﻿Ezekiyɛle.
11.
Zɛnvui bùzeɠeni zooi ma, é li ga ze Ɠɔoɠɔ GALAGI zei ʋɛlɛi laaʋɛ folo ɠulazu ʋelei. Nu lɛɛzuʋɛ siɠidaʋɛ, gè zunu ʋuufelegɔ maazu lɔɔlugɔ (25) ɠaani. Gè nu felegɔ ɠwɛɛni ti zaama, ti ɠɛni ga nuɓusɛiti ta-ɠundiɠiiti, Azuul ná-doun zunui Yaazania, ta Ɓenaya ná-doun zunui Pelatiya. 
Ɠɔoɠɔ GALAGI ɠɛni mà: «Ɗa ʋe, zunui, zunuiti ka, ti faa ɲɔi ɠɛɛzu, ti ɗa tɛnɛ ɲɔiti bo taai tɛi su. 
Ti ɗa ɠɛ ma: ‹Eyɛsu yeeɠɛɠala zeeli, ade la dɛ pɛlɛa loga ʋɛ. Taa ɠɛɛʋɛ eɠɛ kɔlu liɠii, ade ɠɛ ʋuuni su eɠɛ suai.› 
Naa ɠa é ba, GALA gooi wo ti laalɔɠɔma, GALA gooi wo, ɗa ʋe, zunui!» 
Názu ɠa Ɠɔoɠɔ GALAGI ná-Zɛnvui ʋaani pɔ̀. É ɠɛ mà: «Ɗa ɠɛ ma: ‹Ɠɔoɠɔ GALAGI wooi ɠaa: Gè naa ɠwɛɛga, nii wo bosu, Izilayɛle nuiti! Kisiɛi é lɔɔzu wo-yiimaʋɛ, gè naa ɠwɛɛ. 
Wo nu ʋaai wola ɠɛa taai tɛi su, wo koi yɔɠɔzu ʋeleiti pɛ sulaavega ga nu ʋoomaiti. 
Naa ɠa é ba, Maliɠii Ɠɔoɠɔ GALAGI wooi ɠaa: Taai ɠɛa ga kɔlu liɠii, kɛlɛ suai ɠa ga niiti wo ti ʋaai. Kɛlɛ wɔun, nà wo ɓɛɛzu, wo ɠula ná ʋa. 
Wa luazu kɔɔi ʋa ɓaa? Tama, nà kɔɔi leʋesu wo ma,› Maliɠii Ɠɔoɠɔ GALAGI wooi ɠana. 
‹Nà wo ɓɛɛzu, wo ɠula taai ʋa, gè wo lɔ wɛɛinti zeezu, gè nà-tukpɔi loo wo ma. 
Nà wo lukpɔ Izilayɛle zooi ɠoozuʋɛ, wa za kɔɔi zu ga boɠa zɔkpɔi, wa suɠwɛɛ naazu ga nà ɠa gè ga Ɠɔoɠɔ GALAGI. 
Taai tɛi ge la ɠɛa wo ʋɛ ga kɔlu liɠii, wo ʋa ɠɛ ga suai é makɛsu su, kɛlɛ nà wo lukpɔzu Izilayɛle yooi ɠoozuʋɛ. 
Wa suɠwɛɛ naazu ga nà ɠa gè ga Ɠɔoɠɔ GALAGI, zɔi wo la ná-tɔgiti soni, wo la ziɛni ga ná-deveiti, tɔɔzei wo ziɛni nɔ ga zii ɠiligiti siɛ ʋelei, ti wo-maaɠoolii zu.› » 
Gè yɛni nɔ GALA gooi wosu, Ɓenaya ná-doun zunui Pelatiya za. Gè looni zooi ma, gè laaʋɛɛ, gè kpeei loo, gè ɠɛ ma: «Ee, Maliɠii Ɠɔoɠɔ GALAGI! Ɗa ɠa è Izilayɛle nui mɔtai ma zuwu ɠaaleʋezu!» 
Ɠɔoɠɔ GALAGI ɓɔɛni pɔ̀, é ɠɛ mà: 
«Ɗa ʋe, zunui, niiti ti ga è-ma ziiti, è-ɠɛɛlointi, ti ga ɗa-nuiti, Izilayɛle nuɓusɛi niiti pɛ ti ti ɠulaai zou ʋa, naati ka Zeluzalɛme taaʋeaiti ti ɠɛɛzu ti ma: ‹À yɛ ɠoozama, wo maaɠooza Ɠɔoɠɔ GALAGI ʋa, mazɔlɔɔ giya ɠa zooi tɛi feai gi ya ga gɔnɔ!› 
Naa ɠa é ba, ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Anɛɛ ni gè ti maaɠoozani, ti li zii ɠiligiti saama, gè ti vazani zou ɠiligiti su, kɛlɛ nà ɠɛɛzu ti zaama miná yeeɠɛɠalai tanigaa laawu eɠɛ ada ɲadegai naama yooiti su, ʋɛti ti náti.› 
Naa ɠa é ba, ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Nà wo ɠaalɛɛzu ba, wo ɠula nuɓusɛiti saama, gè wo zuzo, wo ɠula zooiti su wo vazagai ti zu, nà Izilayɛle yooi ve wo ʋɛ.› 
Ta ʋaana, ti zeɠe miná, ta kɔɔɠɔ gani kɔɔ vaiti pɛ seɠe ga, ta kɔzɔba vaiti pɛ. 
Nà wo pɛ wo ɓɔ ɠi gilagi ma, gè zɛnvu niinɛ ɠilagi ve wo pɛ zea. Wo-ɠigi kpaai eɠɛ kɔtui, gè naa ɠula wo ɠoozu, gè maavalibo ga faaɠaaɠaa ɠigi, 
naa ɠa a kɛ wo ziɛ ga nà-deveiti, wo woilo nà-tɔgiti ma, wo ti zo, wo ziɛ ga tiye, wo ɠɛ ga nà-nuɓusɛiti, gè ɠɛ ga wa-ƓALAGI. 
Kɛlɛ zɔiti ti-yii ɠatagai kɔɔɠɔ gani kɔɔ vaiti ba ta kɔzɔba vaiti, nà ti-ziɛ ʋelei ma ɠasɔi la ti unma,» Maliɠii Ɠɔoɠɔ GALAGI wooi ɠana. 
Seeluɓɛinti ti koʋegi lɔɔzeini, ma ɠɔɠɔ ɠiliɠiligiti ti ɗa lati ti ʋɔ, Izilayɛle ná-GALAGI ná-lɛbiyai é volozu, naa ɠɛni ti maazuʋɛ. 
Ɠɔoɠɔ GALAGI ná-lɛbiyai wuzeɠeni taa zaamaʋɛ, é li, é lo gizei maazu, é Zeluzalɛme folo ɠulazu ʋelei. 
Zɛnvui ʋuuni bù, é li ga ze Ɓaɓilɔne kula zou ʋa nuiti pɔ bɛ. Naa ɠɛɛni kulakɛlɛmai zu GALA Zɛnvui feeni. Kulakɛlɛmai gè kaani, naa zeɠeni pòlu niina. 
Nii kpein Ɠɔoɠɔ GALAGI dɛɛni ga ze, gè naati pɛ dɛɛni ga kula zou ʋa nuiti. 
