﻿Zelemi.
23.
«Maanɔɠɔ ɠa baala makɛ nu ɲɔiti bɛ, niiti ti nà-baala kpulugi loozu ya, ta ti ɗa ti zuvaza,» Ɠɔoɠɔ GALAGI wooi ɠana. 
Naa ɠa é ba, Ɠɔoɠɔ GALAGI, Izilayɛle ná-GALAGI wooi ɠaa é ʋilɛ baala makɛ nuiti ba: «Wo nà-baalagiti zɛni ná, ti ɠaka, ti zuvaza. Wo la ti laazɔboni. Nà wo zalazu é zoloo wo-ziɛ ʋele ɲɔiti ma,» Ɠɔoɠɔ GALAGI wooi ɠana. 
«Nà ɓɔɠɔi nà nà-baalagi mɔtaiti gaalɛ ba, ti ɠula zooi pɛ su, ʋɛti gè ti zuvazani, ti li náti. Nà ʋa ga tiye, gè ti ʋu ta-zasai zu, ta ɓuɠu ná, ti mɔin. 
Nà ti makɛ nu ɠiteiti seizu ti unda, ta ti makɛ eɠɛ baala makɛ nuiti, ti la mɔ luaa, ti zasu la ɓalia. Taɠila kpalaa ge la loa ya,» Ɠɔoɠɔ GALAGI wooi ɠana. 
«Foloi tanigaa ta ʋaazu, naama voloi, nà Davide ma ʋɔnɔgi ta wuzeɠe nii telebogai, toɠa ɠɛ ga masagi ɠigi ma, toɠa sɔle fai ta telebodai ɠɛ zooi zu,» Ɠɔoɠɔ GALAGI wooi ɠana. 
«Naama yeeɠɛɠalai, Zuda nuiti ta ɠizo, Izilayɛle zei ziilɛigi zu. Wɛlɛ daaseigi ʋa a loli da: ‹Ɠɔoɠɔ GALAGI ɠa é ga ada-lelebodai›.» 
«Naa ɠa é ba, foloi tanigaa ta ʋaazu, voloi nu la mɔ ɠona ga: ‹Gè ɠonaa Ɠɔoɠɔ GALAGI ma, nii é vulua, nii é Izilayɛle nuiti kulani Ezipete yooi ʋa!› » Ɠɔoɠɔ GALAGI wooi ɠana. 
«Kɛlɛ kɛni nɔ ti ɗa ɠɛ ma: ‹Gè ɠonaa Ɠɔoɠɔ GALAGI ma, nii é vulua, nii é Izilayɛle mavofodai ɠulani lɛkpɛmaʋɛ nu ɠɔʋɛzu ʋele yooi ʋa, ta zooi pɛ ba, ʋɛti é ti ɓɛɛni, ti vaza náti!› Ta ʋa, ti zei ʋolu ta-yooi zu, ti ta-eteai ziɛ.» 
GALA goo wo nuiti tetemazu, zìi ɠoloɠologa kòozu, sàsu ɠa ɓalizu kɔ̀lɔgi zu. Gè ɠɛa eɠɛ dɔɔzo nui, eɠɛ nui dɔɔi koloɠologai, Ɠɔoɠɔ GALAGI maaʋele ma, ta daawooiti maaʋele ma. 
Zooi zulaavega ga nuɓusɛiti ti wɛɛnziɛgi wosu. Ti pɛ ta ɓizɛzu ga lia faa ɲɔi ʋɔ pelei, ti yiilɔɔʋɛ gola telebotalai zu. Foovooiti maaʋele ma, zooi pɛ ka gɔlɔɗɛi laawu, toganiiti daamiizu lufa lɛnugi pɛ ge vɔa zooi zu. 
«GALA goo wo nuiti ta zalaɠa ɠula nuiti ti ɠɛa ga GALA gaazuluabalala nuiti, anɛɛ nà-pɛlɛi wu, gè ta-nu ɲɔulai ɠaani ná,» Ɠɔoɠɔ GALAGI wooi ɠana. 
«Naa ɠa é ba, ta-ʋelei zu ɠa ɲasu zuɓidi, ta ʋaazu ɓunɛsu, ti loo. Mazɔlɔɔ nà ʋaazu ga maanɔɠɔi ti ʋɔ, konagi gè wuzeɠezu la ti laalɔɠɔma,» Ɠɔoɠɔ GALAGI wooi ɠana. 
«Gè faa ɲɔiti kaani Samali GALA goo wo nuiti zea, ti ɠɛni ɓɔɛzu galagi Ɓaale laaseigi zu, ti nà-nuɓusɛiti kakani, Izilayɛle nuiti. 
Kɛlɛ nii gè kaani Zeluzalɛme GALA goo wo nuiti pɔ bɛ, toɠa ga tɔɠɔ ɠoloɠologi: Ta wɛɛnziɛgi wosu, ti ɗa ta-eteai ziɛ zɛɛi zu, ti ɗa faa ɲɔu ɠɛ nuiti maamusɛ. Ta pele leʋezu ɛsɛ tuɠɔ ga ti mina ɓe faa ɲɔi ʋa. Ti pɛ ta gàazu eɠɛ Sɔdɔme nuiti, Zeluzalɛme nuiti ti la vizɔni Gomɔɔl nuiti ba.» 
Ɠɔoɠɔ GALAGI, Fai-Pɛ-Maliɠii wooi ɠaa GALA goo wo nuiti ta-vaa zu: «Nà ti ɠɔnɔgi ɠɛɛzu ga siinziin gani wanaiti, nà anivebɛ ɗɛi losu ti-la, mazɔlɔɔ Zeluzalɛme GALA goo wo nuiti ka kɔzɔba vai vazagai la zooi pɛ su.» 
Ɠɔoɠɔ GALAGI, Fai-Pɛ-Maliɠii wooi ɠaa: «À mina woilo naa ma, nii GALA goo wo nuiti ti bosu. Ta ʋɛɛzu wo-yii ɠa ga zɛɛ ɠitogi, mazɔlɔɔ nii ti suɠulazu wo ma, tiya ɓɔɠɔi ta-ɠulakɛlɛma vaa ɓɛtɛai ɠa ga naa, kɛlɛ é la ga nii kulaai Ɠɔoɠɔ GALAGI laaʋɛ. 
Ta ɗa ɠɛ naati ma, niiti ti ɲɛɛɠulazu wooi zu nii gè bosu: ‹Ɠɔoɠɔ GALAGI ɠɛni ma: Wa ziilɛigi zɔlɔɔ.› Niiti kpein ti ziɛzu ga ti-yiimai, ta ɠɛɛzu naati ma: ‹Maanɔɠɔ la zeelia wo ma pɛ!› » 
Ɓɛ ɠa deɠɛmu é ɠɛni Ɠɔoɠɔ GALAGI ná-gaalɛbai zu? Ɓɛ ɠa é kaani, é daawooi mɛni? Ɓɛ ɠa é ɠidaazu daawooi wu? Ɓɛ ɠa é goomɛnini? 
Wɛlɛ fiilɛ wolai ɠa wuzeɠezu, tokoleʋeai Ɠɔoɠɔ GALAGI ʋɛ, ná-ziiɠulagi lokoleʋe, é ɠɛ ga sabala golai, é ʋu naati unmaʋɛ, niiti ti faa ɲɔi ɠɛɛzu. 
Ɠɔoɠɔ GALAGI ná-ziiɠaawanai la zeɠea ade maala pɛ, eyɛsu é naa ɠɛ, é daazeeli, nii kpein é deveai yiimaʋɛ. Foloi ta, wa naa ɠaaɠa. 
Ɠɔoɠɔ GALAGI ɠɛ ma: «Nà laade gè ʋa naama GALA goo wo nuiti teʋe. Anɛɛ naa ʋe, ti ɓizɛni ga lia. Gè la ɓɔɛni ti ʋɔ ɲɛgɛlɛin, anɛɛ naa ʋe ta ɓɔɛzu dàaseigi zu. 
Ni ti ɠɛni bà nà-gaalɛbai zu, ta la dàawooi laazeeli nà-nuɓusɛiti ma, ti naati seɠe ti-ziɛ ʋele ɲɔi ʋolu, ta ta-ɠɛɛwoti ɲɔiti.» 
«Nà ga GALAGI nii naa wozaɠaai zuɓuɠaai ɓaa?» Ɠɔoɠɔ GALAGI wooi ɠana. «Ɓa-o, nà gè ga GALAGI nii é wozaɠaazu ɠoozama. 
Nui ta ɠa zoo é lɔɔɠu adaʋɛ ta ná maalɔɔɠuai, gè la zooga gè ʋa ka ɓaa?» Ɠɔoɠɔ GALAGI wooi ɠana. «Wo la suɠwɛɛ ɓaa, ga nà geeɠɔlɔgi zu ná pɛ, gè ɠɛ eteai zu ná pɛ?» Ɠɔoɠɔ GALAGI wooi ɠana. 
«Gè GALA goo wo nuiti ta-ɓɔɛzuɠulai mɛnini, ti zɛɛ vaiti bosu dàaseigi zu, ti ɗa ɠɛ ma: ‹Gè segi ta woni! Gè segi ta woni!› 
Naa ɠa yɛsu ɠɛɛzu eyɛsu yeelɛ? Leeni ɠa é naama ƓALA goo wo nuiti kisu, siɛgi zu ti zɛɛ vaiti bosu da, niiti ti ga yaava ɓɛtɛaiti nɔ? 
Ti la pɔ, ta-ze gooiti maaʋele ma ti bosu ɓɔɠɔ ma, ti ʋa dàaseigi yeema nà-nuɓusɛiti bɛ ɓaa, eɠɛʋelei ti-mɛmɛwolani ti yeemani la dàaseigi ma, galagi Ɓaale maaʋele ma? 
Ni se goo ɠa GALA goo wo nu ya, é ná-se gooi wo! Kɛlɛ zɔi dàawooi zea, naa dàawooi wo fɔɔn ga pagɔ. Kpɔfaama ɓɛgele ɠa é kaʋai ta ani ɠaei yɔɠɔzu?» Ɠɔoɠɔ GALAGI wooi ɠana. 
«Dàawooi ɠɛɛʋɛ eɠɛ abui, eɠɛ malito wolai nii é fasai wolozu,» Ɠɔoɠɔ GALAGI wooi ɠana. 
«Naa ɠa é ba, nà laalɛɛzu GALA goo wo nuiti bu, ti dàawooi unmazu ti ɠilagilagiti,» Ɠɔoɠɔ GALAGI wooi ɠana. 
«Ungo, nà laalɛɛzu naati bu ti ɓɔɠɔ ɠɛɛzu ga GALA goo wo nuiti, ti ti-laawooi zupuzu ga dàawooi,» Ɠɔoɠɔ GALAGI wooi ɠana. 
«Nà laalɛɛzu naama GALA goo wo nuiti bu, niiti ti zɛɛ zegiti bosu, ta ɠɛna boga, ti ɗa nà-nuɓusɛiti kaka ga ta-yɛɛ vaiti maaʋele,» Ɠɔoɠɔ GALAGI wooi ɠana. «Gè la keela woo ɠalivaani ti ma, gè la deve veeni ti ya. Ti la kpɔba nɔpɛ feezu nà-nuɓusɛiti bɛ,» Ɠɔoɠɔ GALAGI wooi ɠana. 
Ɠɔoɠɔ GALAGI ɠɛni Zelemi ma: «Ni GALA goo wo nui ta, ɓaa zalaɠa ɠula nui ta, ɓaa nui tanɔpɛ ga ɠɛna è ma: ‹Ɠɔoɠɔ GALAGI ná-keela wooi ɠa ga ɓɛgele, kasɔi ɓɛgele ɠa é daai gi unma?› ɗa ɠɛ ma: ‹Wa ɠa wo ga kasɔi, naa ɠa é ba, nà yeeɓesu wo ʋa, Ɠɔoɠɔ GALAGI wooi ɠana.› 
Ni GALA goo wo nui ta, ɓaa zalaɠa ɠula nui ta, ɓaa nu nɔpɛ ga ɠɛna: ‹Kasɔ ɠa Ɠɔoɠɔ GALAGI daai,› nà laalɛ ma nui wu, gè laalɛ ná-pɛlɛyeɠei wu. 
Nii wa ɓɔɠɔ ɠaazaɠa da wo ɠilagilagi, naa ɠa ga: ‹Leeni ɠa Ɠɔoɠɔ GALAGI feai ga gooɠaaʋotegi?› ɓaa mu: ‹Leeni ɠa Ɠɔoɠɔ GALAGI boni?› 
Kɛlɛ à mina mɔ ɠɛ ma: ‹Wɛlɛ kasɔi ɠa Ɠɔoɠɔ GALAGI daai.› Wooi naa ɠa ɠɛ ga kasɔi naama nui ʋɛ, nii é naa wosu, mazɔlɔɔ wo GALA daawooi maaʋega, da-ƓALAGI, zɛnvu su ƓALAGI, Fai-Pɛ-Maliɠii. 
Ɗa GALA goo wo nui ɠaazaɠa ga: ‹Leeni ɠa Ɠɔoɠɔ GALAGI è wooɠaaʋoteni da?› ɓaa mu: ‹Leeni ɠa Ɠɔoɠɔ GALAGI boni?› 
Ni wa yɛna bosu nɔ ga kasɔ ɠa Ɠɔoɠɔ GALAGI daai, anɛɛ ni gè tɔ seiɗa wo ma ga wo mina ɓɔɛ ɠana, naa ɠa é ba wɛlɛ nii ɠa gè bosu wo ma, 
naa maaʋele ma, wɛlɛ, nà ɠɛlɛzu wo ʋa ɲɛgɛlɛin, gè wo ʋili ya, wo maaɠooza bà, wa-o, niima laa wolai tɛi-yo, nii gè feeni wo-mɛmɛwolani bɛ, ta wa ɓɔɠɔi. 
Nà ɠɔoɠɔ ɓaaɠulamai la wo ma, ɠɔoɠɔ unfegi nii zeema la woga ma.» 
