﻿Amɔse.
4.
À woilo nii ma gè bosu wo ma, Ɓasan nikɛ zaaiti ti zeini Samali ɠizeiti ma. Wa toomai ɠɛɛzu ga maawɔin nuiti, wa bala nuiti maanɔɠɔzu, wo ɗa ɠɛ wo-zinigiti ma: «À ʋa ga gi-ɓɔɔle anii gi ʋɔ!» 
Maliɠii Ɠɔoɠɔ GALAGI ɠonaa ná-ɲadedai ma, é ɠɛ ma: «Foloi tanigaa ta ʋaazu, ta wo mɛɛn ga kalagi, wo ɠilagilagiti. 
Wo pɛ wa ɠula taai ʋa ga zeɠeiti su ʋelei niiti ti siɠigi ʋa, ɛsɛ ge ɗa li ga letegi. Ta wo ɓɛ, wo li ga lɛkpɛmaʋɛ nu ɠɔʋɛzu ʋelei,» Ɠɔoɠɔ GALAGI wooi ɠana. 
«À li Ɓetɛle, wo tɔgi ɠoloɠolo, wo li Gilegale, wo ta ʋɛɛ tɔ koloɠologi ʋa ná! À wa-zalaɠaiti kula ga sobuzobui, wo wa-ʋuusiɛiti kula folo saʋagɔ-o-folo saʋagɔ! 
À wa-mama fee zalaɠaiti kula ga ɓului nii lɛʋɛi su. À zeze ga wa-vebɛaniiti wo ti veezu bɛ̀, tɔɔzei naa ɠa nɛai wo ʋɛ, Izilayɛle nuiti,» Maliɠii Ɠɔoɠɔ GALAGI wooi ɠana. 
«Nà ma, gè pului loa wo ma wa-laaiti pɛ su. Daamiani balagi ɠa wa-ʋɛlɛiti pɛ bu. Kɛlɛ anɛɛ naa ʋe, wo la ɠaleni ma pɔ̀ bɛ,» Ɠɔoɠɔ GALAGI wooi ɠana. 
«Alu saʋagɔ yɛgɛ ʋoluzu molo leʋei ʋa zeeli, gè wo ɠoma ga tonai. Gè tonai ʋu taai gila su, tona la ʋuuni zɔɔma laai zu. Gè tonai ʋu kpalagi gila su, ta la ʋuuni zɔɔma ɓalagi zu. Kpalagi nii tona la ʋuuni su, naa vɔ ma, tona ʋalagi ʋɛ. 
Taa felegɔ ɓaa saʋagɔ zu nuɓusɛiti ti ɗa li taa ɠilagi zu, ti ʋa ɓɔɔle, tama ti la ziɛ zɔlɔɔni ga mɔinɗa é ʋa kpɔɔle wɔin zeɠe ti ma. Kɛlɛ anɛɛ naa ʋe, wo la ɠaleni ma pɔ̀ bɛ,» Ɠɔoɠɔ GALAGI wooi ɠana. 
«Gè siinziin ganigiti ta-zeeɓɛiti pɛɛni wa-ɓalaga aniiti ba. Gè kotogiti teʋeni ti wa-ɓeleiti ta wa-leezɛn ɓeleiti suɠoloɠolo, naa ʋɛɛ wolive wuluiti ba ta kooleɠoole guluiti. Kɛlɛ anɛɛ naa ʋe, wo la ɠaleni ma pɔ̀ bɛ,» Ɠɔoɠɔ GALAGI wooi ɠana. 
«Gè ɗɔfɔ zeeɓɛi ʋili wa-loganiiti saama, ʋelei gè kɛɛni la ga Ezipete yooi. Gè wo zili nui yɛ ná, é wa-zunu loungoiti paa ga boɠa zɔkpɔi, é wa-zooiti so. Poomaiti makugi ɗa lɛ wo-zokpaiti su wa-ɠɔɔlaaɠai zu. Kɛlɛ anɛɛ naa ʋe, wo la ɠaleni ma pɔ̀ bɛ,» Ɠɔoɠɔ GALAGI wooi ɠana. 
«Gè nimizai yeini wo ma, ʋelei mɔungi gè kɛɛni la ga Sɔdɔme, ta Gomɔɔl. Wo ɠulaʋɛ naa zu, eɠɛ koʋileʋegi nii kulaai abuzogi zu. Kɛlɛ anɛɛ naa ʋe, wo la ɠaleni ma pɔ̀ bɛ,» Ɠɔoɠɔ GALAGI wooi ɠana. 
«Naa ɠa é ba, ee, Izilayɛle, wɛlɛna è zopelena ʋa bɛ̀! Tɛi tama ʋele ɠana gè ʋaazu è zosu da, ee, Izilayɛle, ɠɛʋele ɓɛtɛ, è ɗa-ƓALAGI laaɠomi!» 
Mazɔlɔɔ kɛni è dama: Tɔ ɠa é gizeiti kpɛtɛa, é fiilɛi ɓɛtɛ, tɔ ɠa a ɗa ɠisu vai lɛ ga nuɓusɛiti, toɠa ɗa geelaalaosuʋɛ maavalibo ga kpidii, toɠa ɗa ziɛ zooi ma ada ɠaaɠoozagiti, daaseigi ɠa ga Ɠɔoɠɔ GALAGI, Fai-Pɛ-Maliɠii! 
