﻿Gɔlɔ Wooiti.
3.
Nà ga zunui nii unfegi zeeliai ma Maliɠii ná-ziiɠaawana ɓakɔi ya. 
É liini ga ze, gè siɛi wo kpidii zu, wozakala su la de. 
Nà nɔ yeenɔpɛ nɔ é yeei ʋɛɛzu bà. 
É mà zuai vɔɔni su ta kɔ̀lɔgi, é mà ɠaeiti galeɠale. 
É koozuʋiligi ta kpɔlɔi latini mà eɠɛ siɠigi. 
É dɔ̀ɔni kpidii zu eɠɛ nuiti ti zaani kaite. 
É màalatini ga gè mina ɠula, é màavelevele ga yɔlɔɠɔiti, ti ɗa kàta. 
Gè ɓɔlɔa ga kpeei loa, gè kpɔbai ɠaiziɛ, é pele leʋeni nà-maanɛɛnɛ wooiti pɛ tuɠɔ. 
É pelei laaɠuluga tùɠɔ ga kɔtu ziɠigiti, é nà-peleiti seɠeni ma. 
É ɠɛni bɛ̀ ga filɛ zuai, é zei tùɠɔ, ɓaa zalai é ɓɔɠɔ maalɔɔɠuai. 
É sèɠea pelei ʋa, é bàliʋali, é fàlibo, é kɛ̀ ga zou vɔɔi. 
É ná-mɛɛin zumɛɛnga, é tete mà, ga é pili mà. 
É sàamaʋɛ zuvoloni ga ná-mɛɛinti pɛ. 
Nuɓusɛiti pɛ ta ɲɛɛɠulazu sù, ti ɗa dàalɔɔ guyei zu yeenɔpɛ. 
É kògi zulaave ga ani wanaiti, é ani wanai ɠɛɛni ga nà-kpɔɔle ɗɛi. 
É ɲìigaiti gaaɠaleni ga ɲaɠae numagai, é zuʋui ziɛ mà ɲɛgɛlɛin. 
É ziilɛigi ɠulaa zèa, gè yeema undaanɛɛi ma. 
Gè ɠɛni ma: «Kito ge la bɛ̀, kì ge la mɔ loni Ɠɔoɠɔ GALAGI ʋa!» 
Ee! Ɠizɛ nà-nimizai zu ta nà-kpɔlɔi, toɠa ga anivebɛi ta ani wanai gè ɓɔɔlezu la. 
Kì ka su, gè la yeema ma ɠɔ, toɠa lɔɔzu ga ze. 
Kɛlɛ wɛlɛ nii gè pɔ gè ɗa ɠisiɛ su zìimaʋɛ, wɛlɛ nà-kitogi ma ungi ʋa: 
Ɠɔoɠɔ GALAGI zu la ɓɔlɔa ga ná-wooɠɛɠiladai, kwɛ ge la ná-maawɔinɠai ʋa. 
Toɠa ɗa ti niinɛ sobu-o-sobu. Ee, Ɠɔoɠɔ GALAGI, ɗa-wooɠɛɠiladai wola wɔɔlɔʋɛ! 
Nà bosu, gè ɠɛ ma: «Ɠɔoɠɔ GALAGI ɠa ga nà-naavoloi, naa ɠa é kɛɛzu kìgi logai ba.» 
Ɠɔoɠɔ GALAGI laavegɛ ga nuɓɔɠɔlai naama nui ʋɛ nii é ɠitosu ba, ta zɔi é gaaʋotesu ma. 
Pagɛ nu maaɠɛ kpɔ, è Ɠɔoɠɔ GALAGI ná-unmɔɔ fai maaɓɔun. 
Pagɛ nui ma è yeezei faaɓaagiti bu è ma nu niinɛlai zu. 
È zei yɛ, è ɠaalɛi, mazɔlɔɔ naa ɠa deveai è ma. 
È maayei, è laa lɔ fufiligi zu, kito ka naa zu tanisu! 
È ɠomagi ve è woizuloɠa nui ya, è ɓɔɠɔ yɛ ná, ɓaaɠula è ma. 
Mazɔlɔɔ Maliɠii la ɗa ga nu ʋiliga ya é ʋa yɛsu ɠɔ. 
Kɛlɛ ni a nu ɠaazuɠili vai ɠɛɛna, toɠa maawɔinɠai ɠɛ, é zoloo ná-wooɠɛɠilada wolai ma. 
Mazɔlɔɔ ziima la de ga é ʋa nuɓusɛiti unfe, é ʋa ti ɓɔlɔ. 
Siɛgi zu ti ɠɔɠɔlosu da zooi zu ɠasoa nuiti pɛ ma, 
siɛgi zu ti lɛɠɛzu la GALA su, nii é Anii-Pɛ-Unda, ti kakama vai ɠɛ ga nuiti, 
siɛgi zu ti nui ta ná-tukpɔi maaʋesu da, Maliɠii la ɗa ga naa ɠaa ɓaa? 
Ɓɛ ɠa a wooi wona, su vaiti ta ɗa ɠɛ? Maliɠii laade é ʋa ɠɛ devei wosu ɓaa? 
GALA nii é Anii-Pɛ-Unda, naa laawooi laade fai pɛ ge ɠulazu su, maanɔɠɔi ta undaanɛɛi? 
Leeni vaa zu nuɓusɛi a kpee loo, tama é vulua? Ɛsɛ ge kpee loo ga ná-kotoiti faa. 
De ɠida de-ziɛ ʋeleiti bu, de ɠale ma, de ʋa Ɠɔoɠɔ GALAGI ʋɔ. 
Ade GALA fali ga yii pɛ, de yeeiti tɛ GALA pɔ pelei é geeɠɔlɔgi zu. 
Gi ɗa-lɔgiti koloɠoloni, gi ɓakani! Ɗa ma, è la ɠɛni gi zuvaayɛni! 
È ɓɔɠɔ maaɠilini ɗa-yiiɠaawanai zu, è ʋilɛni gi ʋolu, è gi ʋaa, è la gi maawɔinɠaani. 
È ɓɔɠɔ maalɔɔɠuni ga tonaɓiingi, gá-ƓALA fali wooiti ti ʋa zeeli è ma. 
È gi ɠɛɛni ga kaʋai, kaʋa luulaai nuɓusɛi zɔiti saama. 
Gi zili nuiti ta laalaosu gi laalɔɠɔma. 
Gɔnɔi yɛga duai ma ta gaazulatigi, ta faa zuɠoloɠologi, ta faaɓalakalagi. 
Gàazuɗɛiti ta ʋuuzu eɠɛ kɔtuɗɛiti nà-nuɓusɛiti ta-vaaɓalakalagi maaʋele ma. 
Gɔlɔɗɛi ɠa gàazuʋɛti, maaleʋe la ba, ti la looɠosu ɠɔ, 
eyɛsu Ɠɔoɠɔ GALAGI yɛ geezuʋɛ, é maayei, é wɛlɛ, é ka. 
Nii é zeelizu nà-taazu anzalopoiti ma, naa ʋɛtɛ fai ɠa kpɔ̀lɔzu gola. 
Ta pòlu, ti ɗa kpɛ̀ eɠɛ wɔni, ti ga sìli nuiti, un ge la ba. 
Ti mà vului lɔɔɠua zeɠezaɠai zu, ti kɔtu wolai la màazu. 
Ziɛi lɛɛni, é ɓudɛ nɔ̀ungi maazu, gè ɠɛni ɠɛɛzu: «Ùndaaʋiliga!» 
Ee, Ɠɔoɠɔ GALAGI, gè yɛni zeɠe ɓomaʋɛ, gè wooɠula è ma. 
È nà-kpee wooi mɛnini: «Mina woi zeɠe kpàla gooiti ma, ta nà-kidaaʋili kpeeiti!» 
Voloi gè wooɠulani la è ma, è maaɓuɠani bà, è ɠɛni mà: «Mina lua!» 
Maliɠii, è màavaawoga, è zɛ̀nvui unmɔɔga. 
Ɠɔoɠɔ GALAGI, è kakama vai ɠaa ti kɛai ga ze, nà-tukpɔi lo bɛ̀. 
È pɛtɛga ʋelei ti potokulai ɠɛɛzu la ze, ta ta-yaava vaiti pɛ dàalɔɠɔma. 
Ɠɔoɠɔ GALAGI, è ta-ʋoomu gooiti pɛ mɛnini, ta ta-yaava vaiti pɛ dàalɔɠɔma. 
Sìli nuiti ta-ɓɔɛzuɠulaiti ta ta-ɠisiɛiti, naa pɛ ka ɠɛɛzu dàalɔɠɔma foloi laawu ɲɛgɛlɛin. 
Ti ɠɛni zeini, ti ɠɛni loni, wɛlɛ, nà ɠa ti dàalɔɔzu ta-wuyeiti su. 
Ee, Ɠɔoɠɔ GALAGI, ti zo eɠɛʋelei ti kɛɛni la ga ze. 
Ɗa ti-yii zasa ti ɠoozu, naa ɠa a ɠɛ ga ɗa-voovooi ti ʋa. 
Ɗa ɗa-yiiɠaawanai ʋilɛ ti ʋolu, è ti-ma zuwu ɠaaleʋe eteai zu, ee, Ɠɔoɠɔ GALAGI! 
