﻿Ezekiyɛle.
48.
«Bolodamaiti daaseigiti pɛtɛ ta tɔnɔi ti sɔlɔɔsu: Dan nɔnɔi ɠa ɠɛɛzu gaaɓelasuʋɛ nu ɠɔʋɛzuʋɛ, pelei laaʋɛ è leʋesu Etilon, Leɓo-Ɠamate ta Ɠasaal-Enon, Damase ta Amate masadaiti koba ʋelei, suvie folo ɠulazu ʋelei ɠwɛmaʋɛ, eyɛsu é zei Kpoloɗɛ Wolai ʋa, folo liizu ʋelei. 
Dan nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Asɛɛl nɔnɔi a ɠɛ ná. 
Asɛɛl nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Nɛfɛtali nɔnɔi a ɠɛ ná. 
Nɛfɛtali nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Manasé nɔnɔi a ɠɛ ná. 
Manasé nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Efelayime nɔnɔi a ɠɛ ná. 
Efelayime nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Luɓɛn nɔnɔi a ɠɛ ná. 
Luɓɛn nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Zuda nɔnɔi a ɠɛ ná. 
«Zuda nɔnɔi ɠwɛgi zakpai ma, é zo folo ɠulazu ʋelei, é zei Kpoloɗɛ Wolai ʋa folo liizu ʋelei, wa zooi ta leʋe ba, kogi ɠɛ ga zeezakpa waaʋuufelegɔ maazu lɔɔlugɔ (25.000), sakpai ɠɛ ga bolodamaiti tɔnɔi zɔligɔi. Zaamazuʋɛ ɠa GALA seizu ɲadegai a ɓɛtɛ ná. 
Ʋɛ wo ná leʋezu ba ga Ɠɔoɠɔ GALAGI nɔnɔi, sakpai ɠa ɠɛ ga zeezakpa waaʋuufelegɔ maazu lɔɔlugɔ (25.000), kogi ɠɛ ga zeezakpa waaʋuufelegɔ (20.000). 
Naama you ɲadegai ɠa ɠɛ ga zalaɠa ɠula nuiti tɔnɔ, zeezakpa waaʋuufelegɔ maazu lɔɔlugɔ (25.000), é zo folo ɠulazu, é li folo liizu, é ɠɛ ga zeezakpa waapuugɔ (10.000), é zo nu ɠɔʋɛzu ʋelei é li nu yeezazu ʋelei. Zaamazuʋɛ ɠa Ɠɔoɠɔ GALAGI zeizu ɲadegai a lo ná. 
Naama yooi ɠa ɠɛ ga zalaɠa ɠula nuiti tɔnɔ, niiti ti veai GALA botiɠɛ vai ma, Sadɔke mavofodaiti. Ti ɠaaɓaani nà-botiɠɛ vai ma, ti la ɠɛni ɠakani, siɛgi zu Izilayɛle nuiti ti ɠakani da, eɠɛʋelei Levi nuiti ti ɠakani da. 
Naa ɠa ɠɛ ga tɔnɔ ga adaʋɛ ná wola ɲadegai, seɠeai zooi ʋɔ bɛ ʋa, ʋɛ ná makɛgai Ɠɔoɠɔ GALAGI ná-faa ma, Levi nuiti tɔnɔi ma ɠwɛpelemaʋɛ ɠobaʋɛ. 
«Levi nuiti tɔnɔi ɠa ɠɛ nɔ zalaɠa ɠula nuiti tɔnɔi ɠoba. Ti felegɔ pɛ ti-zakpaiti ta ɠɛ ga zeezakpa waaʋuufelegɔ maazu lɔɔlugɔ (25.000), ti-ɠogi ɠɛ ga zeezakpa waapuugɔ (10.000). 
Zalaɠa ɠula nuiti ta Levi nuiti ti la zooga ti ʋa ta ʋɔdi, ɓaa ti ʋa maavalibo, ɓaa ti ʋa dɔ ga ziingao, mazɔlɔɔ zooi naa ɠa fizɔgai zɔiti pɛ ba, feeʋɛ Ɠɔoɠɔ GALAGI ʋɛ. 
«Naama yooi zu makɛgai, toɠa yɛsu na ga zeezakpa waadɔɔlugɔ (5.000) kogi zu, zeezakpa waaʋuufelegɔ maazu lɔɔlugɔ (25.000) sakpai zu. Naa ɠa ɠɛ ga kiti yooi, é ga taai nɔnɔ, ta taaʋeaiti, ta ti-ʋaalobaiti, taai ɠa ɠɛ zaamazuʋɛ. 
Toɠa ɠɛ ga seki naanigi, zeezakpa waanaanigɔ undɔɔlugɔ (4.500) nu ɠɔʋɛzuʋɛ ta nu yeezazuʋɛ, naa ʋɛɛ folo ɠulazu ʋelei ʋa ta folo liizu ʋelei. 
Ada ɲakai ɠa yɛ ná, taai ɠakama naanigɔi pɛ, é ɠaku ma, suwɔɔlɔ ga zeezakpa unfelegɔ puulɔɔlugɔ (250). 
Zooi makɛgai Ɠɔoɠɔ GALAGI vaa ma, ta ɠa yɛsu ʋoluzu sakpai ma folo ɠulazu ʋelei ta folo liizu ʋelei ga zeezakpa waa ʋuupuu (10.000). Miná ɠa daamianigi maanɛai é ɠaiziɛ ná taaʋeaiti faa ma. 
Botiɠɛ nuiti kpein ti ʋaazu ti ɠula Izilayɛle wolodamaiti pɛ su, ta ɠɛ tii ɠɛɛzu ná. 
Zooi pɛ makɛgai Ɠɔoɠɔ GALAGI vaa ma, toɠa ɠɛ ga seki naanigi zeezakpa waaʋuufelegɔ maazu lɔɔlugɔ (25.000), sakpai ta kogi. Wa ta ɠula zou ɲadegai naa ʋa ga seki naani kpuɠagi, ná ɠɛ ga taai nɔnɔ ma yooi. 
«Zɔi é yɛsu, naa ɠa ɠɛ ga kundiɠii nɔnɔi. Ná-zooi ɠa ɠɛ zooi ɠakamaʋɛti felegɔ, nii makɛgai Ɠɔoɠɔ GALAGI ná-faa ma, ta taai ʋuuzu vai. Toɠa la zɔiti sakpaiti daaʋɛ, ga zeezakpa waaʋuufelegɔ maazu lɔɔlugɔ (25.000), folo ɠulazu ʋele ɠwɛgi ma, eyɛsu folo liizu ʋelei, é ʋilɛ Kpoloɗɛ Wolai ʋa. Naa ɠa a kɛ zooi nii feai Ɠɔoɠɔ GALAGI ʋɛ, ta GALA seizu ɲadegai, naati ti yɛ zooi zaamaʋɛ. 
Kundiɠii ná-zooi ɠa ɠɛ Levi nuiti ta taai ʋuuzuʋɛ ti yɔɠɔzuʋɛ, é ɠɛ Zuda ná-zou ɠwɛgi ma nu ɠɔʋɛzu ʋelei, ta Ɓɛnzamɛn nɔnɔi ma nu yeezazu ʋelei. 
«Wɛlɛ bolodamai zɔiti tɔnɔiti ba. Ɓɛnzamɛn nɔnɔi lɔɔ ɠa zeizu kwɛpelegi ma folo ɠulazu ʋelei, é kpoloɗɛ wolai ʋa folo liizu ʋelei. 
Ɓɛnzamɛn nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Simiyɔn nɔnɔi a ɠɛ ná. 
Simiyɔn nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Isakaal nɔnɔi a ɠɛ ná. 
Isakaal nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Zaɓulɔn nɔnɔi a ɠɛ ná. 
Zaɓulɔn nɔnɔi ɠwɛgi zakpai ma é zo folo ɠulazu ʋelei, é li folo liizu ʋelei, miná ɠa Gade nɔnɔi a ɠɛ ná. 
Gade ɠwɛmaʋɛ nu yeezazuʋɛ, miná ɠa zou ɠwɛgi a ɠɛ ná. Toɠa zo Tamaal folo ɠulazu ʋelei, é li Meliɓa ɗɛiti ma, Kadɛse, é lɛ ga Ezipete ɠɔtuɗɛi, é ʋilɛ Kpoloɗɛ Wolai ʋa. 
Zooi ɠana, wa gaaɠwɛ ga kpakutoomai Izilayɛle wolodaiti ba, ti ɠilagilagi tɔnɔiti kana ta sɔlɔɔ zooi zu,» Maliɠii Ɠɔoɠɔ GALAGI wooi ɠana. 
«Wɛlɛ ʋɛti ti ɠɛɛzu ga nu lɛɛzuʋɛti taazuʋɛ. Nu ɠɔʋɛzuʋɛ siɠigi ʋa, sakpai ga zeezakpa waanaanigɔ undɔɔlugɔ (4.500), 
(Izilayɛle wolodamaiti daaseigiti ta ɠɛ taai ma ziɠidaʋɛti ma), siɠida saʋagɔ ɠɛni nu ɠɔʋɛzuʋɛ ga Luɓɛn ná-siɠidaʋɛ, Zuda ná-siɠidaʋɛ, Levi ná-siɠidaʋɛ. 
Folo ɠulazu ʋelei, siɠigi zakpai ɠɛni ga zeezakpa waanaanigɔ undɔɔlugɔ (4.500), siɠidaʋɛ ɠɛni ba ga saʋagɔ, Zozɛfe ná-siɠidaʋɛ, Ɓɛnzamɛn ná-siɠidaʋɛ, Dan ná-siɠidaʋɛ. 
Nu yeezazu ʋele ziɠigi, zakpai ɠɛni ga zeezakpa waanaanigɔ undɔɔlugɔ (4.500) siɠidaʋɛ ɠɛni ba ga saʋagɔ, Simiyɔn ná-siɠidaʋɛ, Isakaal ná-siɠidaʋɛ, Zaɓulɔn ná-siɠidaʋɛ. 
Nu yeezazu ʋele ziɠigi, zakpai ɠɛni ga zeezakpa waanaanigɔ undɔɔlugɔ (4.500) siɠidaʋɛ ɠɛni ba ga saʋagɔ, Gade ná-siɠidaʋɛ, Asɛɛl ná-siɠidaʋɛ, Nɛfɛtali ná-siɠidaʋɛ. 
Siɠigi zakpai é ɠooli taai ma é ɠɛni ga zeezakpa waapuugɔ maazu lɔsaʋa (18.000). É zo naama voloi ma, taai laasei ka ʋɛɛ ga ‹Ɠɔoɠɔ GALAGI ɠa ʋɛ.› »
