﻿Zelemi.
37.
Ɓaɓilɔne masagi Neɓukadenɛzaal Zoziase ná-doun zunui Sedesiyase zeini ga masagi Zuda yooi unda. Sedesiyase ɠa é zeini Yeɠoyakime ná-doun zunui Konia ʋotogi zu. 
Kɛlɛ tɔun be-o, ná-botiɠɛ nua ʋe-o, ɓaa Zuda yooi zu nuɓusɛiti be-o, ti la ɠɛni woiloni tɛnɛ gooiti ma, Ɠɔoɠɔ GALAGI ti woni, GALA goo wo nui Zelemi daazeeli ti ma. 
Masagi Sedesiyase Yeɠukale leʋeni, Selemiya ná-doun zunui, ta zalaɠa ɠula nui Sofoni, Maaseya ná-doun zunui, ti li GALA goo wo nui Zelemi ʋɔ bɛ, ga ti ɠɛ ma: «Gi ʋaaʋɛ ga gi bo è ma ga, è Ɠɔoɠɔ GALAGI ada-ƓALAGI maanɛɛnɛ gi pɛ bɛ.» 
Naama ziɛgi zu, ti la ɠɛni dɛ Zelemi ʋilini kasoi ɠa. É ɠɛni lɛɛzu, é ɗa yei nuɓusɛiti saama, faa la ɠɛni ba. 
Naa ʋolu, Falaɠɔn ná-kɔɔɓɔgi zeɠeni Ezipete yooi zu. Ɓaɓilɔne nuiti ti Zeluzalɛme zeini kɛlɛ su, naa mɛnigai ma ti ʋɛ, ti lago maaɠoozani Zeluzalɛme ʋa. 
Ɠɔoɠɔ GALAGI ɓɔɛni GALA goo wo nui Zelemi ʋɔ, é ɠɛ ma: 
«Ɠɔoɠɔ GALAGI, Izilayɛle nà-GALAGI wooi ɠaa: ‹À li, wo bo Zuda masagi ma, é wo leʋegai gaazaɠagi ma ga: Falaɠɔn ná-kɔɔɓɔgi é ɠulani, é ɓɔ wo ʋa, toɠa na ɠale ma ná-zooi zu, Ezipete. 
Ɓaɓilɔne nuiti ta ʋaazu ʋolu, ti laalɛ taai tɛi bu, ta so, ti abui lo ba, é ɠala.› 
Ɠɔoɠɔ GALAGI wooi ɠaa: ‹À mina kisupu ɠɛ, wo ʋa ɠɛ ma: Ɓaɓilɔne nuiti ti lia ga ɠite. Mazɔlɔɔ ti la lia pɛ. 
Anɛɛ ni wa la vɔni Ɓaɓilɔne ɠɔɔɓɔgi pɛ ma, nui tanigaani nɔ ti yɛna, ti wɔai ga mɛɛin, ta la wuzeɠe ʋolu ti ɠilagilagi, ti zeɠe ta-zeɠe ɠotai wu, ti abui lo taai tɛi ba.› » 
Siɛgi zu Ɓaɓilɔne ɠɔɔɓɔgi lago maaɠoozani la Zeluzalɛme ʋa, ti ʋa lɔ Falaɠɔn ná-kɔɔɓɔgi yeezu, 
Zelemi ɠɛni pɔ ga é ɠula Zeluzalɛme ʋa, é li Ɓɛnzamɛn yooi zu, é ʋa nɔnɔ zɔlɔɔ pogani yooi zu nii gaa ɠɛni ɠwɛɛzu ná-nuiti saama. 
Siɛgi zu é zeelini la Ɓɛnzamɛn Siɠidaʋɛ, taa makɛ nuiti ta-ɠundiɠii ɠɛni ná, nii daa ɠɛni ga Yiliya, Selemiya ná-doun zunui, Ɠanania ná-dounloin. É GALA goo wo nui zoni, é ɠɛ ma: «Ɗa ɗa ɓɔɠɔ ve Ɓaɓilɔne nuiti zea!» 
Zelemi gooɠaaʋoteni, é ɠɛ ma: «Gaama la ga naa pɛ, gè la ɓɔɠɔ veezu Ɓaɓilɔne nuiti zea.» Kɛlɛ Yiliya la ɠɛni woiloni goo ma. É Zelemi zoni, é lii la ná-kundiɠiiti pɔ bɛ. 
Kundiɠii naati ti yiiɠaawanani Zelemi ma, ti doɠa, naa ʋolu ti pili kasoi ɠa zou zɛʋɛ ɠɛ nui Zonatan ná-pɛlɛi wu. Mazɔlɔɔ kaso ʋɛlɛi ɓɛtɛa ɠɛni de ná. 
Zelemi ʋili pele ɠana kasoi ɠa, é yɛni ná, é lɛbi ná gola. 
Masagi Sedesiyase keelai leʋeni, é li, é ʋaa la, é gaazaɠa dɔɔɠuzu, ná-masa pɛlɛi wu, é ɠɛ ma: «Woo ɠa ná nii Ɠɔoɠɔ GALAGI feai è ya?» Zelemi ɠɛni ma: «Ungo, toɠa ga nii, ɗa lɔɔzu Ɓaɓilɔne masagi yeezu.» 
Naa ʋolu Zelemi Sedesiyase ɠaazaɠani, é ɠɛ ma: «Leeni ɠa gè koto ɠɛai su è laalɔɠɔma, ɓaa ɗa-wotiɠɛ nuiti daalɔɠɔma, ɓaa niima nuɓusɛiti daalɔɠɔma, ga wo pìligai kasoi ɠa ma vaa zu? 
Mini ɠa wa-ƓALA goo wo nuiti ti ná, niiti ti ɠɛni ʋelela ʋele vai wosu wo ma, ga Ɓaɓilɔne masagi la ʋaa, é ʋa laalɛ wo wu, ɓaa niima yooi? 
Woilona mu, nà è maanɛɛnɛzu, ee, màliɠii masagi, nà-maanɛɛnɛ wooi zeeli è ma! Mina mɔ gàaɠale ma zou zɛʋɛ ɠɛ nui Zonatan ná-pɛlɛi wu, gè mina lia zaazu ná!» 
Naazu Masagi Sedesiyase devei veeni ga ti ɠaaɓa Zelemi ma kaso ziɠigi zu, folo-o-folo ti ɗa ɓulu zɔkpɔ ɠila fe zea, ɓulu loɠa nuiti ti kulazu pelei zu taazuʋɛ, eyɛsu ɓului ɓe mɛtu taazuʋɛ. Ʋele ɠana Zelemi yɛni da kaso ziɠigi zu. 
