﻿Daniyɛle.
8.
«Masagi Ɓɛlesazaal ná-masadai ma ɠonagi zaʋasiɛi, nà Daniyɛle, gè se niinɛ woni, ma mɔungi ʋoluma, nii gè boni. 
Pɛtɛ nii gè kaani naazu: Gè ɠɛni Elame you zɛʋɛi ma laa wolai zu nii é ga Suze, ziɛ wolai nii daasei ge ga Ulayi, naa laaʋɛ. 
Siɛgi zu gè ɠɛni wɛlɛzu la, gè baala sinɛ wola ɠila kaani loni ziɛ wolai laaʋɛ. Minɛ felegɔ ɠɛni ba ti wola ɠoozaai, kɛlɛ anɛɛ naa ʋe, zɔi é ʋɔnɔni ga gaaɓela, naa ɠoozani é leʋe zɔi ʋa. 
Gè baala sinɛ wolai ɠaani, é ɗa minɛiti siɠa folo liizu ʋelei ʋa, ta nu ɠɔʋɛzu ʋelei, ta nu yeezazu ʋelei. Sua ɠili gila kpalaa ge la ɠɛni zoosu é ʋa lo daawu, nu la ɠɛni zooga é ʋa nu nɔpɛ kula zeezu. Nii é ɠɛni nɛɛzu bɛ, naa nɔ ɠa é ɠɛni kɛɛzu, ná-zeeɠaaɓaai ɠɛni wɔɔlɔzu nɔ. 
«Siɛgi zu gè ɠɛni ɠisiɛzu la naa zu nii gè kaani, boli zinɛ wolai ʋaani, é zeɠe folo liizu ʋelei, é ɠɛni ɓizɛzu eteai zu ga gaazuvilɛi eyɛsu kɔɠɔ la ɠɛni zɔɔzu zooi ʋa. Boli zinɛi naa, minɛ maayiki golai ɠɛni loni gaazuɠɛzɛiti zɔɠɔzuʋɛ. 
É zeelini baala sinɛ wolai ma nii minɛi ɠɛni fele, gè kaani loni ziɛ wolai laaʋɛ, é ziɠani ba ga zuvikɛi kpein. 
Gè kaani, é zeeli baala sinɛ wolai ma, é yiiɠaawana, é siɠa, é naa minɛ felegɔiti kpulukpulu. Boli zinɛ wolai zɛba é baala sinɛ wolai loo zooi ma, zɛbɛ la mɔ ɠɛni ba é ʋa maaɠɔkɔ zea. Boli zinɛ wolai ɠɔɠɔloni ma, nu nɔpɛ ge la zooni é ʋa unmɔɔ, é ʋa kula zea. 
Boli zinɛi wola wɔɔlɔni, kɛlɛ siɛgi zu ná-zeeɠaaɓaai ɠwɛgi zeelini la, minɛ wolai ɠaleni ga nɔ kpaun. Minɛ maayiki naanigɔ ʋɔnɔni potogi zu, ti lete zooi ma zoko naanigɔiti ma. 
«Minɛ lɔilɔi ko ɠulani ti taɠila ba, naa ná-zeeɠaaɓaai wola wɔɔlɔni nu yeezazu ʋele yooiti su, ta folo ɠulazu ʋelei, ta zooi naa zu nii pagai zooiti pɛ ba. 
É wuzeɠeni ɓalaa geeɠɔlɔgi zu ɠɔɔʋɛbɛiti daalɔɠɔma, é ma mɔinmɔin too zooi ma ti zaama, ta somideɠai ma mɔinmɔin, é ɠɔɠɔlo ti ma. 
É laalɛɛni ɓalaagi geeɠɔlɔgi ma ɠɔɔʋɛbɛiti ta-ɠundiɠii wu, é zalaɠa vai zeɠe ga, nii é ɠɛni ɠulazu naa ʋɛ folo-o-folo, é naa ná-ada ɲadegai ɠɔzɔ. 
Geeɠɔlɔgi ma ɠɔɔʋɛbɛi lɔɔni zeezu, é ɓɔ zalaɠai ʋa é ɠɛni ɠulazu folo-o-folo tɔɔzei tɔ koloɠolo fai ʋa. Minɛi gaamai ʋuuni ya zooi ma, ta é zobo sɔlɔɔni kɛɛ vai kpein su. 
«Gè geezuɠeela ɠila goomɛnini, é ɗa ɓɔɛ, geezuɠeela ɠili ge gaazaɠani, é ɠɛ ma: ‹Fai niiti ti lɛɛzu kulakɛlɛmai zu, ta yɛsu ɠɛɛzu eyɛsu yeelɛ? Folo-o-folo zalaɠa ɠulaai seɠeai ga, naa ɠa ɠɛɛzu ga yeeɠɛɠala lielegɔ, ta tɔ koloɠolo fai, ta ada ɲadegai ɠɔzɔ vai, ta kɔɠɔlomai bogai ga geeɠɔlɔgi ma ɠɔɔʋɛbɛi?› 
Nu ɲadega mɔungi gooɠaaʋoteni, é ɠɛ ma: ‹Kɛni sobu ta kpɔkɔ waafelegɔ unsaʋagɔ (2.300) leʋe pɛ, naa ʋoluma ada ɲadegai ná-botii lɔɔ ɠa zei niina.› » 
«Siɛgi zu nɔ̀un nà, Daniyɛle, gè ɠɛni wɛlɛzu la kulakɛlɛmai naa ʋa, gè ɠɛni ɠɛɛzu gè poluʋɛ ɠwɛɛ, gè gaaɠa, pɛtɛ anii ta loni kàkala, kulaai ga zunui. 
Gè wooi ta mɛnini, é zeɠe ziɛ wolai naa ʋɔ bɛ nii é ga Ulayi, é ɠɛ ma: ‹Gaɓiliyɛle, kulakɛlɛmai ʋoluʋɛ wo zunui tɛi ma, nii é kaai.› 
Gaɓiliyɛle maaɓuɠani bà ʋɛ gè ɠɛni ná. Gè luani, gè loo zooi ma, dàaʋɛɛ. É ɠɛ mà: ‹Ɗa ʋe, zunui, gaaɠa, mazɔlɔɔ kulakɛlɛmai tɛi ka yeeɠɛɠala ɠaaɓelagiti ta-vai wosu.› 
«Siɛgi zu é ɠɛni ɓɔɛzu pɔ̀ la, dàaʋɛa ɠɛni de nɔ zooi ma, sùɠilini. É yeeʋɛɛni bà, é bùzeɠe, 
naa ʋolu é ɠɛni mà: ‹Nà naa lɛɛzu ga ɗe, nii é ʋaazu ɠɛɛzu yeeɠɛɠalai naa ma deveai, yeei GALA ná-ziiɠaawanai ʋaazu ɠaaɓelasu da. 
Baala sinɛ wolai nii è kaai, minɛi ba fele, naa ɠa é ga Mɛde nuiti ta Pɛɛlese nuiti ta-masadai. 
Boli zinɛ wolai ɠa é ga Gelɛse nuiti ta-masadai. Minɛ wolai nii é ʋilɛni gaazuɠɛzɛiti zɔɠɔzuʋɛ, naa ɠa é ga masa mɔungi. 
Siɛgi zu minɛi ɠaleni la, minɛ naanigɔ ɠiligaa ti ʋɔnɔni potogi zu. Naati ta ga masada naanigɔ niiti ti ʋaazu zeizu tɔun potogi zu, kɛlɛ ta-yeeɠaaɓaai la ɠɛa ga nɔnɔ ma zɛbɛi ɠɛʋele. 
Siɛgi zu ma masadaiti ti zeelizu la ɠwɛgi ma, ta tɔ koloɠolo nuiti ti ta-lɔ koloɠologi laazeelizu la, waso masagi ɠa wuzeɠe, nii é ga yaava nu wolai. 
Ná-zobogi ɠa wɔɔlɔ, kɛlɛ naa la zeɠea tɔ ɓɔɠɔi sɛbɛi zu. Toɠa koozuʋili faa zuɠoloɠologiti kɛ, toɠa zobo sɔlɔɔ kɛɛ vai kpein su, eyɛsu é zobobɛ nuiti tanigaa ma zuwu ɠaaleʋe, ta nu ɲadegaiti ta-nuɓusɛiti. 
Ná-keleɠelegi zu, toɠa zoo é zɔiti yaava. Ná-wasogi zu, toɠa nui ma mɔinmɔin ma zuwu ɠaaleʋe, niiti ti kaazu ga ta zeini ziilɛigi zu. Toɠa wuzeɠe kundiɠiiti ta-ɠundiɠii laalɔɠɔma. Názu ɠa a ɠoloɠolo da, nu nɔpɛ ge la ʋɔɔpɛɛni ba. 
Sobuiti ta kpɔkɔiti ta-vai nii è kaa kulakɛlɛmai zu, toɠa ga gaamai. Kulakɛlɛmai ná-fai naa makɛ dɔɔɠuzu, mazɔlɔɔ togɛ yeeɠɛɠalaiti ba niiti ti maaɠoozaai.› 
«Nà, Daniyɛle, gè foloi tanigaa ɠɛni zɛbɛ la bà, gè ɗa zeeɓɛ. Fìzɔgai ma, gè nà-botiiti tɔɔzeini ʋolu masagi ʋɔ bɛ. Gè ɠɛni dɛ wuulee kulakɛlɛmai naa ma vaa zu, tɔɔzei gè la ɠɛni ná-fai ɠaaɠaani ɲɛgɛlɛin.» 
