﻿Ezekiyɛle.
44.
Zunui liini ga ze GALA seizu ɲadegai ma ziɠidaʋɛ ʋoluʋelei, nii é folo ɠulazu ʋelei. Daaɠuluni. 
Ɠɔoɠɔ GALAGI ɠɛni mà: «Siɠidaʋɛ tɛi daaɠulugai ɠa yɛsu de, nu la daalaoga pɛ. Nu la leʋega ná ʋele, mazɔlɔɔ Ɠɔoɠɔ GALAGI, Izilayɛle ná-GALAGI lɛɛni ná ʋelei. Daaɠulugai ɠa yɛsu de. 
Kɛlɛ kundiɠii, ná-kundiɠi vai ma, toɠa zei ná, é ná-daamii wo Ɠɔoɠɔ GALAGI ɠaazu. Toɠa zoo é lɛ, é ɠula ga tɛɛ wosuʋɛ tetegai siɠidaʋɛ ma.» 
Zunui liini ga ze naa ʋoluma siɠidaʋɛ nu ɠɔʋɛzu ʋelei, GALA sei ʋɛlɛi ɠakalaʋɛ. Gè pɛtɛni ga Ɠɔoɠɔ GALAGI ná-lɛbiyai é volozu, naa Ɠɔoɠɔ GALAGI zei ʋɛlɛi wuulaaveni. Gè looni zooi ma, gè laaʋɛɛ. 
Ɠɔoɠɔ GALAGI ɠɛni mà: «Ɗa ʋe, zunui, ɠaazuzeɠe ma ga pagɔ, è woilo! Mɛni ga woiyeɠei, nii kpein é ga tɔgiti ta deveiti gè ti veezu é lo sèizu ɲadegai ʋa. Ɗa dama gola ga faiti ti ʋilɛsu nu lɛɛ vai ʋa, ta nu ɠula vai ʋa, sèizu ɲadegai ʋa. 
Ɗa ɓɔɛ kololala nuiti pɔ, Izilayɛle nuiti: ‹Maliɠii Ɠɔoɠɔ GALAGI wooi ɠaa: Izilayɛle nuɓusɛiti, wa-ɠɔzɔba vaiti ti kula ɠɛa ga ze, niiti wo ti ɠɛɛni. 
Siɛgi nɔ zu wo ɠɛni nɔ̀nɔ ma laamianigi veezu la bɛ̀, ga zalaɠa zuai ma wulɔiti ta ma ɲamaiti, wo wɛɛinti dɔɔni sèizu ɲadegai, ti la latini pɛlɛʋolu, ti la ɠoloni bɛ̀. Wo sèi ʋɛlɛi ɠɔzɔni ga naa. Minazeɠegi nii é wo ɠilini nɔ̀un ba, wo naa ɠoloɠoloni ga wa-ɠɔzɔba ɠɛɛwotiiti kpein. 
Wo la ɠaaɓaani botii ma, é lo zèaɠɔli ɲadegaiti ba, kɛlɛ wɛɛinti ka wo ti loni ʋotogi zu, ga ti kɛ. 
Maliɠii Ɠɔoɠɔ GALAGI wooi ɠaa: Wɛɛn nɔpɛ é la latini pɛlɛʋolu, ta é la ɠoloni bɛ̀, é la lɛa sèizu ɲadegai, anɛɛ ni toɠa zeini Izilayɛle nuiti saama.› » 
« ‹Nii é ga Levi nuiti tɔnɔi, tɛiti ti ɠɛlɛni bà, ti ʋoluave bà, siɛgi zu Izilayɛle ɠakani da, ti zeɠe polu, ti ʋilɛ ta-ɠɔɔɠɔ gani nɔɠɔiti polu, ta ta-vaaɠaazagi naa zu nimizai zɔlɔɔ. 
Ta zoo ti botii ɠɛ bɛ̀ ga sèizu ɲadegai ma ziɠidaʋɛti makɛ vai, ti botii taɠiligaani kɛ sèizu ɲadegai wu. Ta zoo ti suaiti paa, niiti ti ɠulazu ga gala zalaɠaiti ta zɔɔma zalaɠaiti, ta ɠɛ nuɓusɛiti zeema. 
Kɛlɛ tɔɔzei tiya ɠa ti loni Izilayɛle nuiti untuɠɔ kɔɔɠɔ gani nɔɠɔiti kɔɔzuʋɛ, ti ti loo kotoi zu, wɛlɛ gè minazeɠea ti ʋɛ ga nà wuzeɠe ti laalɔɠɔma, ta ta-vaaɠaazagi zu nimizai zɔlɔɔ,› » Maliɠii Ɠɔoɠɔ GALAGI wooi ɠana. 
« ‹Ti maa la nɛɛni ti ʋa maaɓuɠa bà, ti ʋa nà-zalaɠa ɠula wotii ɠɛ, ti maa la nɛɛni ti ʋa maaɓuɠa ani ɲadegaiti tanɔpɛ ba, nii feai bɛ̀, ɓaa nà-zalaɠa ɠulazu ɲadega wolai ʋa. Pele ɠana ta ta-unfetala vaiti ta ta-ɠɔzɔba vaiti su nimizai zɔlɔɔ da. 
Nà GALA sei ʋɛlɛi ma wotii ɠɛ ga ti-unma ɠasɔi, miná ɠa ta botii kpein kɛ ná, nii maanɛai ga é ɠɛ.› » 
« ‹Kɛlɛ zalaɠa ɠula nuiti, Levi nuiti ti ga Sadɔke mavofodaiti, niiti ti ɠaaɓaani sèizu ɲadegai ma, siɛgi zu Izilayɛle nuiti ti ɠɛni ɠakasu la, ti maaɠooza bà, tiya ɠila nɔ ɠa ta yɛ maaɓuɠazu bà, ti ɗa botii ɠɛ bɛ̀, ti ɗa zalaɠa zuai ma wulɔiti kula bɛ̀ ta ma ɲamaiti,› » Maliɠii Ɠɔoɠɔ GALAGI wooi ɠana. 
« ‹Tiya ɠila nɔ ɠa ta ɠɛ lɛɛzu sèizu ɲadegai, ti maaɓuɠa nà-taɓalii ʋa, nii a kɛ ti naa ɠɛ nii gè deveai é lo dɛ̀bi vai ʋa. 
Ta ɠɛna koi zaamaʋɛ ma ziɠidaʋɛti ma ɓogiti maazuɓudɛa, kɛni ti geze zeɠeiti too ɠɔba. Ti la baala deɠa zeɠe loa ɠɔba, siɛgi zu ti botii ɠɛɛzu la koi zaamaʋɛ, ta GALA sei ʋɛlɛi wu. 
Geze zeɠei ɠa a ɠɛ ti unba ga bɔɔlɔgi, ta geze zeɠei ɠɛ ti ma ga ʋɛlɛ kpuɠagi. Ti mina maaɠili zɔɔla zeɠe a fɔdɔi ɠula ti ma. 
Kɛlɛ siɛgi zu ti ɠulazu la koi wolai zu nuɓusɛiti pɔ bɛ, ta ta-wotiɠɛ zeɠeiti kula ɠɔba, ti ti ʋu zalaɠa ɠulazu ɲadegai ma ʋɛlɛiti bu, ti seɠe ɠiligaa loo ɠɔba, nii a kɛ ti mina nuɓusɛiti ɲade ga ta-zalaɠa ɠula zeɠeiti. 
Ti la tɔungi ɓuyega, kɛlɛ ta ɗa tɔungi wo, ti mina ɓe ba é ʋa ɠooza. 
« ‹Zalaɠa ɠula nu ɠila kpalaa mina dɔɔ ɓɔle, siɛgi zu é lɛɛzu la koi ɠoozu ziɠigi zu. 
Zalaɠa ɠula nu nɔpɛ ge la poanza zeiɗa, ɓaa anzanui nii ti pilɛgai, kɛlɛ maanɛɛʋɛ ga é Izilayɛle anzalopoi ta zei, ɓaa zalaɠa ɠula nui taɠili ná-poanzai. 
Ta nà-nuɓusɛiti kala ga ti zeeɠaaɠwɛɛzu ɠwɛɛ ani ɲadegai ta ɲadetala gelei ʋa, naa ʋɛɛ nii ʋa kɔzɔai ta nii é la ɠɔzɔni. 
Ni kpɔɛ a leʋena, tiya ɠa ta ma lukpɔi ɠaaleʋe, ta tukpɔi ɠaaleʋe ga sɔlega, é zoloo nà-tɔgiti ma. Ta nà-fɛti voloiti so, eɠɛʋelei gè deveiti feeni la ta tɔgiti, ti dooɠo foloiti maaɲɛ. 
« ‹Zalaɠa ɠula nui mina maaɓuɠa pooma ʋa, é ʋa vɔɔɠu ba, a ʋa ɓɔɠɔ ɠɔzɔ, kɛni ni kɛɛɠɛ ʋe, ɓaa dee, ɓaa ná-doun zunui ta, ɓaa ná-doun anzanui ta, ɓaa kɛɛɠɛloin ta, ɓaa ná-seelai ta zɔi é la dɛ zeini zini bɛ. 
Naama su, kɛni é ɓɔɠɔ ɲadega ʋoluma, é folo lɔfela maaɓɔun, é ʋa leɠa ná-botii lɔɔzei. 
Voloi a liina la koi zaamaʋɛ, ada ɲadegai, toɠa ná-koto gba zalaɠai ɠula,› » Maliɠii Ɠɔoɠɔ GALAGI wooi ɠana. 
« ‹Ta poganii zɔlɔɔ, naama ʋoganii ɠa é ga ze nà ɓɔɠɔi. À mina pogani nɔpɛ fe ti ya Izilayɛle yooi zu, mazɔlɔɔ nà ɓɔɠɔi nà ɠɛ ga ta-ʋoganii. 
Ti-ɠɔnɔgi ɠa ɠɛ ga vebɛ zalaɠaiti, ta koto gba zalaɠa zuaiti, ta faazuɓɛtɛ zalaɠa zuaiti, ta nii nɔpɛ a makɛna nɔ̀un bɛ Izilayɛle nuiti zea, naa ɠa ɠɛ ga tɔnɔ. 
Zooi ʋaalɔnɔ mɔungiti kpein ma ʋagɔi ɠa ɠɛ ga zalaɠa ɠula nuiti tɔnɔ, tazeɠebaiti pɛ, taɠulaba la ba, naati pɛ ta ɠɛ ga zalaɠa ɠula nuiti tɔnɔ. Nuiti ta ɓulu vukɔi ma ʋagɔiti fe ti ya, naa ɠa a kɛ gè tuya loo ta-ʋɛlɛyeɠeiti bɛ. 
Kɛlɛ zalaɠa ɠula nuiti ti mina sua nɔpɛ mi, zɔi saai ɓɔɠɔ yeema, ɓaa baliʋaliai ga, é ɠɛni ga wɔnii ɓaa suai.› » 
