﻿Wozé.
9.
Mina ɠoozunɛ, Izilayɛle, è ʋa ɗa ɠɔkɔ ga koozunɛɛi ga zɔɔma nuɓusɛiti kɛʋele. Mazɔlɔɔ è ɠɛlɛa ɗa-ƓALAGI ʋa, è ɓɔɠɔ ʋilɛ koloɠologi laawu. Ʋɛ kpein ti molo loɠazu ná, wɔin ɠa è ma ga è ɗa-ɠoloɠologi ma zalai zɔlɔɔ náti. 
Kɛlɛ moloi ta gulɔi la kula ɠɛa ga tiye, dɔɔ niinɛi ɓalaa kula vai ɠa ga iɲɔteʋe vaa. 
Ti la yɛga pɛ Ɠɔoɠɔ GALAGI ná-zooi zu. Efelayime ɠa ɠale ma Ezipete yooi zu, ta kɔzɔba laamianigiti mi Asiili yooi zu. 
Ti la mɔ dɔɔ zalaɠai ta ɠula pɛ Ɠɔoɠɔ GALAGI ʋɛ, ta-zalaɠaiti ti la naa ɛnɛkɛga pɛ. Ɠɔnɔgi ɠa ɠɛ ti ʋɛ ga eɠɛ saa wɔlɔ wosu laamianigi, zɔi kpein é ta miizu, naama nuiti ta ɠɔzɔ. Mazɔlɔɔ ti-ɠɔnɔgi ɠa ɠɛ nɔ ga ti-ɠogi nɔnɔ, ta la lia pɛ Ɠɔoɠɔ GALAGI zei ʋɛlɛi ma ɠoizuʋɛ. 
Leeni ɠa wo ʋaazu kɛɛzu fɛti voloi vaa zu, Ɠɔoɠɔ GALAGI ná-fɛti voloi? 
Mazɔlɔɔ wɛlɛ tiya ʋa, ti liizu tɔɔzei faa zuɠoloɠologi vaa kɛai. Ezipete ɠa ti zeɠe ga duɔiti, ta-ɠabaiti ta ɠɛ Mɛmefise taazuʋɛ. Kpele tufaiti ta lɛ ta-naavolo ɓiigiti ma, ɠaingiti ti ʋɔnɔ ta-ʋɛlɛiti bu. 
Doɠai ma voloi ʋɛtɛ, é ʋaazu. Potokula voloiti ti ʋaa. Kɛni Izilayɛle naa zuɠwɛɛ. GALA goo wo nui litigɛ, nui nii zɛnvui ba, toɠa ɓɔɛzu wuulewuule, tɔɔzei ɗa-ɠotoi wɔɔlɔ ʋelei ʋa, ta wɔinzeɠema wolai ʋa wo kɛɛzu la. 
Kɛlɛ nɛ̀i gè ga GALA goo wo nui, Efelayime ná-taa makɛ nui, nà nà-GALAGI ʋa. Wa balii lɛɛzu tùɠɔ, nà-pele goi kpein su, wo ɗa wuzeɠe dàalɔɠɔma, nà-GALAGI ná-zooi zu. 
Ti ɓadɔa kpe kɔzɔba vai ɓomaʋɛ, eɠɛʋelei mɔungi Giɓea nuiti ti kɛɛni la. Kɛlɛ Ɠɔoɠɔ GALAGI la yeemani ta-vaaɠaaza golai ma, toɠa wuzeɠezu ta-ɠotoiti daalɔɠɔma. 
Ɠɔoɠɔ GALAGI ɠɛ ma: «Gè Izilayɛle ɠaani teʋebai zu, kulaai ga leezɛn wulu ʋɔnɔ koi. Gè wo-mɛmɛwolani kaani eɠɛ kooleɠoolegi ma waa mɔungiti. Kɛlɛ ti liiʋɛ Ɓaale-Peyɔɔl, ti ɓɔɠɔ vea unfegi ya, ti ɠɛ ga ziimaziɛ ganii, ga ti yiima anii ɠɛʋele. 
Efelayime ná-lɛbiyai ɠa ʋaazu ɠoʋesu eɠɛ wɔnii, ko ge la mɔ zeɠea, koma nu la mɔ ɠɛa ná, doun la mɔ zɔlɔɔga. 
Anɛɛ ɓalaa toɠa doin tanigaa ɠulazu su, naati ti la nu ɠitelai zɔlɔɔga, eyɛsu gè ti ɠula ti ya. Tama, nimizai ɠa ti luɠɔ siɛgi zu gè ʋoluavesu la ti ʋa. 
Gè ɠɛni Efelayime ʋɛtɛsu ga Tiil ɠɛʋele, siingai tufa lɛnugi zu. Kɛlɛ Efelayime ɠa ʋaazu ná-dointi teʋesu naama nui ʋɔ, nii é ti ɠɔdaaleʋezu.» 
Ee, Ɠɔoɠɔ GALAGI, fe ti ʋɛ! Ɓɛgele ɠa è feezu ti ʋɛ? Doun zɔlɔɔtala ɠogi ɠɛ ti-anzaiti ma, ɲiimiɗɛ mina ɠɛ ta-ɲiimiiti su. 
Ɠɔoɠɔ GALAGI ɠɛ ma ʋolu: «Ti-zɔ ɲɔi kpein kulaʋɛ kɛlɛma Gilegale, miná ɠa gè tɔɔzeini ná ga ti wɔinzeɠea. Ti-ɠɛɛwoti ɲɔiti maaʋele ma, nà ti ɓɛɛzu nà-zooi zu. Gè la mɔ ti nɛa ʋɛ, ta-ɠundiɠiiti kpein ta ga kololala nuiti. 
Kpakɔi zeelia Efelayime ma, ma zapeiti ti vɔa, ti la mɔ waa woga pɛ. Ni ɓalaa ti-anzaiti ta doun zɔlɔɔna, nà ti undaaʋili, ti-ɠoozu ɠaawaai niiti ti nɛai gola ti ʋɛ.» 
Nà-GALAGI ɠa ɠɛlɛzu ti ʋa, mazɔlɔɔ ti la woiloni goo ma. Ta ʋilɛ unba, ti ɗa leʋe ziiti saama. 
