﻿Zelemi.
43.
Siɛgi zu Zelemi ɓeni la ga naama ɓɔɛiti pɛ bo nuɓusɛiti pɛ ma, nii Ɠɔoɠɔ GALAGI, ta-ƓALAGI boni ma ga é bo ti ma, 
Wosaya ná-doun zunui Azalia, ta Kaleya ná-doun zunui Yoɠanan, ta zɔɔma nuɓusɛiti ti ɠaazumaanɛai, ti ɠɛni Zelemi ma: «Zɛɛi ɠa è bosu! Ɠɔoɠɔ GALAGI, gá-ƓALAGI la è leʋeni ga è ɠɛ gi ma: ‹À mina li lɔɔɠuzu Ezipete yooi zu.› 
Neliya ná-doun zunui Ɓaluke ɠa é è wuzeɠezu gi laalɔɠɔma, nii nɔ a kɛ gi ve Ɓaɓilɔne nuiti zea, ti ʋa gi ʋaa, ɓaa ti li ga giye Ɓaɓilɔne yooi zu.» 
Kaleya ná-doun zunui Yoɠanan ta salaʋusu ɠundiɠiiti, ta nuɓusɛiti ti ɠɛni ná, ti la ɠɛni Ɠɔoɠɔ GALAGI wooi zoni ga, ti ʋa yɛ Zuda yooi zu. 
Naazu Kaleya ná-doun zunui Yoɠanan, ta salaʋusu ɠundiɠii zɔiti pɛ, ti nuɓusɛi mɔtai pɛ seɠeni Zuda, niiti kɔɔi ti ɓɛɛni, ti vaza zou ɠiligiti su, ti ʋaani ʋolu, ti zei Zuda yooi zu, 
zunuiti, ta anzanuiti, ta doungoiti, ta masagi ná-doun anzanuiti, ta nuɓusɛi pɛ niiti masagi makɛ nuiti ta-ɠundiɠii Neɓuzaladan ti yɛni Gedalia ya, Ayikame ná-doun zunui, Safan ná-dounloin, ta ɓalaa GALA goo wo nui Zelemi, ta Neliya ná-doun zunui Ɓaluke. 
Ti liini Ezipete yooi zu, mazɔlɔɔ ti la ɠɛni woiloni Ɠɔoɠɔ GALAGI wooi ma. Ti zeelini Taapanɛse. 
Ɠɔoɠɔ GALAGI ɓɔɛni Zelemi ʋɔ Taapanɛse, é ɠɛ ma: 
«Kɔtu wolai tanigaa zeɠe, è ti lɔ penɛ ʋɔlɔi wu, è ti lɔɔɠu seizei bosuʋɛ wu Zuda nuiti gaazu, nu lɛɛzuʋɛ Falaɠɔn ná-masa pɛlɛi wu Taapanɛse. 
Naa ʋolu, ɠɛ ti ma: ‹Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: Nà ʋaazu ga nà-botiɠɛ nui Neɓukadenɛzaal, Ɓaɓilɔne masagi. Nà ná-masa kpɔkpɔgi zeizu kɔtui tɛiti maazu, ti lɔɔɠuai ʋɛ. Toɠa ná-masa seɠe ʋɛlɛi zuvie ti maazu. 
Siɛgi zu a ʋaa la, toɠa Ezipete yooi zo, toɠa naati paa, niiti maanɛai ga ti za, é li ga naati duɔlai zu, niiti maanɛai ga ti li duɔlai zu, é naati paa ga boɠa zɔkpɔi, niiti maanɛai ga ti za ga boɠa zɔkpɔi. 
Nà abui lo Ezipete ɠalagiti ta-ʋɛlɛiti ba. Toɠa kɔɔɠɔ gani pɛlɛiti gala, ɓaa é li ga tiye duɔlai zu. Toɠa Ezipete yooi zu ɓukpunɛ, eɠɛʋelei baala makɛ nui a ɗa kpaviiti kula la ná-seɠei zu. Naa ʋolu, toɠa ɠula zooi naa ʋa, faaɓaa nɔpɛ ge la ɠɛa su. 
Toɠa sale ɠɔtuiti kpezeɠele Eliyopolise, é Ezipete ɠalagiti ta-ʋɛlɛiti koloɠolo ga abui.› » 
