﻿Zelemi.
29.
GALA goo wo nui Zelemi yɛni Zeluzalɛme, é sɛʋɛi leʋe kɛwolaiti ma, ta zalaɠa ɠula nuiti, ta GALA goo wo nuiti, ta nuɓusɛiti pɛ ma, niiti Neɓukadenɛzaal ti zeɠeni Zeluzalɛme, é li ga tiye Ɓaɓilɔne. 
Sɛʋɛi liini, masagi Yekoniani seɠea ʋoluma Zeluzalɛme, ta masa mama wolai, ta ná-botiɠɛ nu wolaiti, naa ʋɛɛ Zuda ɠundiɠiiti ba, ta Zeluzalɛme geleiti, ta ɲɛɛliɠi nuiti, naa ʋɛɛ ɠain bo nuiti ba. 
É feeni Safan ná-doun zunui Eleyasa ya, ta Yilikiya ná-doun zunui Gemalia, tɔɔzei Zuda masagi Sedesiyase ti leʋeni Ɓaɓilɔne masagi Neɓukadenɛzaal ma. Ʋele ɠa é zɛʋɛni la: 
«Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa, é wosu duɔiti pɛ ma, gè ti zeɠeai Zeluzalɛme, gè li ga tiye Ɓaɓilɔne: 
‹À pɛlɛiti to, wo lɛ ti wu, wo kpeleiti da, wo ma waaiti mi. 
À vului ɠɛ, wo doun zunuiti ta doun anzanuiti sɔlɔɔ, à wo-loun zunuiti ta wo-loun anzanuiti sei pɛlɛla, ti dointi sɔlɔɔ. Wo mɔin ná ɠana, wo maa mina lɔi pa. 
À taai naa ná-undaanɛɛi ɠaiziɛ, ʋɛ Ɠɔoɠɔ GALAGI liai ga woye ná, wo maanɛɛnɛi wo bɛ, mazɔlɔɔ a ɠɛna lia luɠɔma, wa ɓalaa wa li luɠɔma.› 
«Mazɔlɔɔ Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹À mina va bu GALA goo wo nua ti ʋa wo yaava, niiti ti zeini wo zaama, ɓaa nui niiti ti ʋelela ʋele vaiti bosu. À mina woilo naati goo ma niiti ti wa-zegiti poluwosu wo ma. 
Mazɔlɔɔ ta kɛɛzu eɠɛ ta ɠɛ dàawoo laazeelizu wo ma, gaama la naa zu, gè la ti leʋeni ɲɛgɛlɛin,› Ɠɔoɠɔ GALAGI wooi ɠana. 
«Kɛlɛ Ɠɔoɠɔ GALAGI wooi ɠaa: ‹Ɓaɓilɔne ná-kona ʋuulɔfelaiti (70) ta ɓena nɔ feya, nà wo maalobo niina, goo ʋagɔiti gè ti woga wo letema, gè naati daazeeli, gè wo ɠaaɠale ma niima adaʋɛ tɛi. 
Nɔ̀un gè kwɛni faazeikpasui nii gè kɛai wo ma vaa ma,› Ɠɔoɠɔ GALAGI wooi ɠana. ‹Dituɠɔma zeikpasui ʋe, é la ga maanɔɠɔ vaa. Nà wo-luɠɔ ɓɛtɛzu, daavegai ga kitogi. 
Názu wa ʋa, wo wooɠula mà, wo wa-maanɛɛnɛ wooiti daazeeli mà, ta nà wo wooɠaaʋote. 
Wa gàiziɛ, tama wa kà, mazɔlɔɔ wa gàiziɛ ga yii pɛ. 
Nà ɓɔɠɔ yɛ ná, wo kà,› Ɠɔoɠɔ GALAGI wooi ɠana. ‹Nà ʋa ʋolu ga wa-luɔiti. Nà wo ɠaalɛ ba, wo ɠula zooiti pɛ su, ta adaʋɛti pɛ gè wo ɓɛɛni, wo li náti,› Ɠɔoɠɔ GALAGI wooi ɠana. ‹Nà ʋa ga woye ʋolu adaʋɛ tɛi, ʋɛ gè wo zeɠeni ná.› 
«Anɛɛ naa ʋe, wa ɠɛɛzu ma: ‹Ɠɔoɠɔ GALAGI GALA goo wo nuiti feeni gi ya Ɓaɓilɔne.› 
«Ɠɔoɠɔ GALAGI wooi ɠaa masagi ma, é zeini Davide ná-masa kpɔkpɔgi ɠa, ta nuɓusɛiti pɛ ti vulua Zeluzalɛme taai tɛi su, wo-ɠɛɛleaiti ti la yɛni wo ʋa, wo ʋa li duɔlai zu: 
‹Ɠɔoɠɔ GALAGI, Fai-Pɛ-Maliɠii wooi ɠaa: Wɛlɛ, nà kɔɔi leʋesu ti laalɔɠɔma, ta pului, ta ɗɔfɔ zeeɓɛi, nà ti ɠɛ ga kooleɠoole gwaa luulai ɠɛʋele, ɲɔuɗai gola, é la zooga é ʋa mi. 
Nà ʋilɛ ti ʋolu ga kɔɔi, ta pului, ta ɗɔfɔ zeeɓɛi, gè ti ɠɛ ga anii eteai pɛ ga lua ba, ti ɠɛ ga foovoo anii, ta laavɔ anii, ti ɗa ɲɛɛɠula ti zu, ti ɓaaɠula ti ma ziiti pɛ saama, ʋɛ gè ti ɓɛɛzu, ti li ná. 
Tɔɔzei ti la woiloni gòoi ma,› Ɠɔoɠɔ GALAGI wooi ɠana, ‹siɛgi zu gè nà-botiɠɛ nuiti teʋeni la ti ma, GALA goo wo nuiti, gè la ɓɔlɔni ga ti leʋe fai. Ɓa-o! Kɛlɛ wo la ɠɛni woiloni ti-woo ma,› Ɠɔoɠɔ GALAGI wooi ɠana. 
« ‹Kɛlɛ wo pɛ, à woilo Ɠɔoɠɔ GALAGI laawooi ma, wɔiti wo zogai, gè wo zeɠe Zeluzalɛme, gè li ga woye Ɓaɓilɔne! 
« ‹Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa, é ʋilɛ Akaɓe ʋa, Kolaya ná-doun zunui, ta Sedesiyase, Maaseya ná-doun zunui, ti zɛɛ ʋelela ʋele vaiti bosu dàaseigi zu: Wɛlɛ, nà ti lɔɔzu Ɓaɓilɔne masagi Neɓukadenɛzaal yeezu, toɠa ti ma vaa ɠaaɓela wo pɛ wo ɠaazu. 
Zuda nuiti kpein ti liai ga tiye Ɓaɓilɔne yooi zu, eyɛsu pɛ, ta ɠɛ zunu felegɔi niiti daaseigi wosu ta ɠɛna foovooi loa, ti ɗa ɠɛ ma: Ɠɔoɠɔ GALAGI è zo ga Sedesiyase ta Akaɓe ɠɛʋele, niiti Ɓaɓilɔne masagi ti ɠeeni abui ɠa! 
Naa ɠa ɠɛ ga tiye mazɔlɔɔ ti tɔɠɔ ɠoloɠolo faa ɠɛɛʋɛ Izilayɛle yooi zu, ti ɓɔɠɔ lɔ wɛɛnziɛgi zu ta ti-zeiɲɔɠɔiti ti-anzaiti, ti ɗa zɛɛi wo dàaseigi zu, tama gè la ma leve veeni ti ya. Gè suɠwɛɛ, nà ga ma zeele,› Ɠɔoɠɔ GALAGI wooi ɠana.» 
«Ɗa ɠɛ Neyelame nui Semaya ma: 
‹Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: È sɛʋɛi leʋega ɗa ɓɔɠɔi è-laaseigi zu Zeluzalɛme nuɓusɛiti pɛ ma, ta zalaɠa ɠula nui Maaseya ná-doun zunu Sofoni ma, ta zalaɠa ɠula nuiti pɛ ma, sɛʋɛai ɠani: 
Tɔɔzei Ɠɔoɠɔ GALAGI è zeiʋɛ ga zalaɠa ɠula nui, zalaɠa ɠula nui Yeɠoyada ʋotogi zu, è maanɛɛʋɛ ga è wɛlɛ Ɠɔoɠɔ GALAGI zei ʋɛlɛi wu nuiti kpein ma, ti ɠakagɛ, ta ti ɠɛ ta ga GALA goo wo nu, è yɔlɔɠɔi ʋu ti ʋa, ta kɔlui. 
Leeni vaa zu è la wuzeɠeni Anatɔte nui Zelemi laalɔɠɔma, é ɓɔɠɔ ɠɛɛzu ga GALA goo wo nu wo zaama? 
É sɛʋɛ leʋega gi ma vɔlɔ ʋɛ Ɓaɓilɔne. Naama zɛʋɛi zu wooi ɠaa: Wa dɛ lɛbisu miná duɔlai zu. Naa ɠa é ba, à pɛlɛa lo, wo ɗa ɲi ti wu. À kpelea leʋe, wo ɗa ti-ʋaalɔnɔgiti mi.› » 
Kɛlɛ zalaɠa ɠula nui Sofoni naama zɛʋɛi ɠalani GALA goo wo nui Zelemi ɠaazu. 
Ɠɔoɠɔ GALAGI zɛba é ɓɔɛ Zelemi ʋɔ, é ɠɛ ma: 
«Keela wooi nii leʋe naati pɛ ma ti duɔlai zu: ‹Ɠɔoɠɔ GALAGI wooi ɠaa é ʋilɛ Neyelame nui Semaya ʋa: É GALA gooi wogɛ wo ma dàaseigi zu, kɛlɛ nà lɛi gè ʋa teʋe, é kɛa wo laa zɛɛ ɓɔɛiti da. 
Naa ma ka é ba, Ɠɔoɠɔ GALAGI wooi ɠaa: Nà wuzeɠezu Semaya ta mavofodaiti pɛ daalɔɠɔma, mavofodai ɠila kpalaa ge la ɠaazulaa undaanɛɛi naa ma, nii gè ʋaazu kɛɛzu nà-nuɓusɛiti bɛ. Mazɔlɔɔ é nà-nuɓusɛiti diiʋɛ kpakagi ma dàalɔɠɔma, Ɠɔoɠɔ GALAGI wooi ɠana.› » 
