﻿Wozé.
13.
Efelayime a la ɠɛna ɓɔɛa, ɛsɛ pɛ ge ɠɛni luazu. Tosu wola ɠɛni zea Izilayɛle. Kɛlɛ é ɓɔɠɔ ɠɛa ga sɔba nui ga Ɓaale lɛbi vai, naa ɠa é kɛa é zaa. 
Niizu niina, wɛlɛ ti ya ʋa, ti ta ɓɔsu ta-ɠotoi ʋa, ti ɗa kɔɔɠɔ ganigiti kpɛtɛ ga ta-walii nii ti gaawuunsu, ti ɗa kɔɔɠɔ ganigiti saɠa ɓɔɠɔ ʋɛ ga zeaʋagi, naati kpein ma ta ga ɲɛɛliɠi ɠɛ nuiti ta-wotii. Kɛlɛ ta ɓɔɛzu ti ʋɔ, niiti ti nuiti kulazu ga zalaɠai, naati ka nikɛ yiʋo ʋaaɠulabai nɛɛnɛzu ga daaʋɛ komagai. 
Naa ɠa é ba, niima nuiti ta ɠɛ eɠɛ sobuzobu lonaɓiingi, é ɲɛɛlɛzu fala, eɠɛ sobu nɔɗagi é vɔɔzu gaamanɔ. Ta ɠɛ eɠɛ molo ɠaʋai, nii fiilɛi pilisu ya, é kula molo loɠazuʋɛ, ɓaa eɠɛ duului é ɠulazu pɛlɛ ɠɔmaʋɛ. 
«Nà ma, Ɠɔoɠɔ GALAGI, nà ɠa gè ga ɗa-ƓALAGI, kaite názu dɛ è Ezipete yooi zu. É ɠula nɔ̀un polu, è la GALA kili nɔpɛ kwɛɛ, kizo nu ɓalaa ge la ná nɔ̀un polu. 
Nɔ̀un, gè è ɠwɛɛni teʋebai zu, zou vɔɔi zu. 
Ti zeelia nɔ feya tufa lɛnugi zu, pului zeɠe ti ma, ti yiɠoa, ti yiilaave ga wasogi, naa ɠa é kɛɛni ti yeemani mà. 
Tɔ ɠa é ba, nà ɠɛɛzu ti laalɔɠɔma ga zalai, gè ɠɛ ga kɔii, é pelei ɓɔunsu ti luɠɔ. 
Gè ti zo eɠɛ filɛ zuai nii ti ma yiʋoiti seɠeai zea, nà wo-ɠekegi zuʋali. Nà ti mi, eɠɛʋelei zala zaai a ɗa kɛ la. Dɔɓɔ zuaiti ta ti ɓulukpulu, ti ti la ga gilagila. 
Ɓɔɠɔ ʋɛtɛna, ɗa ʋe, Izilayɛle, è ɠoloɠologa. Ɓɛ ɠili ka a ɓɔ è ʋa? 
Mini ɠa wa-masagi ná niizu? É ʋaana, é wo ɠizo, wa-laa wolaiti kpein su! Wa-lukpɔɠaaleʋe nuiti ta mini? Wa ɠa wo ɠɛni ɠɛɛzu mà: ‹Masa seina gi unda, ta kundiɠiiti.› 
Gè masagi veeni è ya nà-ziiɠaawanai zu. Nà ma, nà kula è ya, nà-ziivilɛi zu. 
Efelayime ná-faaɠaaza golai zɛʋɛʋɛ, ná-kotoi makɛgɛ kpaan. 
Soolɛi ɠa zeeli ma eɠɛ doun ɠoozuwanai. Kɛlɛ ɠimalala loin ʋe, sɔlɔɔ yeeɠɛɠalai zeeliai, é la kɛɛzu é ʋa ɠula dee ɠoozu. 
Nà ɠa maanɛɛni mu ga gè ti unmɔɔ kabayeɠei ná-zobogi ma ɓaa, gè ti ɠizo saai ma ɓaa? Ee, saai, ɗa-ɠaaɓaai ɠa mini? Ee, gɔvɛalaazu, ɗa-undaaʋili ma zobogi wɔɔ? Ti maawɔin la mɔ sòga pɛ! 
Efelayime ɠaawɔɔlɔ ʋa ɓalaa kɛɛɠɛleaiti saama, fiilɛi ɠa ʋaazu, Ɠɔoɠɔ GALAGI ná-fiilɛi ɠa zeɠezu teʋebai zu, é lɛ, é ná-ziɛungiti maaleʋe, é ná-ziɛyeɠeiti fɔ su. Ta loo naavolo makɛsuʋɛti su, ti li ga sɔɔla ɓiigiti kpein.» 
