﻿Zelemi.
15.
Ɠɔoɠɔ GALAGI ɠɛni mà: «Anɛɛ ni Moize ta Samiyɛle ta losu kàkala maanɛɛnɛ vaa zu, niima nuɓusɛiti ta-vaa la mɔ zìima. Ti zeɠe lɛɛ gàazu, ti li, ti maaɠooza bà! 
Naazu ni ta ɠɛna è ma: ‹Mini ɠa gá li ná?› ɗa ɠɛ ti ma: ‹Ɠɔoɠɔ GALAGI wooi ɠaa: Niiti deveai ga ti za ga ɗɔfɔi, naati ta za ga ɗɔfɔi, niiti deveai ga ti za ga boɠa zɔkpɔi, naati ta za ga boɠa zɔkpɔi, niiti deveai ga ti za ga pului, naati ta za ga pului, niiti ti makɛgai duɔlai ɠɛɛ vai ma, naati ta li duɔlai zu!› 
«Nimizai ma zii naanigɔ ɠa gè teʋesu ti ma,» Ɠɔoɠɔ GALAGI wooi ɠana, «boɠa zɔkpɔi ɠa a ti ʋaa, gilɛiti ti ti ɓokpo, wɔniiti ta dɔɓɔ zuaiti ta ti zaɓo su, ti ti ɠaaʋala ba. 
Nà ti ɠɛ ga maalua ani eteai ma masadaiti pɛ bɛ, Manasé maaʋele ma, Ezekiase ná-doun zunui, Zuda masagi, faa ɲɔi pɛ faa zu nii é kɛɛni Zeluzalɛme.» 
«Tɔun ɓɛ ɠa a Zeluzalɛme maalobo? Ɓɛ ɠa è maawɔin a so? Ɓɛ ɠa a zeɠe ziɛ ʋele ʋa, é è maaɠaazaɠabo? 
È ɠɛlɛni bà, è ʋoluavega bà,» Ɠɔoɠɔ GALAGI wooi ɠana. «Kɛlɛ gè zeei wuzeɠea è laalɔɠɔma, gè è ɠoloɠolo, mazɔlɔɔ é kula ɠɛa. 
Gè nà-sɛpɛgi leʋega taa wolai ɠilagilagi pɛ su, gè nà-nuɓusɛiti fazaga, gè zɛ ná ti undaaʋili, gè ti ʋala dointi ma, kɛlɛ ti la valiboni, ti ʋa zeɠe ti-ziɛ ʋeleiti ɲɔiti polu. 
Gè ɠɛa ga zaɓu poanzaiti ti mɔin ti zaama, é ʋooʋa kpoloɗɛi ma ɲaɠaegi ma. Folo ɓekpegi, gè ʋaani ga maanɔɠɔi kɔɔɠɔ zunu loungoi dee ʋɔ, gè sasuɓalii ta dualuagi yei ma ga kulafilibai. 
Anzanui unfemai ɠɛa veezu bɛ ga é doun lɔfela zɔlɔɔni, gaamago nɔ zeaɲakai ʋe niina. Anzanui naa ʋalaga fiilɛi ma, ná-foloi lia, siɛgi zu folo ɓekpegi ʋe dɛ. É ɠɛa ga unfegi bɛ, ɓaaɠula ma. Mɔtai niiti ti ná, gè naati fea ga ti zili nuiti ta-woɠa zɔkpɔi laamianigi,» Ɠɔoɠɔ GALAGI wooi ɠana. 
Maanɔɠɔ ɠa bɛ̀! Leeni vaa zu, ee, dèe, è sɔ̀lɔɔni eteai zu? Gè ɠɛa zooi pɛ zea ga zunui maaɠaalii ta sakpegi polu! Gè la ani ziingaosu, gè la nu ziingaosu ga ani, anɛɛ naa ʋe ti pɛ ta fòovoozu nɔ! 
Ɠɔoɠɔ GALAGI gòoɠaaʋoteni, é ɠɛ ma: «Nɔ̀un nà, nà è unmɔɔsu ɗa-maanɔɠɔ ziɛgi zu, ta ɗa-ɠidaaʋili siɛgi zu, è zili nuiti ka ta ʋa è ʋɔ, ti è maanɛɛnɛ! 
Nu ɠa zoo nɛi é kɔlui ɠaleɠale, kɔlui é zeɠezu lɛkpɛmaʋɛ nu ɠɔʋɛzuʋɛ, ɓaa kɔlu ɓɔigi? 
«Nii wo niima nuɓusɛiti ma: ‹Nà wo-yeaɠɔligiti ta wa-naavoloiti kwɛɛzu ga kɔɔzoganiiti, wo la poto sɔlɔɔga, wa-ɠotoiti wo ti ɠɛɛni wa-yooi zu ná pɛ, ma zalai ɠana. 
Nà wo lɔɔzu duɔlai zu wo zili nuiti zea, zooi naa zu nii wo la kwɛɛ, mazɔlɔɔ nà-ziiɠaawanai soga eɠɛ abui, toɠa sosu wo pɛ wo laalɔɠɔma.› » 
Kɛlɛ ɗɔun ɗa, Ɠɔoɠɔ GALAGI, è nà-fai kpein kwɛɛ. Ɠisiɛ nɔ̀un su, màalobo, nɔ̀nɔ ʋotokula wɔ̀inzeɠe nuiti ma. Mina yɛ yiilɔɔzu sìli nuiti bu, è ʋa va bu gè ʋa zeɠe ná! Suɠwɛɛ ga ɗa-vaa ɠa gè poomugi zuzosu da! 
Gè ɓena è-laawooi zɔlɔɔ nɔ feya, gè mi, ti ɠɛni bɛ̀ ga koozunɛɛi ta undaanɛɛi, mazɔlɔɔ è-laaseigi ɠa é bà, ee, Ɠɔoɠɔ GALAGI, GALA Fai-Pɛ-Maliɠii! 
Gè la ʋɔɔpɛɛni ɲɛɛɠulasu nuiti ta-maaɓɔgi ʋa, gè ʋa ɠoozunɛ ti ɠoba. Kɛlɛ è-yeei zizini mà, gè li yɛ, mazɔlɔɔ è dàaveni ga ziiɠaawanai. 
Leeni vaa zu kwɛ ge la nà-taɓai ʋa? Leeni vaa zu nà-palai ɠɛlɛzu kpe fai ʋa, é ʋa ɠɛ ga pilii? Gaamazu ɗa ɠɛɛzu bɛ̀ ga kiteʋe ɗɛungi, eɠɛ ziɛi nu la laa da? 
Naa ɠa é ba, Ɠɔoɠɔ GALAGI wooi ɠaa: «Ni ɗa ɠalena ma, è ʋa pɔ̀ ʋolu, nà è ɠaaɠale ma ʋolu ɗa-wotii zu. Ni anii fizɔgai, ɗa naati zeeɠaaɠwɛɛna ta zɔi tosu la ba, ɗa ɠɛ ga dàaʋɛ. Tiya ɠa ta ʋa ʋolu è ʋɔ, kɛlɛ ɗa laade ɗa li ʋolu ti ʋɔ. 
Nà è ɠɛɛzu niima nuɓusɛiti tuɠɔ ga kɔlu ɓɔigi ma ziɠi sɛbɛlɛgi. Ta laalɛ è wu ga kɔɔi, kɛlɛ ti la vɔniga è ma, mazɔlɔɔ nà è ʋa, ga gè è ɠizo, gè è unmɔɔ,» Ɠɔoɠɔ GALAGI wooi ɠana. 
«Nà è ɠula nu ɲɔiti zea, nà è ɠizo toosu nuiti ma.» 
