﻿Wozé.
6.
Wa ɠɛɛzu ma: «À ʋa, ade ɠale ma Ɠɔoɠɔ GALAGI ʋɔ, tɔ ɠa é ade maawanaa, tɔnɔ ɠa a ade ɠɛdɛ. Tɛigi é ade loɠaai, toɠa ada-ʋalaiti sale. 
Folo felegɔi ʋoluma, toɠa zɛnvui ve ade ya, foloi zaʋasiɛi, é ade wuzeɠe, ada yɛnvu ʋolu tɔun gaazu. 
Gaamazu ade leʋe ga pele goi ma zii pɛ, ade Ɠɔoɠɔ GALAGI ɠwɛɛ, ade ɠaaɓa ade tɔun kwɛɛ. Paa vai ɠa ga ɠite vaa, eɠɛʋelei nɔ foloi ɠula vai la. Toɠa ʋa ade ʋɔ, eɠɛ sama lonai, ɓaa foɠo lonai é zooi ɠaalɛilɛisu.» 
Ɠɔoɠɔ GALAGI ɠa wo wooɠaaʋotesu, é ɠɛ ma: «Lee ɓa ka nà kɛ ga ɗe, Efelayime? Leeni ɠa nà kɛ ga ɗe, Zuda? Wa-wooɠɛɠiladai é lo bà, kulaʋɛ nɔ ga sobuzobu lonaɓiingi, ɓaa sobuzobu nɔɗai, nii é ɲɛɛlɛzu nɔ fala. 
Tɔ ɠa é ba, gè wo loɠaai la ga GALA goo wo nuiti ta-ɠeela wooiti, gè wo ʋaa ga dàawooi. Nà-tukpɔi yei wo ma eɠɛ wozakalagi. 
Mazɔlɔɔ wɔ̀inʋɛ ga wooɠɛɠiladai, é leʋe zalaɠaiti ba, ta nà pɔ ga nu kwɛ̀ɛ ga GALA, naa vizɔgɛ é leʋe gala zalaɠaiti ba. 
Kɛlɛ ʋelei Adama kɛɛni la, tiya ɓalaa ti ta-minazeɠegiti koloɠologɛ, ʋele ɠana ti yàavaai la. 
Galaade ɠa ga faa ɲɔu ɠɛ nuiti ta-laai, sulaavegai ga ɲamai ʋogiti. 
Ʋelei toosu nuiti ta ɗa pele ɓɔungi wo da, ʋele ɠana zalaɠa ɠula nu ɓɔgiti ti nuiti paazu la Sikɛme ʋelei zu. Faa ɲɔuɲɔu gola ɠana! 
Gè faa ɲɔuɲɔugiti kaaʋɛ Izilayɛle ʋɛlɛyeɠei wu, mazɔlɔɔ Efelayime ná-koloɠologi zuwɔɔlɔa, é Izilayɛle pɛ kɔzɔa. 
Ɗɛi ɓalaa, è ga Zuda, nà ɗɔnɔ ma molo leʋei ɠɛʋele ɓɛtɛzu, siɛgi zu gè ʋaazu la ga nà-nuɓusɛiti ti duɔlai zu.» 
