﻿Zelemi.
38.
Sefatia, Matan ná-doun zunui, ta Gedalia, Pasuul ná-doun zunui, ta Yukal, Selemiya ná-doun zunui, ta Pasuul, Malikiya ná-doun zunui, naati ka ti wooi naati mɛnini Zelemi ɠɛni ti wosu nuɓusɛiti ma ga: 
«Ɠɔoɠɔ GALAGI wooi ɠaa: ‹Zɔi a yɛ niima laai tɛi su, toɠa za ga kɔɔi, ɓaa pului, ɓaa ɗɔfɔ zeeɓɛi. Kɛlɛ nu-o-nu a ɠula, é li, é ɓɔɠɔ ve Ɓaɓilɔne nuiti zea, naa yɛnvui ɠa yɛ zea, toɠa naa mu sɔlɔɔ ɓalaa.› 
Ɠɔoɠɔ GALAGI wooi ɠaa: ‹Taai nii ɠa veezu gaamazu Ɓaɓilɔne masagi ná-kɔɔɓɔgi ya, é so.› » 
Kundiɠiiti ti ɠɛni masagi ma: «Kɛni zunui tɛi ge za! Mazɔlɔɔ wooi nii é bosu, naa ɠa salaʋusuiti iɲɔteʋezu, niiti ti yɛgai taai tɛi su, naa ʋɛɛ nuɓusɛiti pɛ ba. Zunui tɛi la nuɓusɛi ná-undaanɛɛi ɠaiziɛzu, kɛlɛ kɛni ná-maanɔɠɔ vai.» 
Masagi Sedesiyase ti wooɠaaʋoteni, é ɠɛ ma: «Toɠa wo yeezu, mazɔlɔɔ masagi la zooga faa nɔpɛ kɛɛzu ni wa laade.» 
Ti Zelemi zoni, ti pili masagi ná-doun zunui Malikiya ná-kɔlɔyeɠei zu, nii é ɠɛni kaso ziɠigi zu. Ti Zelemi yeini su ga galuiti. Ziɛ la ɠɛni kɔlɔyeɠei zu, kɛlɛ palaʋalai ɠa é ɠɛni su. Zelemi ɓatani palaʋalai zu. 
Kɛlɛ Etiyopi zunui ɠɛni ná, daa ɠɛni ga Eɓɛde-Melɛke, é ɠɛni ga botiɠɛ nu wolai masagi ná-pɛlɛi wu, naa mɛnini ga ti Zelemi ʋilini kɔlɔyeɠei zu. Masagi ɠɛni zeizu Ɓɛnzamɛn Siɠidaʋɛ. 
Eɓɛde-Melɛke ɠulani masagi ná-pɛlɛi wu, é ɓɔɛ masagi ʋɔ ɠani: 
«Ee, màliɠii masagi, zunui tɛiti ti faa ɲɔu wola ɠɛɛʋɛ, ga nii ti kɛai ga Zelemi, GALA goo wo nui, ti pili fai zu kɔlɔyeɠei zu. Toɠa zaazu ná ga pului, tɔɔzei daamiani ge la mɔ taazuʋɛ.» 
Masagi niima levei veeni Eɓɛde-Melɛke ya, Etiyopi zunui, é ɠɛ ma: «Zunu ʋuusaʋagɔ (30) zeɠe ʋɛ, ti ɗa-levei zu, è GALA goo wo nui Zelemi ɠula kɔlɔyeɠei zu, aisa é ʋa za.» 
Eɓɛde-Melɛke liini ga zunui naati, ti lɛ masagi ná-pɛlɛi wu, pɛlɛ ɠoozu ʋɛlɛi ta wu, naavolo makɛ ʋɛlɛi wuʋɛ, é seɠe wɔlɔmaiti kulani ta seɠe zaɠaiti. Ti ti yeini Zelemi ma kɔlɔyeɠei zu ga galuiti. 
Eɓɛde-Melɛke, Etiyopi zunui ɠɛni Zelemi ma: «Seɠe wɔlɔmaiti ta seɠe zaɠaiti dɔ ɓeɠabuʋɛ, è galui la ti maazu.» Zekana Zelemi kɛɛni la. 
Zunui naati ti mɛɛnni ga galuiti, ti tɛ, ti kula kɔlɔyeɠei zu. Zelemi yɛni kaso ziɠigi zu. 
Masagi Sedesiyase nu leʋeni GALA goo wo nui Zelemi ma, ga é ʋa pɔ bɛ, nu lɛɛzuʋɛ zaʋasiɛi Ɠɔoɠɔ GALAGI zei ʋɛlɛi ma ɠoizuʋɛ. Masagi ɠɛni Zelemi ma: «Gè wɔinni gè gaazaɠa gila bo ga ɗe, mina faa nɔpɛ dɔɔɠu bà.» 
Zelemi Sedesiyase wooɠaaʋoteni, é ɠɛ ma: «Ni nà naa ɠulana kɛlɛma è ʋɛ, nii è maaɠaazaɠabosu ma, è la pàa ɓaa? Ni nà è lɛnɛna, è la woiloga, è la ziaa la!» 
Masagi Sedesiyase ɠonani Zelemi ʋɛ dɔɔɠuzu, é ɠɛ ma: «Gè ɠonaa Ɠɔoɠɔ GALAGI ma, nii é vulua, nii é zɛnvui veai ade ya, nà è yɛ vulua, gè la è lɔa naama zunuiti zeezu, niiti ti pɔ ga ti è ʋa.» 
Zelemi ɠɛni naazu Sedesiyase ma: «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Ni ɗa ɠulana, è li, è ɓɔɠɔ ve Ɓaɓilɔne masagi ná-kɔɔɠɔ ɠundiɠiiti zea, ɓɔɠɔ ʋɛ, è-yɛnvui ɠa ɠizo, taai tɛi ge la ɠala ga abui, ɗa zɛnvui wo, ɗa-o, ɗa-ʋɛlɛyeɠei-yo. 
Kɛlɛ ni ɗa ɠɛlɛna, è la ɓɔɠɔ veeni Ɓaɓilɔne masagi ná-kɔɔɠɔ ɠundiɠiiti zea, taai tɛi ka lɔɔzu Ɓaɓilɔne nuiti zeezu, ta galazu ga abui, ɗa ɓalaa è la ɠulaa ti ya pɛ.› » 
Masagi Sedesiyase ɠɛni Zelemi ma: «Nà luazu Zuda nuiti ba, niiti ti veai na Ɓaɓilɔne nuiti zea. Nà luazu ga gè mina lɔ ti yeezu, ti ʋa màanɔɠɔ.» 
Zelemi gooɠaaʋoteni, é ɠɛ ma: «Ɓa-o, nu la è lɔa ti yeezu. Woilo Ɠɔoɠɔ GALAGI wooi ma, nii gè bosu è ma, fai pɛ ka ɠɛ ga pagɔ, ɗa zɛnvui wo. 
Kɛlɛ ni ɗa ɠɛlɛna, è la ɓɔɠɔ veeni, wɛlɛ nii ɠa é ʋaazu ɠɛɛzu ga ɗe, Ɠɔoɠɔ GALAGI dɛai ga ze: 
Anzanuiti kpein ta yɛ masa pɛlɛi wu, ta li ga tiye Ɓaɓilɔne masagi ná-kɔɔɠɔ ɠundiɠiiti pɔ. Ta è laalɔ guye zu, ti ɗa ɠɛ ma: ‹È-wɔɔla ʋagɔiti ti balii laa è luɠɔ, wɛlɛ ɗa ʋa, è ɠɔa la. Siɛgi zu è-ɠɔɠɔiti ti ɠɛni lɔɔzu la palaʋalai ʋa, ti ɲɛɛlɛa.› 
«Ungo, ta li ga è-anzaiti ta è-lointi pɛ Ɓaɓilɔne nuiti pɔ. Ɗa ɓalaa è la ɠulaa ti ya, mazɔlɔɔ Ɓaɓilɔne masagi ɠa è zo, ta taai tɛi ka ɠala ga abui.» 
Sedesiyase ɠɛni Zelemi ma: «Nu nɔpɛ ge mina niima wooiti mɛni, ta è la zaa pɛ. 
Ni kundiɠi wolaiti ta mɛnina ga kpɔ̀ɛʋɛ è ʋɔ, ti ʋa, ti ɠɛ è ma: ‹Nii è bogai masagi ma, bo, suɠula lɛ gi ma, ta nii masagi bogai è ma, mina naa ta lɔɔɠu gi ʋa, gi la è ʋaazu,› 
ɗa ti wooɠaaʋote ga: ‹Gè ɠɛa masagi maanɛɛnɛzu ga é mina tèʋe ʋolu Zonatan ná-pɛlɛi wu, nà ʋa za ná.› » 
Kundiɠi wolaiti pɛ ti ʋaani ɠite Zelemi ʋɔ bɛ, ti gaazaɠa. É ti wooɠaaʋoteni eɠɛʋelei masagi tɛɛ ʋele lɛɛni la. Ti maaɠɛni kpɔ, ti zeɠe ná, mazɔlɔɔ nu nɔpɛ ge la ɠɛni ma vai zuɠwɛɛ. 
Zelemi yɛni kaso ziɠigi zu, eyɛsu Zeluzalɛme zo foloi. 
