﻿Zelemi.
7.
Ɠɔoɠɔ GALAGI devei veeni Zelemi ya 
ga é lo nu lɛɛzuʋɛ GALA sei ʋɛlɛi ma ɠoizuʋɛ, é keela wooi nii wo: «Wɔiti kpein wo ga Zuda nuiti, wo lɛɛzu ga nu lɛɛzu ʋelei tɛi, ga wo nɔkɔ Ɠɔoɠɔ GALAGI wu, à woilo Ɠɔoɠɔ GALAGI laawooi ma. 
Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹À wo-ziɛ ʋeleiti ta wo-zɔgiti maavalibo. Naazu, nà wo yɛ ná, wo wa-eteai ziɛ adaʋɛ tɛi. 
À ɓe ʋoluzeizu yaava ɓɔɛi naa ʋa ga: Ʋɛ ɠa ná ga Ɠɔoɠɔ GALAGI zei ʋɛlɛi, Ɠɔoɠɔ GALAGI zei ʋɛlɛi, Ɠɔoɠɔ GALAGI zei ʋɛlɛi! 
Ni gaamazu wa wo-ziɛ ʋeleiti ta wo-zɔgiti maavalibona, wo tukpɔiti gaaleʋe ga telebodai kpɔɛ nu felegɔiti zɔɠɔzu, 
wo ɓɔɠɔ zo wo mina wɛɛn wɔinzeɠe, ɓaa podoin, ɓaa poanzai, wo ɓe sɔbalala nuiti paa vai ʋa ʋɛ, wo ɓe ɠilizu gala kiligiti ba, wo ɓɔɠɔ maanɔɠɔ vai zu, 
naazu, nà wo yɛ ná, wo wa-eteai ziɛ niima yooi zu, nii kaite gè feeni wo-mɛmɛwolani bɛ eyɛsu ɠɔ. 
« ‹Kɛlɛ wɔun, wa ʋoluzeizu yaava ɓɔɛiti ba, niiti ti la faa nɔpɛ paa wo ma. 
Leeni ʋe mu! Wa unmai wosu, wo nuiti paa, wo wɛɛnziɛgiti bo, wo zɛɛ minɛiti seɠe, wo ansansegiti kula ga zalaɠai Ɓaale ʋɛ, wo nɔkɔ gala kiligiti bu, niiti wo la ɠɛni ti ɠwɛɛ! 
Naa ʋoluma, wa ʋaazu niina, wo lo gàazuʋɛ niima ʋɛlɛi wu, nii feai bɛ̀, wo ɠɛ ma: Gá ziilɛigi zu! Kɛlɛ kɔzɔba vaiti kpein ka wo kɛɛzu! 
Toɠa wo ɠaazu ga toosu nuiti ti-lɔɔɠuzuʋɛ ɠa ga pɛlɛi niigi dàaseigi wosu ma? Nà ɓɔɠɔi ʋele ɠana gè kaazu la,› » Ɠɔoɠɔ GALAGI wooi ɠana. 
« ‹À li lɛɛ dɛ Silo, ʋɛ ná ɠɛni ga sèizu ɲadegai, wo ná ʋɛtɛ, ʋelei gè náʋɛ zogai la, nà-nuɓusɛiti Izilayɛle nuiti ta-vaa ɲɔiti maaʋele ma. 
Niizu, tɔɔzei zekana wo ziɛzu la, gè boni wo ma, gè la looɠoni bo fai ʋa wo ma, wo la woiloni, gè wo lolini, wo la sulooni,› » Ɠɔoɠɔ GALAGI wooi ɠana, 
« ‹naa ɠa é ba, pɛlɛi nii feai bɛ̀, pɛlɛi nii wo ɠigi logai ba, niima adaʋɛ gè ná veeni wo-ɠɛwolani bɛ ta wa ɓɔɠɔi, nà sosu eɠɛʋelei gè Silo zoni da. 
Nà wo ʋilisu ya, wo maaɠooza bà, eɠɛʋelei gè wo-ɠɛɛleaiti pilini ya la, Efelayime nuɓusɛiti.› » 
«Ɗa ʋe, Zelemi, mina niima nuɓusɛiti maavaa laazeeli mà, mina fali wo, è mina maanɛɛnɛ woo laazeeli mà ta-vaa zu, mina ti-maaʋee ve bɛ̀, mazɔlɔɔ gè la woiloga è-woo ma ɲɛgɛlɛin. 
È la naa ɠaazu ɓaa, niiti ti ti ɠɛɛzu Zuda laa wolaiti su, ta Zeluzalɛme taazuʋɛ? 
Dointi ta koʋii ɠalezu, ɠɛɛɠɛiti ti abui ɠaazo, anzanuiti ti ɓulu vukɔi ɠaayɔ, ti gatoiti kpɛtɛ, ti kɛ ga Geezu Anzanu Masagi ɠɔɔi. Ta dɔɔi ɠulazu ga puya zalaɠai gala kiligiti bɛ, nii a kɛ ti zìi ɠoloɠolo. 
Nà ɠa nɛi ti zìiɠoloɠolosu ɓaa?» Ɠɔoɠɔ GALAGI wooi ɠana. «Tiya ɓɔɠɔi laade nɛi ɓaa ti ɓɔɠɔ unfesu? 
Naa ɠa é ba, Maliɠii Ɠɔoɠɔ GALAGI wooi ɠaa: Nà-ziiɠaawana wolai ta nà-ziiɠulagi ɠa yeizu niima adaʋɛ ma, é zeeli nuɓusɛiti ma ta suaiti, é zeeli guluiti ma dɔɓɔi zu ta zooi ʋaalɔnɔgiti pɛ. É ɠɛ eɠɛ abui nii é la zaa pɛ.» 
Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: «À wa-ɠala zalaɠaiti kpɔ zɔɔma zalaɠaiti ba, wo ma zuaiti mi! 
Mazɔlɔɔ gè wo-mɛmɛwolani kulaai ma Ezipete yooi ʋa, gè la ɠɛni ɓɔɛni ti ʋɔ, gè ʋa deve ve ti ya ɲɛgɛlɛin, é ʋa ʋilɛ gala zalaɠaiti ta zalaɠa ɠiligaa ʋa. 
Kɛlɛ wɛlɛ devei ʋa nii gè feeni ti ya: ‹À woilo gòoi ma, nà ɠɛ ga wa-ƓALAGI, wo ɠɛ ga nà-nuɓusɛiti. À ziɛ ga pelei naa pɛ nii gè wo leveai la, naa ɠa a kɛ wo undaanɛɛ.› 
Kɛlɛ tiya ya, ti la ɠɛni woiloni, ti la wooiti daalaoni. Kɛlɛ ti ziɛni ga tiya ɓɔɠɔi ti yiima vaiti nɔ, ta ti ɠisu vaa ɲɔiti nɔ. Nii mu ta kɛ ga ti ɠaaʋote mà, tɔun ti ʋoluaveni bà. 
Kaipa voloi wo-mɛmɛwolani ti ɠulani la Ezipete yooi ʋa, eyɛsu niizu, gè nà-botiɠɛ nuiti teʋeni wo ma, GALA goo wo nuiti, folo-o-folo dooɠo ge la ba. 
Kɛlɛ ti la woiloni gòo ma, ti la wooiti daalaoni. Ti ɠɔgiti toni ga, ti faa ɲɔi ɠɛ, é leʋe ti-mɛmɛwolani tɔnɔi ʋa. 
«Zelemi, ɗa niima vaiti pɛ bosu ti ma, kɛlɛ ti la ʋaazu è-wooi zosu. Ɗa wooɠulazu ti ma, kɛlɛ ti la è wooɠaaʋotega. 
Naazu, ɠɛ ti ma: ‹Wa ga ziiti ti la ɠoloni Ɠɔoɠɔ GALAGI ʋɛ, ta-ƓALAGI, ti ɠɛlɛzu tɛnɛ gooiti ba. Wooɠɛɠilada la mɔ wo zaama, é ɲɛɛlɛa wo-laawooiti su.› » 
«Zuda nuɓusɛiti, à wɔungi ɓuye, nii é è ɠalivaa vai lɛɛzu, wo pili ya. Wo lɛ gizeiti ma, wo ɗa gɔlɔi wo! Mazɔlɔɔ Ɠɔoɠɔ GALAGI wo wɔinzeɠea, é niima yeeɠɛɠalai ma nuɓusɛiti daaʋiliga, tiya ɠa ti ziiɠula vai ɠɛa.» 
«Mazɔlɔɔ Zuda nuiti ti wànama vai ɠɛa,» Ɠɔoɠɔ GALAGI wooi ɠana. «Ti kɔɔɠɔ gani ɠɔzɔba vai zeini pɛlɛi wu feai bɛ̀, ti kɔzɔa. 
Ti zalaɠa ɠula adaʋɛti kpɛtɛʋɛ Tofɛte, Ɓɛne-Ɠinɔme ʋɛtugi zu, nii a kɛ ti ɗa ti-loun zunuiti ta ti-loun anzanuiti kɛ ná ga gala zalaɠaiti. Tama kaipa gè la ɠɛni naama leve veeni, naa la vɔlɔ ɠɛni ʋilɛni nà-kisiɛi zu. 
«Naa ɠa é ba, foloi tanigaa ta ʋaazu, yeei niima adaʋɛ la mɔ loliga la ga ‹Tofɛte› ɓaa ‹Ɓɛne-Ɠinɔme Ʋɛtugi›, kɛlɛ ‹Nu Ʋaa Ʋɛtugi›. Nuiti ta ɗa poomaiti maaɠulu niina Tofɛte, ada ʋalagi maaʋele ma,» Ɠɔoɠɔ GALAGI wooi ɠana. 
«Niima nuɓusɛiti ma ʋoomaiti ta ɠɛ ga daamianigi wɔniiti bɛ, ta dɔɓɔ zuaiti, nu nɔpɛ ge la ti ɓɛa. 
Zuda laa wolaiti su ta Zeluzalɛme taazuʋɛ, nà pele ɓesa fɛti ɠula zɔngɔ wooiti tuɠɔ, naa ʋɛɛ koozunɛ ɓain gooiti ba ta seipɛlɛla nu niinɛi ta-wuyeiti. Mazɔlɔɔ zooi ɠa ɠoloɠolo ɲɛgɛlɛin.» 
