﻿Zelemi.
18.
Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya: 
«Wuzeɠe, Zelemi! Li pɔlɔ liɠi lo nui ʋɔ bɛ, miná ɠa è dàawooi mɛnisu ná, gè ʋaazu bosu è ma.» 
Gè yeini pɔlɔ liɠi lo nui ʋɔ bɛ, gè kaani, é ɗa boti ɠɛ ná-diɠi losuʋɛ. 
Diɠii é ɠɛni kpɛtɛzu, naa ɠoloɠoloni, eɠɛʋelei ná tanisu a ɗa ɠɛ la pɔlɔ liɠi lo nui ya. É taɠili kpɛtɛni, eɠɛʋelei é zolooni la gaazu. 
Ɠɔoɠɔ GALAGI ɓɔɛni pɔ̀, é ɠɛ mà: 
«Gè la zooga gè ʋa kɛ ga woye ɠana ɓaa, Izilayɛle ʋɛlɛyeɠei, eɠɛʋelei pɔlɔ liɠi lo nui kɛɛzu la?» Ɠɔoɠɔ GALAGI wooi ɠana. «Ʋele ɠana wo la zèa, eɠɛʋelei pɔlɔi la diɠi lo nui yeezu, ee, Izilayɛle nuɓusɛiti! 
Ná tanisu nà ɗa ɓɔɛ zii ta ná-faa zu, ɓaa masadai ta, ga gè tɔɔɠula, ɓaa gè toka, ɓaa gè undaaʋili. 
Kɛlɛ ni zii naa a nimizana, é zeɠe faa ɲɔi ʋolu nii gè yiiɠaawana ma su, naazu nà nà-kisiɛi valibo é ʋilɛ maanɔɠɔi naa ʋa, nii gè deveni bɛ. 
Tanisu, nà ɓɔɛna é ʋilɛ zii ta ʋa, ɓaa masadai ta ʋa, ga é lo ʋolu, é zin. 
Kɛlɛ ni zii naa la naa ɠɛɛni nii pagai gàazu, é la woiloni nà-tɛnɛ gooi ma, nà zeɠe faa ʋagɔi ʋolu, nii gè deveni ga gè kɛ bɛ. 
«Ɓɔɛna Zuda nuiti pɔ, ta nuiti ti zeini Zeluzalɛme, è ɠɛ ti ma: ‹Ɠɔoɠɔ GALAGI wooi ɠaa: Gè deve woga wo laalɔɠɔma, nà ba gè ɗa maanɔɠɔi ɠɛʋele ɓɛtɛ. Ɛsɛ ge zeɠe siɛ ʋele ɲɔi ʋolu, à ziɛ wo faiti kɛ eɠɛʋelei soloogai la.› 
Kɛlɛ ta ʋaazu è wooɠaaʋotesu ga: ‹Wafuun faa ɠa ga naa! Nii gi deveai, naa ɠa gi ziɛzu la.› » 
Naa ɠa é ba, Ɠɔoɠɔ GALAGI wooi ɠaa: «À zii ɠiligiti gaazaɠa dɛɛ, ni nu naa ɠɛɠala vai ta mɛniga! Nii Izilayɛle kɛa, toɠa ga kɔzɔba vaa. 
Nu ɠa ɗa kɔɔlɛ vukɔi ɠa nɛi é zeɠe Liɓan ɠizei ma vasaiti ma ɓaa? Nu ɠa ɗa kɔtuɗɛi ɠa nɛi ma lɛilɛigi é yeizu, é ɗa vɔ ɓaa? 
Anɛɛ naa ʋe, nà-nuɓusɛiti ti yeemani mà. Ta zalaɠaiti kulazu kɔɔɠɔ ganigiti bɛ, naati bɛ niiti ti la ga gala kitea, ti ɗa ti ɠaka peleiti ba, ti ɗa zeɠe ta-vaa wɔlɔmai ʋolu, ti ɗa ziɛ ga pele ɲɔi. 
Ti ta-yooi ɠɛa ga inɛinɛ zooi, é ɠɛ ga ɲɛɛɠulasu anii eyɛsu ɠɔ. Nui kpein é leʋesu ná, ti laa ɠa ɗa vɔ, ti ɗa tɔungi ɲiikpi. 
Nà-nuɓusɛiti ti zili nuiti ta ɠɛna maaɓuɠaa, nà ti zuvaza, eɠɛ fufiligi nii folo ɠulazu ʋele viilɛi fazasu. Ta-ɠidaaʋili foloi, nà ʋoluave ti ʋa, kɛlɛ gè la ɠaaʋotega ti ma.» 
Naazu nui tanigaa ti ɠɛni ma: «Ade li lɛɛ, de fai ta ɓɛtɛ Zelemi laalɔɠɔma! Ada zalaɠa ɠula nuiti sɔlɔɔ nɔ yeenɔpɛ, ti ɗa ade ɠala ga tɔgi, ta ɠima nuiti ti ɗa ade lɛnɛ, ta GALA goo wo nuiti ti ɗa GALA daawooi wo ade ma. À ʋaa lɛɛ, ade laalɛ bu ga maalɔɔ ɓɔɛiti! Ade mina woilo naa tanɔpɛ ma, nii é bosu!» 
Kɛlɛ ɗɔun, Ɠɔoɠɔ GALAGI, kɛni è dama ga nà-faa. Woilo sìli nuiti gooi ma! 
Nu ɠa faanɛɛi zuloo ga faa ɲɔi? Ti zeɠei wɔa tùɠɔ, ti ʋa zɛ̀nvui ɠula zèa. Kɛlɛ mina yeema mà, gè ɠɛni losu è ɠaazu, gè ɗa ti maalobo ɓɔɛiti bo, ɗa-yiiɠaawanai ɗa ɓudɛ ti maazu. 
Naa ɠa é ba, ti-lointi dɔ pului zu, è tiya ɓɔɠɔi ti undaaʋili ga boɠa zɔkpɔi. Ti-anzaiti ti ʋala dointi ma, ti ɠɛ ga poanzaiti! Ti-zinigiti ti za ga ɗɔfɔ zeeɓɛi, ta-nu niinɛiti undaaʋili kɔɔmaʋɛ! 
Kpee wooi mɛni, é ɠula ta-ʋɛlɛwuʋɛti, siɛgi zu è ti ziliɲɔɠɔiti kpɛtɛzu la, ti ʋa ti laalɔɠɔma! Mazɔlɔɔ ti zeɠei wɔa kɔ̀ɠɔwu, ti ʋa sò, ti tumɔi lɔɔɠu, ti ʋa kɔ̀ɠɔi zo da. 
Kɛlɛ ɗɔun ɗa, ee, Ɠɔoɠɔ GALAGI, è ta-yaava vai kpein kwɛɛ, nii ta kɛ ti pàa. Mina ta-ɲama ʋuu vai zuvaayɛ, mina ta-ɠotoi ɓale ɠaazu! Ti loo bu è ɠaazu! Wuzeɠe ti laalɔɠɔma ɗa-yiiɠaawana ziɛgi zu! 
