﻿Zelemi.
8.
«Naama ziɛgi zu, ta Zuda yooi zu masagiti ma ɠaeiti kula kabaiti su, ta ta-ɠundiɠiiti ma ɠaeiti, ta zalaɠa ɠula nuiti tɔnɔiti, ta GALA goo wo nuiti tɔnɔiti, é ʋɛɛ Zeluzalɛme taaʋeaiti tɔnɔiti ba,» Ɠɔoɠɔ GALAGI wooi ɠana. 
«Ta ti ʋu, foloi ta alugi ta somideɠa ɓulugiti ti ɗa volo ti ma, niima nuiti ti naati nɛɛni ʋɛ, ti ɗa ti lɛbi, ti ɠilini ti ʋa, ti ɗa ti ɠaiziɛ, ti ɗa maayei ti ʋɛ. Ti la ti ɠaalɛa ba, ti la ti maaɠulua, ta ɠɛ ga kpoɠa pɔlɔi zooi ɠa. 
Niima nuɓusɛi ɲɔiti saama, mɔtai niiti ta yɛ vulua, naama adaʋɛti kpein gè ti vazasu náti, ta yiimazeɠe ga saai é leʋe zɛnvui ʋa,» Ɠɔoɠɔ GALAGI, Fai-Pɛ-Maliɠii wooi ɠana. 
«Ɗa nii wo ti ma, ga Ɠɔoɠɔ GALAGI wooi ɠaa: ‹Nui a loona, é la mɔ ɗa ga ɓaɠaga ʋolu ɓaa? Nui a zeɠena pelei ʋa, é la mɔ ɠalega ma, é ʋa ʋilɛ ma ʋolu ɓaa? 
Naazu leeni vaa zu Zeluzalɛme nuɓusɛiti ti ziɛzu ga pele ɲɔi? Leeni vaa zu ti goizuɓɔlɔi ɠɛɛzu ta-ʋele ɲɔi ma? Niima nuiti giliʋɛ gola ta-ɠala wafuungiti ba, ti ɗa ɠɛlɛ ga ti mina ɠale ma mà ʋolu. 
Nà ɠidaazu bu, gè woilo naa ma nii ti bosu, gè la gaama ɓɔɛ ɠila kpalaa mɛnini! Tanɔpɛ ge la zeɠezu ná-faa ɲɔu ʋolu, ta la ɠɛɛzu ma: Leeni ɠa gè kɛai? Ɛsɛ ka ná-kpizɛ wosu nɔ, eɠɛ sooi nii maaɠiliai é ʋilɛ kɔɔɠɔ vai ma. 
Anɛɛ wɔnii daa ga sigɔɲe, naa ná-seɠeseizu yeeɠɛɠalai ɠwɛɛ geezuʋɛ, kpumagoi ta ziɛ wɔnigi ta sɛʋɛzɛʋɛgoi, naati ti ti-ɠalema yeeɠɛɠalaiti kwɛɛ. Kɛlɛ nà-nuɓusɛiti ti la tɔgiti kwɛɛ niiti Ɠɔoɠɔ GALAGI ti zeiɗai. 
« ‹Wa ɠisiɛzu, wo ɠɛ ma: Gá gá-ɠima nuiti, giya ɠa Ɠɔoɠɔ GALAGI ná-tɔgi gi ya. Kɛlɛ wa zoo ɠale naa wosu, siɛgi zu niiti ti tɔgi zɛʋɛzu, naati ti ga zɛɛ nuiti la, ti poluʋɛ ɠoloɠolosu? 
Ɠima nuiti ti unfega, dualuagi ti zoga, ti ɠɛa ga duɔi, ti li ga tiye. Tɔɔzei ti ɠɛlɛa Ɠɔoɠɔ GALAGI laawooi ʋa, ɠimalai ɓɛgele ɠa é ti ya?› » 
« ‹Naa ɠa é ba, nà ti-anzaiti fe nu ɠiligaani zea, gè ta-ɓalagiti fe ti zo nuiti zea. Mazɔlɔɔ é zo ɓolomadɔɠɔiti ma, é li seizumaanɛgiti pɔ, ta ti-ɓɔɠɔ lɔnɔgi nɔ ɠaiziɛzu, é zo GALA goo wo nuiti ma, é li zalaɠa ɠula nuiti pɔ, ti pɛ ta ziɛzu ga yaavai. 
Ta nà-nuɓusɛiti ta-ʋalai ɠaaʋɛ nɔ zalezu, ti ɠɛ ma: É zolooga ga pagɔ, ti pɛ ti zolooga su, tama faiti tanɔpɛ ge la liizu ga pagɔ. 
Ta unfesu nɛi ɓaa ga kɔzɔba vaiti ti ɠɛɛni? Unfe ge la ti ma tago pa, ti la vɔlɔ zooga ti ʋa unfe. Naa ɠa é ba, ta loo ʋɔɔma, ta zɔiti ti loozu, ti ɓezeɠele naama yeeɠɛɠalai zu, yeei ge ɠɛɛzu la ti ʋoluvaawo,› » Ɠɔoɠɔ GALAGI ɠa é boga. 
«Ni nà pɔ gè ti-ɠaawaai ta ɠula, gè la leezɛn ɠila kpalaa kaani kpelei zu,» Ɠɔoɠɔ GALAGI wooi ɠana. «Gè la kooleɠoole gwaai gila kpalaa kaani ma wului ɠa, gaalaagi vɔa. Naa ɠa é ba nà ti pɛ feezu naati zea, niiti ta ɠɛ ziɛzu ti ma.» 
Leeni vaa zu ade yɛsu nɔ ada ɠilagi? Ade ɠaalɛ ba tɔun, de lɛ taa wolaiti su, siɠigiti ti ti ma, de saai maaɓɔun miná! Tɔɔzei Ɠɔoɠɔ GALAGI da-ƓALAGI ɠa é de undaaʋilisu, toɠa ziɛi losu ade la, nii nu ʋaa anii bu, mazɔlɔɔ gi lopele ɲɔuʋɛ tɔun tetema. 
Gi ɠigi ɠɛa ziilɛigi ʋa, kɛlɛ faa ʋagɔ nɔpɛ ge la ɠɛɛzu. Gi ɠɛa maaɓɔungi wosu, gi ʋa ɠɛdɛ, kɛlɛ wɛlɛ, kidaaʋiligi ʋa! 
Niizu ɠani Dan ʋele ɠa gi zili nui ná, miná ɠa ná-sooiti sokpa zu viilɛi ɠulazu ná. Ti-ɓozɔ lugiti ta zooi kpein kpalizu. Ta ga ʋa, faiti pɛ ti leʋe, ti ɓe, zooi ta nii kpein é ga, taa wolai ta su nuɓusɛiti pɛ. 
«Nà kaali ɲɔiti teʋesu wo laalɔɠɔma, nu nɔpɛ ge la ti ma zuʋaa sɔlɔɔga, ti ɗa wo ɲi,» Ɠɔoɠɔ GALAGI wooi ɠana. 
Nà-ziizoolɛi ma zale la ná, zìi ɠa kpɔ̀lɔzu kòozu. 
À woilo, nà-nuɓusɛiti ta kpɔba ɓeei loozu, é ɗa zeɠe ɠoozama zooi zu ná pɛ. «Ɠɔoɠɔ GALAGI la mɔ Siyɔn ɓaa? Ná-masagi la mɔ náʋɛ ɓaa?» «Leeni vaa zu ti dàa ɠaiziɛzu, ti nɔkɔ fai zu ta-ɠɔɔɠɔ ganigiti bu, zii ɠiligiti ta-ɓɛtɛ aniiti?» 
«Molo leʋei ɓega, foɠoi ɓalaa ɓega, gi la ɠizoni.» 
Nà-nuɓusɛiti ti ɠoloɠologa, naa nà ɓalaagi kòloɠologa, gɔlɔɗɛi ɠa gàazu, gè ɠɛa ga iɲɔteʋei ɠɔnɔgi. 
Siɛma wulɔ la Galaade ɓaa? Ɗɔɠɔtɔlɔ la náʋɛ ɓaa? Leeni vaa zu nà-nuɓusɛiti ti la ɠɛdɛsu? 
Ee, wɔin ɠa mà ga nɔ̀ungi zulaave ga ziɛi, gàazuɠɛzɛiti ti ɠɛ ga gɔlɔi ma ɗɛungiti! Folo ʋɛɛ kpidi ʋa, nà la ti pɛ kɛ ga gɔlɔi, nà-nuɓusɛiti ma ʋoomaiti ma wɔlɔi! 
