﻿Zelemi.
36.
Zoziase ná-doun zunui Yeɠoyakime, Zuda masagi, ná-masadai ma ɠona naanisiɛi zu, Ɠɔoɠɔ GALAGI niima ɠeela wooi woni Zelemi ma ga: 
«Sɛʋɛ ɓiligi ta zeɠe, è wooiti kpein sɛʋɛ ma, niiti gè ti woni è ma, Izilayɛle masadai ma vai zu, ta Zuda masadai, ta zii ɠiligiti ta-masadaiti, é zo Zoziase ná-yeeɠɛɠalai ma, gè tɔɔzeiɗai ma ga ɓɔɛa è ʋɔ, eyɛsu za zeeli. 
Tanisu Zuda nuiti ta gaaɠa ga toɠa kìsu ga gè nimizai zei ti ma. Ni ti ɠilagilagi ta zeɠena ti-ziɛ ʋele ɲɔi ʋolu, naazu nà ta-vaaɠaazagiti suvaayɛ ta ta-ɠotoiti.» 
Zelemi Neliya ná-doun zunui Ɓaluke lolini deɠɛmu, é keela wooiti boni ma, nii é sɔlɔɔni Ɠɔoɠɔ GALAGI ya. Ɓaluke ti zɛʋɛni sɛʋɛ ɓiligi ma. 
Naa ʋolu Zelemi niima levei veeni Ɓaluke ya, é ɠɛ ma: «Ti kwɛ̀teʋeʋɛ ga gè mina li Ɠɔoɠɔ GALAGI zei ʋɛlɛi ma ɠoizuʋɛ. Gè la zooga nà ɓɔɠɔi gè ʋa li ná. 
Deɠɛmu li ɗa ɓɔɠɔi GALA sei ʋɛlɛi ma ɠoizuʋɛ, zu so foloi, è Ɠɔoɠɔ GALAGI ná-keela wooiti kala sɛʋɛ ɓiligi zu, nii gè feai è ya, è wooɠula la, è ti wo. Nuiti ta ɠɛ GALA sei ʋɛlɛi ma ɠoizuʋɛ, ti mɛni, ta naati kpein ta ʋa, ti zeɠe Zuda laa wolaiti su. 
Naazu tanisu, ta Ɠɔoɠɔ GALAGI maanɛɛnɛ vai lɔɔzei, ga é ti ɠaazumaalɔɔɠu, ta ɠɛlɛ niina ti-ziɛ ʋele ɲɔi ʋa. Mazɔlɔɔ Ɠɔoɠɔ GALAGI bogɛ ga gola yiiɠaawanaʋɛ, ziiɠulani niima nuɓusɛiti daalɔɠɔma.» 
Neliya ná-doun zunui Ɓaluke ziɛni ga deveiti pɛ, niiti GALA goo wo nui Zelemi ti woni ma. É liini GALA sei ʋɛlɛi ma ɠoizuʋɛ, é Ɠɔoɠɔ GALAGI ná-keela wooiti kala, nii é zɛʋɛni sɛʋɛ ɓiligi zu, é wooɠula la. 
Naama vaiti ti ɠɛni ɠɛɛzu Zoziase ná-doun zunui Yeɠoyakime, Zuda masagi, ná-masadai ma ɠona dɔɔlusiɛi, ma ɠonagi ma alu taaʋuusiɛi ma. Ti Zeluzalɛme nuɓusɛiti pɛ gaalɛɛni ba, ta Zuda laa wolaiti ma nuɓusɛiti pɛ, zu so gaalɛbai zu Ɠɔoɠɔ GALAGI ɠaazu. 
Ɓaluke Zelemi wooiti kalani sɛʋɛ ɓiligi zu, é wooɠula la, naama nuiti kpein gaazu niiti ti ɠɛni Ɠɔoɠɔ GALAGI zei ʋɛlɛi ma ɠoizuʋɛ. É ɠɛni loni pɛlɛi naa wu, nii é veeni Gemalia ya, Safan ná-doun zunui, nii ɠɛni ga zou zɛʋɛ ɠɛ nui. Naama ʋɛlɛi ɠɛni loni GALA sei ʋɛlɛi ma ɠoizuʋɛ yeemaazuʋɛ, Pɛlɛla Niinɛi ɠobaʋɛ. 
Siɛgi zu Gemalia ná-doun zunui Misé, nii é ga Safan ná-dounloin, wooiti kpein mɛni da, Ɠɔoɠɔ GALAGI ti woni sɛʋɛ ɓiligi naa zu, Ɓaluke kalani, 
é yeini masagi ná-pɛlɛi wu, é zeeli sɛʋɛ ɠɛ nui ná-botiɠɛ ʋɛlɛi wu. Nu wolaiti kpein ti ɠɛni gaalɛbai zu náʋɛ: zou zɛʋɛ ɠɛ nui Elisama ɠɛni ná, ta Delaya, Semaya ná-doun zunui, ta Ɛlɛnatan, Akaɓɔɔl ná-doun zunui, ta Gemalia, Safan ná-doun zunui, ta Sedesiyase, Ɠanania ná-doun zunui, é ɓɔ nu wolaiti pɛ ba. 
Misé naama wooiti kpein boni ti ma, nii é mɛnini, siɛgi zu Ɓaluke keela wooiti kalani da nuɓusɛiti bɛ, ti zɛʋɛni sɛʋɛ ɓiligi zu, é wooɠula la. 
Názu ɠa nu wolaiti ti Selemiya ná-dounloin, Kusi ná-dounloun loin, Netania ná-doun zunui Yeɠudi leʋeni la Ɓaluke ma, ti ɠɛ ma: «Sɛʋɛ ɓiligi zeɠe ya, nii è kalagai nuɓusɛiti gaazu, è ʋa ʋɛ.» Neliya ná-doun zunui Ɓaluke sɛʋɛ ɓiligi zeɠeni ya, é li ti ʋɔ bɛ. 
Ti ɠɛni ma: «Zei ʋɛ, è sɛʋɛ ɓiligi tɔna kala gi ʋɛ.» Ɓaluke kalani. 
Siɛgi zu ti naama wooiti pɛ mɛnini da, ti wɛlɛwɛlɛni ɓɔɠɔ ɠaazu, ti lua ti ɠilagilagi, ti ɠɛ Ɓaluke ma: «Kɛni gi niima wooiti pɛ dɛɛ ga masagi.» 
Naa ʋolu ti Ɓaluke ɠaazaɠani, ti ɠɛ ma: «Ɗa zoo nɛi è gaalɛɛ ga giye, ʋelei è nii kpein sɛʋɛai la? Zelemi ɠa é ɠɛni bosu è ma, è ɗa sɛʋɛ?» 
Ɓaluke ti wooɠaaʋoteni, é ɠɛ ma: «Zelemi ɠa é niima ɠeela wooiti boni mà. Nɔ̀un nà, gè ɗa ti zɛʋɛ ga sɛʋɛ ɗɛi sɛʋɛ ɓiligi nii ma.» 
Nu wolaiti ti ɠɛni Ɓaluke ma: «Li, è lɔɔɠu, wa Zelemi, nu nɔpɛ ge mina kwɛɛ ʋɛ wo liizu ná!» 
Naa ʋolu ti sɛʋɛ ɓiligi yɛni zou zɛʋɛ ɠɛ nui Elisama ná-botiɠɛ ʋɛlɛi wu, ti li masagi ná-koizuʋɛ, ti naa pɛ bo ma, nii siaai. 
Masagi Yeɠudi leʋeni naazu, ga é sɛʋɛi zeɠe, sɛʋɛ ɠɛ nui Elisama ná-botiɠɛ ʋɛlɛi wu. Yeɠudi ʋaani la, é ɗa kala ga woo wola masagi ɠaazu ta nu wolaiti ti ɠɛni ná ɠobaʋɛ. 
Tɛi é ɠɛni ga konagi ma alugi laaʋuusiɛi, masagi ɠɛni ná-pɛlɛi wu nii é ga sama gelei, é ɠɛni zeini, abui ɠaazogai aniɲakai zu kobaʋɛ. 
Yeɠudi a la ma ʋɛɛ su saʋagɔ ɓaa naanigɔ ɠalana, masagi ɓena naati teʋe ga, ga sɛʋɛ ɠɛ nui ná-boɠa goi, é ti ʋili abui ɠa. Zekana é yɛni kɛɛzu la, eyɛsu sɛʋɛ ɓiligi ɓe ga ɠala mɛtu. 
Masagi ta ná-nu wolaiti ti keela wooi naati gaaɠaani ga pagɔ, nii é zɛʋɛni sɛʋɛ ɓiligi ma, kɛlɛ é la ɠɛni ti maaluani, ti la ta-zeɠe ʋalini ga. 
Anɛɛ ni Ɛlɛnatan ta Delaya ta Gemalia ti masagi maanɛɛnɛni, ti ɠili ma, ga é mina sɛʋɛ ɓiligi ɠala, kɛlɛ masagi la ɠɛni woiloni ti-woo ma. 
Kɛlɛ tɔun masagi devei veeni kundiɠii Yelameyɛle ya, ta Azaliyɛle ná-doun zunui Selaya, ta Aɓadeyɛle ná-doun zunui Selemiya, ga ti sɛʋɛ ɠɛ nui Ɓaluke zo, ta GALA goo wo nui Zelemi. Kɛlɛ Ɠɔoɠɔ GALAGI Ɓaluke ta Zelemini maalɔɔɠuni. 
Masagi sɛʋɛ ɓiligi ɠalaai ma, nii keela wooi kpein ge ɠɛni su, Zelemi boni Ɓaluke ma, é ɗa sɛʋɛ, Ɠɔoɠɔ GALAGI ɓɔɛni Zelemi ʋɔ, é ɠɛ ma: 
«Sɛʋɛ ɓiligi taɠili seɠe, è wooiti pɛ sɛʋɛ su, niiti ti ɠɛni sɛʋɛ ɓiligi ma mɔungi zu, nii Zuda masagi Yeɠoyakime galani. 
Ɗa nii wo Zuda masagi Yeɠoyakime ma: ‹Ɠɔoɠɔ GALAGI wooi ɠaa: È naama zɛʋɛ ɓiligi ɠalani, è ɗa ɠɛ ma: Leeni vaa zu è sɛʋɛai su ga Ɓaɓilɔne masagi ɠa ʋaazu, é zooi tɛi koloɠolo, é nuiti suwuɠaaleʋe ta suaiti? 
Naa ɠa é ba, Ɠɔoɠɔ GALAGI wooi ɠaa: Zuda masagi Yeɠoyakime mavofodai taɠila kpalaa ge la zeiɗa ga masa tɔun poluma, Davide ná-masa kpɔkpɔgi ɠa. Ma ʋoomai ɠa yɛ eteaʋɛ foloi ma liegi ɠa, ta kɔɔlɛi zu kpidii a ʋɛɛna. 
Nà wuzeɠezu daalɔɠɔma, ta mavofodaiti, ta ná-nu wolaiti. Nà ta-vaaɠaazagiti sala ti ma. Nimiza vaiti kpein gè ti ma vaa woni, ti la ti zeɠeni ga zɛbɛ, naati ta zei ti ma, ta Zeluzalɛme nuiti, ta Zuda nuiti.› » 
Zelemi sɛʋɛ ɓiligi taɠili seɠeni, é so Neliya ná-doun zunui Ɓaluke ya, sɛʋɛ ɠɛ nui. Naa ma ge naa zɛʋɛni su, nii Zelemi ɠɛni bosu ma, ga wooiti kpein niiti ti ɠɛni sɛʋɛ ɓili mɔungi zu, nii Zuda masagi Yeɠoyakime galani. É woo mɔinmɔin kiligaa ʋɛɛni ba, ga naa ɠɛɠalaiti. 
