﻿Ezekiyɛle.
5.
«Ɗa ʋe, zunui, boɠa zɔkpɔ ɠaaligi ta zeɠe, è kɛ ga kpekai. Ɗɔungi wo da ta è-ɓɛlɛi. Naa ʋolu kiloi zeɠe, è ɗɔundeɠai ta è-ma leɠaiti kɔɠɔ ga, è seizei su, é mɔin. 
Siɛgi zu seikɛlɛsu vai ɓesu la, ɗa seizu su saʋa, gilazuʋɛ ɠala abui ɠa taa zaamaʋɛ. È gilazuʋɛ velesiɛi zeɠe, è yɛ doɠazu ga boɠa zɔkpɔi, è taai maalati da. È seizu ɠaaɓelagi zeɠe, è naa vaza fiilɛi zu, nɔ̀un nà ʋilɛ naa ʋolu ga nà-boɠa zɔkpɔi. 
Kɛlɛ tama, ɗa tago zeɠe ba, è pu ɗa-zeɠei la, è makɛ. 
Ɗa ta zeɠe naati ba, è pili abui ɠa, è gala abui ɠa. Abu ɠa ɠula su, nii a so Izilayɛle ʋɛlɛyeɠei pɛ ba.» 
Maliɠii Ɠɔoɠɔ GALAGI wooi ɠaa: «Naa ɠa é ʋaazu ɠɛɛzu ga Zeluzalɛme, taa wolai gè pilɛni ziiti saama, gè zou ɠiligiti kɛ maaɠoolii zu. 
Su nuɓusɛiti ti la ɠoloni tɔgiti bɛ ta deveiti gè ti veeni ti ya. Ti faa ɲɔi ɠɛɛni tɔun é leʋe ti ɠoba yooiti ta ti ɠoba nuɓusɛiti ba. Tɔun ti ɠɛlɛni nà-tɔgiti ba, ti ɠɛlɛ ga ti mina ziɛ ga nà-deveiti.» 
Naa ɠa é ba, Maliɠii Ɠɔoɠɔ GALAGI wooi ɠaa: «Tɔɔzei wo ɠɛa ga kololala nuiti, wo leʋe zii ɠiligiti ba ti wo-maaɠoolii zu, wo la ɠoloni nà-tɔgiti bɛ, wo la ziɛni ga nà-deveiti, wo luʋa ʋelei la zɔleni vɔlɔ ga wo-maaɠoolii ma nuɓusɛiti kɛʋele, 
naa maaʋele ma, Maliɠii Ɠɔoɠɔ GALAGI wooi ɠaa: Nà ɓalaagi nà wuzeɠezu wo laalɔɠɔma, Zeluzalɛme ʋeaiti. Nà nà-tukpɔɠaaleʋei ɠɛ wo zaama, taa zaamaʋɛ, zii ɠiligiti ti ka ga ɠaazuʋɛ. 
Nà faa ɠɛ wo laalɔɠɔma, nii gè la dɛ kɛɠala ɠɛɛni, ta gè la kɛɠala ɠɛa mɔnɔ pɛ, tɔɔzei wa-ɠɔzɔba vaiti ba. 
Taazuʋɛ, doun kɛɛɠɛiti ta ti-lointi mi, dointi ti ti-ɠɛɛni mi. Nà nà-tukpɔi laalɛ wo wu. Niiti ti yɛsu vulua wo zu, nà naati faza fiilɛi zu ná pɛ.» 
«Eɠɛʋelei gè vulua la ga ɠite, tɔɔzei wo sèizu ɲadegai ɠɔzɔa ga wa-ɠɔɔɠɔ gani kɔzɔɠɔzɔgiti ta wa-ɠɔzɔba vaiti, nà ɓalaagi, nà kpekai ziɛzu wo ma. Gè la wo ɠaazumaawɔinɠaa, gè la wo makɛga,» Maliɠii Ɠɔoɠɔ GALAGI wooi ɠana. 
«Taaʋeaiti seizu saʋagɔi ɠilazuʋɛ ɠa za ga ɗɔfɔ zeeɓɛi ɓaa pului taazuʋɛ, seizu velesiɛi za ga boɠa zɔkpɔi taai maaɠoolii zu, gè seizu zaʋasiɛi zuvaza fiilɛi zu ná pɛ, gè ʋilɛ ti ʋolu ga nà-boɠa zɔkpɔi. 
Nà yeeɓe nà-ziiɠaawanai ʋa, gè li ga nà-ziiɠulagi, gè zeeli la kwɛma, gè wanaɠula ti ʋa, názu ta suɠwɛɛ ga nà, Ɠɔoɠɔ GALAGI, nà ɠa kpɔ̀ɛai nà-toloi zu, gè li ga nà-ziiɠulagi, gè zeeli la kwɛma ti laalɔɠɔma. 
Zou ɠiligiti ti wo-maaɠoolii zu ta nuɓusɛiti pɛ ta ɠɛ leʋesu ná, ta ka ga gè Zeluzalɛme ɠɛa ga taai koloɠologai, ɓaaɠula ma mɛtu. 
Nà nà-tukpɔi laalɛ bu, ta ziiɠaawana wolai, gè kpɔlɔ ga zeliloma wolaiti. Nuɓusɛiti ti maaɠoolii zu, naati ta taa wolai tɛi kɛ ga ɲɛɛɠulasu anii, ta poomu ganii, é ɠɛ ti ʋɛ ɓalaa ga tɛnɛgi, ta maalua zaɓui. Nà ʋe, Ɠɔoɠɔ GALAGI, gè ɓɔɛzu. 
«Nà mɛɛn ɲɔi ʋilisu wo ma ga pului é ga saa gelei, wo-ma zuwu ɠaaleʋe vai ma. Nà pului naa yeeɠaaɓaa, gè wa-laamiani sɔlɔɔsuʋɛti ta makɛsuʋɛti pɛ su ɓale. 
Pului nà teʋe wo ma, ta sua ɲɔiti nà yeeɓe ti ʋa wo laalɔɠɔma, ta wo ʋaa. Ɗɔfɔ zeeɓɛi ta toomai, naa ʋɛɛ kɔɔi ʋa, naati ta wo ɠoloɠolo, gè boɠa zɔkpɔi leʋe wo laalɔɠɔma. Nà ʋe, Ɠɔoɠɔ GALAGI, gè ɓɔɛzu.» 
