﻿Ezekiyɛle.
35.
Ɠɔoɠɔ GALAGI ɓɔɛni pɔ̀, é ɠɛ mà: 
«Ɗa ʋe, zunui, ɠaaʋote Seyiil ɠizei ma, GALA gooi wo daalɔɠɔma, 
è ɠɛ ma: ‹Maliɠii Ɠɔoɠɔ GALAGI wooi ɠaa: Nà wuzeɠezu è laalɔɠɔma, Edɔme, gè è ɠoloɠolo, gè è ɠɛ ga teʋebai. 
Nà ɗa-laaiti koloɠolo, ɗa-yooi pɛ ka ɠoloɠolo mɛtu, ɗa suɠwɛɛ naazu ga nà ɠa gè ga Ɠɔoɠɔ GALAGI. 
« ‹È ɠɛni Izilayɛle nuiti wɔinzeɠezu yeenɔpɛ, ta-ɠidaaʋili foloi zu, siɛgi zu ta-nu ʋaa vai zala yeei zeelini la, è ti lɔɔni kɔɔi ná-faa zuɠoloɠologi zu. 
Eɠɛʋelei gè vulua la ga ɠite, nà è zei ɲamai zu, ɲama ʋui ɠa ʋilɛ è ʋolu. Tɔɔzei è la ɠɛni inɛinɛni nu ʋaa vai ʋa, saai ɠa ʋilɛ è ʋolu,› » Maliɠii Ɠɔoɠɔ GALAGI wooi ɠana. 
« ‹Nà Edɔme yooi ɠoloɠolo, gè falibo, é ɠɛ ga teʋebai, gè naati suwuɠaaleʋe, zɔiti ta ɠɛ ziɛzu ná. 
Nà ɗa-ɠizeiti maalaave ga nu ʋoomai, zɔiti boɠa zɔkpɔi ti ʋaazu, naati ta loo ɗa-ɠize goiti ma, ɗa-nɛmɛiti su, ɗa-ʋɛtugiti su. 
Nà ɗa-yooi ɠɛ ga teʋebai eyɛsu ɠɔ, nu nɔpɛ ge la zeiɗa ɗa-laaiti su mɔnɔ. Wa suɠwɛɛ naazu ga nà ɠa gè ga Ɠɔoɠɔ GALAGI. 
« ‹Tɔɔzei è ɠɛni ma: Zii felegɔi tɛiti, Izilayɛle ta Zuda, ta ma you felegɔiti ɓalaa ta ɠɛ ga nɔ̀nɔ, nà ti zeɠezu ga nɔ̀nɔ, anɛɛ ni Ɠɔoɠɔ GALAGI ɠa zeini ná, 
naa ɠa é ba, eɠɛʋelei gè vulua la ga ɠite, nà è zosu ga ɗa-yiiɠaawanai ta ɗa-loloi ɠɛʋelei, nii è loni ma, è wuzeɠe ti laalɔɠɔma. Nà ɓɔɠɔ lɛ ga tiye ɗa-lukpɔɠaaleʋe ʋelei zu,› » Maliɠii Ɠɔoɠɔ GALAGI wooi ɠana. 
« ‹Ɗa suɠwɛɛ naazu ga nà, Ɠɔoɠɔ GALAGI, gè poomu gooiti pɛ mɛnini, niiti è ti woni Izilayɛle ɠizeiti ma, è ɗa ɠɛ ma: Ti ɠoloɠologa! Ti vea gi ya ga gi laamiizu. 
Wo wuzeɠeni ga waso kpɔɛiti dàalɔɠɔma, wo gaazumaanɛɛ ɓɔɛiti boni dàalɔɠɔma, nà ɓɔɠɔ ɠa gè ti mɛnini. 
« ‹Maliɠii Ɠɔoɠɔ GALAGI wooi ɠaa: Siɛgi zu zooi pɛ ge ɠɛɛzu la koozunɛɛi zu, nà è ɠoloɠolo niina. 
Tɔɔzei è ɠoozunɛɛni Izilayɛle ná-zooi ɠoloɠolo fai zu, nà è ɠɛɛzu ɠana nɔ. Ɗa ɠoloɠolo, Seyiil ɠizei, ta Edɔme ná pɛ. Ta suɠwɛɛ naazu ga nà ɠa gè ga Ɠɔoɠɔ GALAGI.› » 
