai!» 
Ɠɔoɠɔ GALAGI ná-kisiɛi valiboni, é ɠɛ ma: «Naama vai la mɔ ɠɛa.» 
Wɛlɛ mɔnɔ nii ʋa, Maliɠii Ɠɔoɠɔ GALAGI kulani bɛ̀ kɛlɛma: É abui maalolini, ga é ná-tukpɔi ɠaaleʋe ga naa, abuliegi naa ɠɛni zou wu ɗɛiti fɔɔzu, é ɗa Izilayɛle yooi ɠala. 
Gè ɠɛni ma: «Màliɠii Ɠɔoɠɔ GALAGI, nà è maanɛɛnɛzu, kpela pele zu mu! Ni naa laade, Zakɔɓe mavofodai ɠa zoo yɛsu ná ɠale? Ti wola maalɔiɗai!» 
Maliɠii Ɠɔoɠɔ GALAGI ná-kisiɛi valiboni, é ɠɛ ma: «Niima vai ɓalaa la mɔ ɠɛa.» 
É nii ɠulani bɛ̀ ʋolu kɛlɛma: Maliɠii ɠɛni loni siɠigi ɠa, kɔɠɔ galui zoni zea, kenagi kpui ba. 
Ɠɔoɠɔ GALAGI gàazaɠani, é ɠɛ mà: «Amɔse, leeni ɠa è kaazu?» Gè gooɠaaʋoteni, gè ɠɛ ma: «Kɔɠɔ galui ʋe kenagi kpui ba.» Maliɠii ɠɛni mà: «Nà kɔɠɔ galui ʋilisu nà-nuɓusɛiti, Izilayɛle nuiti saama. Nii ʋoluma, gè la mɔ ti maavaayɛga pɛ. 
Izaake ná-zalaɠa ɠula adaʋɛti kpein ta ɠoloɠolo, Izilayɛle ná-ada ɲadegaiti ti ɠoloɠolo. Nà kɔɔi ʋɛɛ Zeloɓoame ná-masa pɛlɛyeɠei ʋa.» 
Ɓetɛle zalaɠa ɠula nui Amasia wooleʋeni masagi Zeloɓoame ma, é ɠɛ ma: «Amɔse ɠa yaavai ɓɛtɛzu è laalɔɠɔma Izilayɛle nuɓusɛiti saama. Nuɓusɛi la mɔ zooga ziɛzu ná-kpɔɛzuɠula mɔinmɔingi wu. 
Mazɔlɔɔ wɛlɛ ʋelei kpɔɛai la: ‹Zeloɓoame ɠa zaazu boɠa zɔkpɔi ɠa, Izilayɛle nuɓusɛiti ti maa ɠa ɠooza poun ta-yooi ʋa.› » 
Amasia ɠɛni Amɔse ma: «Wozaɠaa nui, ʋelana, è li Zuda yooi zu ʋelei, è ɗa laami ná, è ɗa GALA gooi wo ná ʋele. 
Kɛlɛ Ɓetɛle lɛi è ʋa ɠɛ yɛsu ná, è ʋa ɗa GALA gooi wo, mazɔlɔɔ masagi ná-ada ɲadegai ɠa ga ʋɛ, ná ɠa ga GALA sei ʋɛlɛi masadai ʋɛ.» 
Amɔse Amasia wooɠaaʋoteni, é ɠɛ ma: «Gè la ga GALA goo wo nu, gè la ɓalaa ga GALA goo wo nu ná-doun zunu. Nà ga togani makɛ nui, sikɔmɔɔl kpelei ɠa nà ɗa tɛ. 
Kɛlɛ Ɠɔoɠɔ GALAGI sèɠeʋɛ togani ɓulugi ʋolu, é ɠɛ mà: ‹Li, è GALA gooi wo nà-nuɓusɛiti ma, Izilayɛle nuiti.› 
Woilona mu Ɠɔoɠɔ GALAGI laawooi ma, Amasia, ɗɛi è ɠɛɛzu mà: ‹Mina GALA goo wo Izilayɛle nuiti ma, mina mɔ ɓɔɛ Izaake mavofodai laalɔɠɔma.› 
Naa ɠa é ba, Ɠɔoɠɔ GALAGI wooi ɠaa: ‹È-anzai ɠa ɓɔɠɔ ve koloɠologi ya taazuʋɛ, è-loun zunuiti ta è-loun anzanuiti ta za ga boɠa zɔkpɔi, galui ɠa la ɗa-yooi ma, gaaɠwɛ taɠiligaa ʋa, ɗa ɓɔɠɔi ɗa zaazu kɔzɔba yooi ta zu, Izilayɛle ɠa li duɔlai zu, maaɠooza poun ná-zooi ʋa.› » 
