﻿Wozé.
2.
Kɛlɛ yeeta Izilayɛle nuiti ta mɔin eɠɛ kpoloɗɛi laaʋɛ ɲaɠaegi, nii nu la zooga buɲɛ kɔɠɔsu ɓaa gaalusu. Ʋɛ GALA ge ɠɛni ɠɛɛzu ti ma ná: «Wo la ga nà-nuɓusɛa», ta loli miná ga: «Zɛnvu su ƓALAGI ná-dointi». 
Zuda ta Izilayɛle nuiti ta ɠaalɛ ba naazu, ti kundiɠi ɠila kpe nɔ zei ɓɔɠɔ unda. Ta ɠula duɔla yooi zu, mazɔlɔɔ Zizeleyɛle ná-foloi wɔɔlɔʋɛ. 
À ɠɛ wo-ɠɛɛlointi ma, ta loli ga: «Nà-nuɓusɛiti». À ɠɛ wo-leelointi ma: «Nɛɛbɛ anzanuiti». 
«À wo-lee Izilayɛle ʋeelala, à mina maaɠɛ kpɔ ma, mazɔlɔɔ é la mɔ ga ànza, nà ɓalaa, gè la mɔ ga sini. É ná-wɛɛnziɛgi ma ʋoogiti kula ɠaazu, ta é ná-koloɠologi yeeʋogiti kula ɲiimiiti zɔɠɔzuʋɛ. 
Ni naa laade, nà kabei ʋilɛsu, ʋelei é ɠɛni la yeei dee sɔlɔɔni da, gè lati, gè ná-zooi ɠɛ ga teʋebai ta zou vɔɔi, gè undaaʋili ga kpɔɔle wɔin. 
Gè la ná-dointi maawɔinɠaa, tɔɔzei ti zɔlɔɔgɛ koloɠologi zu. 
Gaamazu ti-lee ɠa ʋilɛni ga koloɠologi, zɔi é ti zɔlɔɔgai, unfetala luʋai ɠa é kɛɛzu, é ɗa ɠɛ ma: ‹Nà pɔ gè ʋilɛ nà-wɛɛinti polu, niiti ti ɠɔnɔgi ta kpɔɔle ɗɛiti feezu zèa, ti ɗa màaɠili ga baala deɠa zeɠei ta geze zeɠei, niiti ti gulɔi ta dɔɔi veezu zèa.› 
Naa ɠa é ba, nà pelei leʋesu tuɠɔ ga ɠain sasai, gè siɠigi lo tuɠɔ naazu, é la mɔ lii ʋele ɠaa. 
Toɠa ʋilɛ ná-wɛɛinti polu, kɛlɛ é la zeelia ti ma, toɠa ti ɠaiziɛ, é la ti ɠaa. Toɠa ɠɛ ma niina: ‹Kii, ɓɛ gè ɠale ma sìni mɔungi ʋɔ bɛ, gè ɠɛa ziilɛi su naa ʋɔ bɛ, é leʋe niizu ʋa.› 
É yeemani ga nà ɠa gè moloi ta dɔɔ niinɛi veeni zea, naa ʋɛɛ gulɔi ʋa, gè walii ta zanugi ve zea, naati ka é ti zeɠeni, é kwɛɛ Ɓaale ma. 
Naa maaʋele ma, nà ʋaazu, gè nà-moloi ɠula zea, molo leʋe ziɛgi zu, gè nà-dɔɔi ɠula zea, dɔɔ ɓɛtɛ yeeɠɛɠalai zu, gè nà-baala deɠa zeɠei ta nà-geze zeɠeiti kula zea, niiti ti ɠɛa kabei lɔɔɠuzu. 
Niizu, nà kabei ɠulazu ná-wɛɛinti gaazu. Nu nɔpɛ ge la zɔlɔɔga é ʋa kula zèa. 
Nà ná-koozunɛɛiti kpelasu pele zu, ta ná-fɛtiiti, ta alu toga niinɛi ma vɛtiiti, naa ʋɛɛ ná-dooɠo foloiti ba, ná-fɛtii mɔtaiti ta ɓela pele zu. 
Gè ná-leezɛn ɓeleiti suɠoloɠolo, ta ná-kooleɠoole guluiti, nii é ɠɛa ɠɛɛzu ma: ‹Wɛlɛ sàlai ɠa nà-wɛɛinti ti feai zèa.› Nà náʋɛti kɛɛzu ga dɔɓɔi, ʋɛ dɔɓɔ zuaiti ta ɠɛ laamiizu ná. 
Ʋele ɠana gè wuzeɠezu la daalɔɠɔma, tɔɔzei naama voloiti faa zu, siɛgi zu é ɠɛni ansansegiti galazu la Ɓaalegiti bɛ, ta siɛgi zu é ɠɛni ɓɔɠɔ maaɠilizu la ga ná-balaɠaegiti ta goizu anigiti, é ɗa ʋilɛ ná-wɛɛinti polu, é yeema nɔ̀un ma,» Ɠɔoɠɔ GALAGI wooi ɠana. 
«Naa maaʋele ma, nà sosu ʋolu, gè lii la teʋebai zu, gè ɓɔɛ ziimaʋɛ. 
Miná, nà ná-leezɛn ɓeleiti fe zea niina, gè Akɔɔl nɛmɛi ɠɛ ga kito pɛlɛlaʋɛ. Toɠa gooɠaaʋotegi ve, ʋelei é ɠɛni kɛɛzu la ma loungo ziɛgi zu, ta yeei é ɠɛni zeɠezu la Ezipete yooi zu. 
Naama voloiti su, é la mɔ tòliga ga ‹Ɓàale›, nii poluʋɛ ga ‹Màliɠii›, kɛlɛ toɠa ɠɛ mà: ‹Sìnigi›,» Ɠɔoɠɔ GALAGI wooi ɠana. 
«Nà Ɓaalegiti daaseigiti kula komagi zu, nu ɠi ge la mɔ vɔlɔ loa ti-laaseigiti su. 
Naama voloi, nà minazeɠegi ɓɛtɛzu gá nà-nuɓusɛiti gi yɔɠɔzu, ti yɔɠɔzu ta dɔɓɔ zuaiti, ta wɔniiti, naa ʋɛɛ kpokpo ganiiti ba. Nà kɔɔɠɔ zɔɔlaiti koloɠolo zooi zu, mɛɛin ta boɠa zɔkpɔi, gè va bu nà-nuɓusɛiti ti ɲi ziilɛigi zu. 
Nà è vuluzu ɠɔoɠɔ faa ma. Nà è vuluzu ga telebodai, ta sɔledai, gè è vulu ga nɛɛbɛi, ta maawɔinɠai. 
Nà è vuluzu ga wooɠɛɠiladai. Ɗa suɠwɛɛ naazu ga nà ɠa gè ga Ɠɔoɠɔ GALAGI. 
Naama voloiti su, nà geeɠɔlɔgi wooɠaaʋote kpɛdɛ ma vaiti su, geeɠɔlɔgi ɓalaa ka zooi wooɠaaʋote kpɛdɛ ma vaiti su,» Ɠɔoɠɔ GALAGI wooi ɠana. 
«Zooi ɓalaa ge moloi, ta dɔɔi, ta gulɔiti gooɠaaʋote, naati pɛ ti ɓɔsu, ti Zizeleyɛle wooɠaaʋote. 
Nà ti vaza ɓɔɠɔ ʋɛ zooi zu, eɠɛ ani zuwui, nà Lo-Luama nɛɛ ʋɛ, gè ɠɛ Lo-Ami ma: ‹Ɗa ga nà-nuɓusɛi,› tɔ ɓalaa ka ɠɛ mà: ‹Nà-GALAGI.› » 
