﻿Amɔse Ná-Sɛʋɛi.
1.
Wooi niiti ka Ɠɔoɠɔ GALAGI dɛɛni ga Amɔse, Tekoa taazuʋɛ logani makɛ nui gila ge ɠɛni de. Ɠɔoɠɔ GALAGI ɓɔɛni pɔ Izilayɛle laalɔɠɔma, Zuda masagi Woziase ná-siɛgi zu, ta Izilayɛle masagi Zeloɓoame velesiɛi ná-siɛgi zu, Zoase ná-doun zunui. Niima vaiti kɛɛʋɛ kona felegɔ leʋe pɛ, zou ɓalii ʋa ɠɛ. 
É ɠɛni ɠɛɛzu ma: «Ɠɔoɠɔ GALAGI ɠa zikɔzu Siyɔn, gooi ɠa ɠulazu Zeluzalɛme. Togani lo nuiti ta-lufa lɛnugiti suɠaalɛiɗa Kaalamɛle gizei unmaʋɛ vɔa.» 
Ɠɔoɠɔ GALAGI wooi ɠaa: «Damase nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti Galaade nuiti koloɠologɛ ga wozawoli ɠali ɠaazoɓagi. 
Nà ʋaazu abui losu Ɠazayɛle ná-pɛlɛyeɠei ʋa, toɠa Ɓɛne-Ɠadade ʋoluzeizuʋɛti gala. 
Nà Damase taai ma ɓogiti galeɠale da, gè Avɛne nɛmɛi naa zu nuɓusɛiti undaaʋili, ta zɔi é masadai ɠɛɛzu Ɓɛte-Edɛne ʋɛlɛi wu. Siili nuɓusɛiti ta li duɔlai zu Kiil.» Ɠɔoɠɔ GALAGI ɠa é boga. 
Ɠɔoɠɔ GALAGI wooi ɠaa: «Gaza nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti liini ga kasoɠa nu mɔinmɔin, ti naati fe Edɔme ya ga duɔiti. 
Nà ʋaazu abui losu Gaza ziɠigi ʋa, toɠa poluzeizuʋɛti gala ná. 
Nà Asadɔde taaʋeaiti undaaʋili, ta zɔi é masadai ɠɛɛzu Asekalɔn. Nà Ekelɔn loɠa, Filisiti nuiti kpein ti undaa ɠa ʋili, kulaba la ba.» Maliɠii Ɠɔoɠɔ GALAGI ɠa é boga. 
Ɠɔoɠɔ GALAGI wooi ɠaa: «Tiil nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti la ɠizɛni kɛɛɠɛloun minazeɠegi zu, ti liini ga taa mɔinmɔin su nuɓusɛiti pɛ Edɔme ʋɔ duɔlai zu. 
Nà ʋaazu abui losu Tiil ziɠigi ʋa, toɠa poluzeizuʋɛti gala ná.» 
Ɠɔoɠɔ GALAGI wooi ɠaa: «Edɔme nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti ʋilɛgɛ ti-ɠɛɛlointi polu ga boɠa zɔkpɔi, ti gaazumaawɔinɠai pɛ tooni ya, ti la looɠoni pɛ ga naati kpɔlɔa ga ta-yiiɠaawanai, ti ta-vaawanamai zeiʋɛ yiima kpaan. 
Nà ʋaazu abui losu Teman taai ʋa, toɠa poluzeizuʋɛti gala Ɓosela taazuʋɛ.» 
Ɠɔoɠɔ GALAGI wooi ɠaa: «Amɔn nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti koma nuiti kogiti daaʋalini Galaade, nii a kɛ ti ta-yooi zuwɔɔlɔ. 
Nà ʋaazu abui losu Laɓa ziɠigi ʋa, toɠa poluzeizuʋɛti gala ná. Naa ɠa ɠɛɛzu ga kɔɔɠɔ voloi, kɔɔi maalugi zaama, tɔngɔlɔ fiilɛi zaama, yeei fiilɛ wolai lokoleʋezu la. 
Ta-masagi ɠa li duɔlai zu, ta ná-kundiɠiiti.» Ɠɔoɠɔ GALAGI ɠa é boga. 
