﻿Zelemi.
47.
Wɛlɛ keela wooi ʋa GALA goo wo nui Zelemi sɔlɔɔni Ɠɔoɠɔ GALAGI ya, é lo Filisiti nuiti ba. Naa ɠɛɛni aisa Falaɠɔn ʋa laalɛ Gaza wu. 
«Ɠɔoɠɔ GALAGI wooi ɠaa: ‹Wɛlɛ ziɛiti ta ʋaazu wuzeɠezu lɛkpɛmaʋɛ nu ɠɔʋɛzu ʋele yooi zu, gaamago nɔ é ɠɛ ga kɔtuɗɛi é ve, é la zooi ma, é maaɓɔle, ta niiti ti gaaʋɛ, taaiti ta su nuɓusɛiti. Nuiti ti ɗa kpeei loo, ta zooi ɠaa nuɓusɛiti pɛ ti ɗa ɓain. 
Ta-zoo wolaiti polokagi lugi é ɠulazu zooi ma, ta ta-ɠɔɔɠɔ wotoloiti gooi, ta ti-ɠɔɠɔ lugiti. Doun kɛɛɠɛiti ti la ɓalazu ga ti-lointi, ta loni ná, ti-yeeiti su ɠɛai yɔɔɠɛ. 
Mazɔlɔɔ ma yee zeelia ga Filisiti nuiti pɛ ma zuwu ɠaaleʋe, niiti ti ga Tiil ta Sidɔn nuiti ta-ɓɔba nuiti, naati ti ɓeteʋe ti ʋa, fulu nu nɔpɛ ge la mɔ ná, nii a la zoo é ɓɔ ti ʋa. Mazɔlɔɔ Ɠɔoɠɔ GALAGI ɠa anii pɛ koloɠolosu Filisiti nuiti ta-yooi zu, nii dɔin é vulua Kafatɔɔl ziɛ zaama yooi zu. 
Gaza nɔungi ɓuyega, gɔlɔɗɛi ʋe, Asekalɔn ɠaalɛiɗa eɠɛ saa a loo. Wɔiti wo yɛgai nɛmɛi nii zu, wa yɛsu ɓɔɠɔ maazaɠazaɠazu eyɛsu yeelɛ? 
Wa ɠɛɛzu ma: Ee, Ɠɔoɠɔ GALAGI ná-boɠa zɔkpɔi ɠa looɠosu yeelɛ? Lɔ è ma laɠagi zu, è ɠaalɛi, è maaɠɛ kpɔ. 
Kɛlɛ toɠa zoo é looɠo ɠale? Ɠɔoɠɔ GALAGI deveʋɛ ga é li Asekalɔn ʋele ta kpoloɗɛi laa ʋelei fai ma ungi ɠana deveai ma ga é kɛ.› » 
