﻿Daniyɛle.
10.
Pɛɛlese masagi Siluse ná-masadai ma ɠonagi zaʋasiɛi, GALA ná-gooleʋe gooi zeelini Daniyɛle ma, nii é ɠɛni lolisu ga Ɓɛlɛtasaal. Wooi naa ɠa ga gaamai, kɔɔ wola ɠa ɠɛɛzu de. É ɠidaani wooi naa wu, é kulakɛlɛmai ná-fai ɠaaɠa. 
«Naama ziɛgi zu, nà Daniyɛle, gè kɛɛni ga dɔɔɠɔ saʋagɔ gaalɛi zu. 
Gè la ɠɛni daamiani nɛɛnɛ miizu, gè la sua miini, gè la dɔɔ ɓɔleni, gè la ɠɛni gulɔ maku nɛɛnɛ siɛni ɓɔɠɔ ma, eyɛsu dɔɔɠɔ saʋagɔi naati ti leʋe. 
Alu mɔungi ma volo ʋuufelegɔ maazu naanisiɛi (24) ma, gè ɠɛni ziɛ wolai laaʋɛ nii daa ga Tigele. 
Kɛ̀ai ma wɛlɛzu, gè nui ta ɠaani, maaɠiliai ga geze zeɠei, saamaɠiliai ga zanu kitei ma zaamaɠiligi. 
Kpusɛi ɠɛni eɠɛ kɔtu zɔngɔ ɓaagi, gaazuʋɛ ɠɛni volozu eɠɛ mainmain, gaazuɠɛzɛiti ti ɠɛni eɠɛ abuzogi, zeeiti ta kɔɠɔiti ti ɠɛni volozu eɠɛ kɔlu ɓɔigi é abui zu. A ɠɛna ɓɔɛa eɠɛ nu a ɠɛ bɛbɛ wola zɔngɔ woomɛnisu. 
Nà Daniyɛle, nà ɠila kpe ka gè kulakɛlɛmai naa ɠaani. Nui niiti ti ɠɛni kòba, naati ti la ɠɛni ani nɔpɛ kaani, anɛɛ naa ʋe ti luani, ti ɓizɛ, ti lɔɔɠu. 
Nà ɠila kpe nɔ ɠa gè yɛni wɛlɛzu kulakɛlɛma maayikii naa ʋa. Sɛbɛi ɠulani zèa, gàazuʋɛ valiboni maaʋoolopoolo, fikɛ nɔpɛ ge la mɔ ɠɛni sù. 
Gè nui naa wooiti mɛnini. Daawooi mɛnigai ma, sùɠilini, gè looni, gè laaʋɛɛ zooi ma. 
«Pɛtɛ, nui ta yeeveeni bɛ̀, gè ɗa ɓali, é pìlɛ ɲìibiiti ga ta zèeiti. 
Nui naa ɠɛni mà: ‹Daniyɛle, ɗɛi GALA ge è nɛai ʋɛ, ɠaaɓa, è wooi naati gaaɠa, gè ti wosu è ma. Wuzeɠe, è lo, mazɔlɔɔ tèʋegɛ è ma.› Naama wooiti maaʋele ma, gè wuzeɠeni, gè lo, kɛlɛ gè ɗa ɓali dɛ. 
«É ɠɛni mà mɔnɔ: ‹Mina lua, Daniyɛle! É zo folo mɔungi ma, è ɗa-ɓɔɠɔmaayeii ta ɗa-ɠoloi ɠulani la kɛlɛma ɗa-ƓALAGI ʋɛ, é ɠɛni è-yiimaʋɛ ga è naati gaaɠa, niiti ti ɠɛɛzu, ɗa-maanɛɛnɛ wooi mɛnini, gè ʋilɛni pelei ma ga gè ʋaa è ʋɔ ga gooɠaaʋotegi. 
Pɛɛlese ná-geezuɠeela ɠundiɠii sàkpeni folo ʋuufelegɔ maazu ɠila (21) daawu, eyɛsu Misɛle, nii é ga geezuɠeela ɠundiɠi wolai ta, naa ʋaa é ɓɔ bà, gè yɛni ná Pɛɛlese masagiti kobaʋɛ. 
Pàaʋɛ niizu ga gè naa ɠaalɛ ga ɗe, nii é ʋaazu ɠɛɛzu ga ɗa-nuɓusɛiti ʋelela ʋelei, mazɔlɔɔ kulakɛlɛma ɠa dɛ ná naama voloiti faa zu.› 
«Kɛai ma naama ɓɔɛiti daazeelizu mà, gè unpilɛni, gè ɠaazulo zooi ʋa, gè la ɠɛni zoosu gè ʋa woo ɲɛ gila kpalaa bo. 
Kɛlɛ kpɛtɛanii ta, niigi nuɓusɛ ɠaazuʋɛ ɠɛni ba, naa ʋaani, é yeeʋɛɛ dàkɔlɔgiti ba, gè laalao, gè ɓɔɛ. É yɛni loni kàkalaʋɛ, gè ɠɛ ma: ‹Màliɠii, kulakɛlɛmai nii vaa zu, maaɠili ɠa mà, ta zɛbɛ la mɔ bà. 
Nà zoo ɠale, nɛ̀i gè ga botiɠɛ nu nɔ, gè ʋa yɛpɛ Màliɠii ʋɔ? Zɛbɛ la sù, mavoɠolo nɔ ʋe.› 
«Gaamago nɔ, nii gaazuʋɛ ɠulani ga nuɓusɛ ɠaazuʋɛ, naa yeeʋɛɛni bà ga niinɛ ga é zɛbɛ ve bɛ̀ ʋolu. 
Naa ʋolu é ɠɛni mà: ‹Mina lua, GALA nɛɛbɛ nui! Ziilɛigi ɠɛ è ʋa! Zasulo, è zɛbɛ zɔlɔɔ ʋolu!› Kpɔɛ la pɔ̀ ɠilagila, zɛbɛi ɠɛni veezu zèa. Gè ɠɛni ma naazu: ‹Màliɠii, ɗa zoo è ɓɔɛ pɔ̀, mazɔlɔɔ è zɛbɛi vea bɛ̀.› 
É ɠɛni mà: ‹È kwɛɛ lee vaa zu pàai è ʋɔ? Kɛ̀ʋele ɓɛtɛʋɛ niina ga gè ɠale ma, gè Pɛɛlese ná-geezuɠeela ɠundiɠii zakpe. Siɛgi zu gè liizu nɔ la feya, Gelɛse ná-geezuɠeela ɠundiɠii ɠa ʋaazu. 
Kɛlɛ mɔunpa su, nà naa ɠulazu kɛlɛma è ʋɛ, nii sɛʋɛai gaama zɛʋɛi zu. Nu nɔpɛ ge la ɓɔsu bà, gi ʋa sili nui naati sakpe, kɛni Misɛle, nii é ga geezuɠeela ɠundiɠii nii é Izilayɛle makɛsu.› » 
