﻿Zelemi.
24.
Ɠɔoɠɔ GALAGI kpɔlɔ felegɔ lɛɛni ga ze, kooleɠoole gwaai ti zu, ti zeini GALA sei ʋɛlɛi laaʋɛ. Naa ɠɛɛni masagi Neɓukadenɛzaal liai ma ga Zuda masagi Yekonia, Yeɠoyakime ná-doun zunui, ta ɓɔga masadai ma ɠundiɠiiti, ta ɲɛɛliɠi nuiti, ta ɠain bo nuiti, ti zeɠe Zeluzalɛme, ti li Ɓaɓilɔne yooi zu. 
Kpɔlɔgi gilagi, kooleɠoole gwaa ʋapa golai ɠa é ɠɛni naa zu, eɠɛ ma waai ma mɔungiti. Kooleɠoole gwaai é ɠɛni kpɔlɔgi velesiɛi zu, naa ɲɔuni ga gola, nu la ɓena zoo miizu ná-ɲɔi maaʋele ma. 
Ɠɔoɠɔ GALAGI gàazaɠani, é ɠɛ mà: «Leeni ɠa è kaazu, Zelemi?» Gè gooɠaaʋoteni ga: «Kooleɠoole gwaaiti be. Tanigaani pagɛ gola, zɔiti ti ɲɔu gola, ti la zooga miizu.» 
Ɠɔoɠɔ GALAGI ɓɔɛni pɔ̀, é ɠɛ mà: 
«Ɠɔoɠɔ GALAGI, Izilayɛle ná-GALAGI wooi ɠaa: ‹Nɛɛʋɛ nu ʋɛ ga é ɠaazu ʋagɔi lo kooleɠoole gwaa ʋagɔiti ba. Zekana é la, Zuda nuiti gè ti ɓɛai, ti li duɔlai zu Ɓaɓilɔne yooi zu, nɛɛʋɛ bɛ̀, gè ɠaazu ʋagɔi lo ti ʋa. 
Nà ɠaazu ʋagɔi lo ti ʋa, gè ʋa ʋolu ga tiye niima yooi zu. Gè la mɔ pɔ gè ʋa ti wolo, kɛlɛ gè ti zei ʋele ɓɛtɛ ʋolu, ti lɔɔɠula vaa laade mɔnɔ, kɛlɛ gè ti zin ʋolu. 
Nà ma zobogi ve ti ʋɛ, ti kwɛɛ ʋolu ga nà ga Ɠɔoɠɔ GALAGI. Ta ʋa ʋolu pɔ̀ ga ti-yii pɛ. Naazu ta ɠɛ ga nà-nuɓusɛiti, nà ɠɛ ga ta-ƓALAGI.› 
«Kɛlɛ wɛlɛ nii gè bosu Zuda masagi Sedesiyase ná-faa zu, ta ná-kundiɠi wolaiti, ta nuɓusɛi mɔtaiti ti yɛsu Zeluzalɛme, niiti kpein ti la zeɠeni zooi zu, ta niiti ɓalaa ti lia, ti zei ʋele ɓɛtɛ Ezipete yooi zu. Nà ti zo, eɠɛʋelei nu a ɗa kooleɠoole gwaai ma ɲɔi zo da, ɲɔuɗai gola, é la zooga miizu. 
Zekana eteai ma masadaiti pɛ koozu ɠa ʋili ga tiye, ta ɠɛna ti ɠaa. Ʋɛ pɛ nà ti ɓɛ, ti vaza ná, ta ɠɛ ga poogi, siɛgi zu nu pɔ é poomu pili da, ɓaa é ɲɛɛɠulasu vaa wo, ɓaa é guye ɲɔi loo, ɓaa é ɗa koto loo. 
Nà kɔɔi leʋe ti ma, ta pulu wolai, ta ɗɔfɔ zeeɓɛi, eyɛsu ti ɲɛɛlɛ zooi ɠa nii gè feeni ti ʋɛ, ti-mɛmɛwolani zea ta tiya ɓɔɠɔi.» 
