﻿Zelemi.
20.
Zalaɠa ɠula nui Pasuul, nii é ɠɛni ga Ɠɔoɠɔ GALAGI zei ʋɛlɛi ma wɛlɛma ɠundiɠii, Imɛɛl ná-doun zunui, é Zelemi woomɛnini, é ɗa GALA gooi wo ɠani. 
Pasuul GALA goo wo nui Zelemi loɠani, é gilini Ɓɛnzamɛn Siɠidaʋɛ ma ɓogi ʋa nii é ɠɛni maazuʋɛ, nu lɛɛzuʋɛ Ɠɔoɠɔ GALAGI zei ʋɛlɛi ma ɠoizuʋɛ. 
Poluma zobui, Pasuul Zelemi vieni, é kula kɔlui ɠa. Zelemi ɠɛni ma: «Ɠɔoɠɔ GALAGI la mɔ è loliga ga Pasuul, kɛlɛ ‹Mini-o-Mini Maalua Vai!› 
Mazɔlɔɔ Ɠɔoɠɔ GALAGI wooi ɠaa: ‹Wɛlɛ, nà è lɔɔzu maalua vai zu, ɗa-o, è-wɔɔlaiti-yo. Naati kpein ta yɛ ti zili nuiti ta-woɠa zɔkpɔiti ga, ɗa ɠɛ ná, è ti-zaazuʋɛ ɠa. Nà Zuda nuiti pɛ dɔ ɓalaa Ɓaɓilɔne masagi yeezu, nii a li ga tiye Ɓaɓilɔne, ɓaa é ti ma vaa ɠaaɓela. 
Niima laaʋeaiti ta-naavoloiti kpein, ta ta-wotii ma lɔnɔgiti, ta ani ʋagɔi é ti ya, naa ʋɛɛ Zuda masagiti ta-naavoloiti pɛ ba, nà ti pɛ dɔ ti zili nuiti zeezu, ta ti-yeaɠɔligi pɛ kula ti ya, ti naati gaalɛ ba, ti li ga tiye Ɓaɓilɔne. 
Ɗɔun ɗa, Pasuul, ta niiti ɓalaa ti è ʋɔ bɛ, wa liizu duɔlai zu. Ɗa zeelina Ɓaɓilɔne, miná ɠa è zaazu ná, è maaɠulu ná, zenɔ ɠana ɓalaa é ɠɛɛzu la ga è-wɔɔlaiti kpein, niiti è zɛɛ vaawokɛɛyeeluɠɔ ɓɔɛi wogai ti ma.› » 
Ɠɔoɠɔ GALAGI, è nɛ̀ɛnɛsogɛ, gè ɓɔɠɔ yɛgɛ na è nɛ̀ɛnɛso! È sòni, è vɔni mà. Gè ɠɛa ga ɲɛɛɠulazu ani folo-o-folo, ɛsɛ pɛ ka ɲɛɛɠulazu nɔ̀un su. 
Mazɔlɔɔ kpɔɛla ɠilagila kɛni gè kpeei loo, nà tooma vai ta faa zuɠoloɠolo fai laazeelizu. Foloi laawu ɲɛgɛlɛin, Ɠɔoɠɔ GALAGI, è-laawooi ɠa ɓaaɠulamai ta ɲɛɛɠulasui ʋilɛsu pòlu. 
Siɛgi zu nà ɠɛna ɓɔɠɔ ma: «Nà pɔ gè yeema daawooi ma, gè la mɔ ɓɔɛa GALA daaseigi zu,» anii ta ɠa zìimaʋɛ eɠɛ abui, è gàlazu, dɔɔɠuʋɛ mà ɠaeiti su, nà ɓɔɠɔ ɓɔlɔzu, kɛlɛ gè la ziɛzu bu. 
Nà ma mɔinmɔin goomɛnisu, ti ɗa woo ɲɔi wo dàalɔɠɔma, ti ɗa dàasei pɛɛ ga: «Mini-o-Mini Maalua Vai». Tanigaa ti ɠɛ ma: «À kula kɛlɛ zu!» Zɔiti ɓalaa ti lɛɛni naama wooi ma, ti ɠɛ ma: «Ungo, ade kula kɛlɛ zu!» Niiti kpein ziilɛigi ɠɛni gi yɔɠɔzu gá tiye, naati ta tòo ɠeleɠele gaiziɛzu, ti ɗa ɠɛ ma: «A ɓɔɠɔ yɛna ná, é yaava, ada vɔni ma, ada so, de dɔnɔ ʋotokula ma.» 
Kɛlɛ Ɠɔoɠɔ GALAGI, è zuɓaaʋɛ, ɗa kɔɔi ɠɔɔzu bɛ̀. Niiti ti wɔ̀inzeɠezu, naati ka ti ɓunɛsu, ti la pilɛ sɔlɔɔga pɛ. Ta unfe, tɔɔzei ti la zobo sɔlɔɔga, toɠa ɠɛ ga unfegi nii é la yeema eyɛsu ɠɔ. 
Ɠɔoɠɔ GALAGI, Fai-Pɛ-Maliɠii, è zoogɛ kwɛɛsu ni nui ɠa è ʋɛ ga wooɠɛɠila nui, ɗa ná-kisiɛiti fɛɠɛlɛfɛɠɛlɛsu niiti ti lɔɔɠuai. Gè ná ʋɛtɛ, ʋelei è ʋaazu ti zalazu la, mazɔlɔɔ ɗa ɠa gè nà-faiti kalivaai è ma. 
À guyei loo Ɠɔoɠɔ GALAGI ʋɛ, à maamusɛ, mazɔlɔɔ toɠa ɗa maawɔin nui ɠizo, é kula faa ɲɔu ɠɛ nuiti zeezu. 
Foloi gè zɔlɔɔni ma, naama voloi ɠotoʋɛ! Foloi dèe gàazulaani la eteai ma, nu nɔpɛ ge mina tuya loo ma voloi ʋɛ! 
Naama zunui ɠotoʋɛ, zɔi é liini ga ma wooi é bo kɛ̀ɛ ma ga: «Doun zunu zɔlɔɔga è ʋɛ,» é zɛba é ɠoozunɛ gola. 
Zunui naa ɠɛ eɠɛ taa wolaiti Ɠɔoɠɔ GALAGI ti woloni, é la wanani ma! Geelaa a laona nɔ feya, é ɗa kpeei mɛni ga a ʋa bɛ, kpɔkɔ volo ziɛgiti su, é ɗa kɔɔɠɔ ɓeei mɛni. 
Mazɔlɔɔ é la zɛ̀ni ná, gè ʋa za dèe ɠoozu! Dèe a la ɠɛ ga nà-kabai, a la màkɛ ɠoozu eyɛsu ɠɔ. 
Lee vaa zu kùlaai dèe ɠoozu, ni kpɔlɔi ta kidaaʋiligi zɔlɔɔ fai ʋe, gè nà-eteai ziɛ unfegi zu? 
