﻿Zelemi.
2.
Ɠɔoɠɔ GALAGI ɓɔɛni pɔ̀, é ɠɛ mà: 
«Li Zeluzalɛme, è ɓain ti woizu, è ɠɛ ma: ‹Ɠɔoɠɔ GALAGI wooi ɠaa: Kì ka ɗa-nɛɛbɛi zu è ɠɛai mà niinɛlai zu, ʋelei è gòla nɛɛni ʋɛ la, è maazo siɛgi zu bɛ̀, è ɠɛni pòlu teʋebai zu, zou vɔɔi zu. 
Mazɔlɔɔ názu Izilayɛle veeni Ɠɔoɠɔ GALAGI ʋɛ, eɠɛ molo leʋeai ma mɔungi. Niiti kpein ti ɠɛni ta miizu, gi ɠɛni ʋilɛsu la, gaamago nɔ, maanɔɠɔi ɠa é ɠɛni zeizu ti ma, Ɠɔoɠɔ GALAGI wooi ɠana.› » 
À woilo Ɠɔoɠɔ GALAGI laawooi ma, Zakɔɓe mavofodai, wɔiti kpein wo ga Izilayɛle ná-pɛlɛyeɠeiti! 
Ɠɔoɠɔ GALAGI wooi ɠaa: «Leeni ɠa deɠɛmu wo-mɛmɛwolani ti kaani bà ga faaɠaazagi, ti maaɠoozazu bà, ti ʋilɛ gala kiligiti polu niiti ti ga wafuun ganiiti, tiya ɓalaa, ti ɠɛa ga wafuun nuiti? 
Ti la gaazaɠa boni ga: ‹Mini ɠa Ɠɔoɠɔ GALAGI ná, nii é ade ɠulani Ezipete yooi ʋa, é loni de luɠɔ teʋebai zu, zou vɔɔi zu, pɛtu golaiti ti ná, adaʋɛ kpɔɔle wɔin ta ziizoolɛi ná, nu nɔpɛ ge la ziɛzu ná, nu la zeini ná?› 
Tama, gè loni wo luɠɔ, gè ʋa ga woye zou ʋagɔi zu, wo ʋa wɔnɔ zɔlɔɔ sulɔnɔ pagɔiti su. Kɛlɛ wo zeelini nɔ ná feya, wo zooi nii ɠɔzɔa, wo nà-zooi ɠɛa ga kɔzɔba yooi. 
Zalaɠa ɠula nuiti ti la gaazaɠagi woni ga: ‹Mini ɠa Ɠɔoɠɔ GALAGI ná?› Tɔgi laawooleʋe nuiti ti la kwɛ̀ɛ, nuɓusɛiti ta-ɠundiɠiiti ti ɓakaga dàalɔɠɔma. GALA goo wo nuiti ta ta-ɠeela wooiti boni Ɓaale laaseigi zu. Ti ʋoluzeiɗa zɛbɛsulala ɠalagiti ba. 
Naa ɠa é ba, kpɔɛi lɔa ade yɔɠɔzu,» Ɠɔoɠɔ GALAGI wooi ɠana. «Kpɔɛi lɔa gi yɔɠɔzu gá wo-loun zunuiti ti-loun zunuiti. 
À li, wo gaazaɠa bo Sipele ziɛ zaama yooiti su, wo faiti buuɓɛ Alaɓuiti pɔ bɛ Kedaal, wo pɛtɛ, ni faiti ta ɠɛɛzu miná, eɠɛʋelei é ɠɛɛzu la ʋɛ, 
wo pɛtɛ, ni zii ta ná-gala maavaliboga. Tɔun naati ɓɔɠɔi mu ti la ga gala kitea! Tama, lɛbiyai ɠɛni nà-nuɓusɛiti bɛ, ga gè ɠɛ ti ʋɛ ga GALAGI. Kɛlɛ ti maavaliboga ga zɛbɛsulala ɠalagiti! 
Geeɠɔlɔgiti, wo laavɔ ga naama vai, wo zasuɓali, wo ɠidaaʋili,» Ɠɔoɠɔ GALAGI wooi ɠana. 
«Mazɔlɔɔ nà-nuɓusɛiti ti faaɠaazagi ma ʋɛɛda felegɔi ɠɛa, ti ɠɛlɛa bà, nɛ̀i gè ga zɛnvu su ɗɛungi, ti ziɛyeɠeiti bɔa ɓɔɠɔ ʋɛ, ziɛyeɠeiti ti ɓokulai, ti la zooga ziɛ zosu.» 
«Izilayɛle ɠa ga duɔi geyaai, ɓaa sɔlɔɔgai pɛlɛi wu? Leeni vaa zu deɠɛmu, é ɠɛa ga nuɓusɛi zɔiti daamianigi? 
Eɠɛ zalaiti ti zikɔzu, ti ɗa ɓain daalɔɠɔma. Ti ná-zooi valiboga, ti kɛ ga teʋebai zu. Ná-taa wolaiti ti ɠalaa, nu la mɔ zeini náti. 
Anɛɛ Mɛmefise nuiti ta Taapanɛse nuiti ta ʋaazu, ti ɗa nɔungi ɓuye. 
Leeni vaa zu deɠɛmu naa kpein ge ɠɛɛzu ga ɗe, Izilayɛle? È ɠɛlɛ vai laade Ɠɔoɠɔ GALAGI, ɗa-ƓALAGI ʋa, anɛɛ ni é ɠɛni loni è luɠɔ pele ʋagɔiti su? 
Niizu, è li ungi ɠa ga leeni Ezipete yooi zu, è li è ziɛ wolai Nile ɗɛi ta ɓɔɔle? Toɠa leeni ʋaa è ma, è ʋa Asiili ʋelei zo, è li è ziɛ wolai Efelate ta ɓɔɔle? 
Mazɔlɔɔ ɗa-vaa ɲɔi è kɛɛzu, naama zalai ɠa è sɔlɔɔsu, è ɓaka fai ɠa è ʋaazu maaɠoloi zɔlɔɔsu da. Suɠwɛɛ, è ka ga toɠa ga faa ɲɔu, gaawanaai, ga è ɠɛlɛ Ɠɔoɠɔ GALAGI ʋa, ɗa-ƓALAGI, è la unfema ɠila kpalaa fea bɛ̀,» Ɠɔoɠɔ GALAGI, Fai-Pɛ-Maliɠii wooi ɠana. 
«Wɛlɛ, kaite è ɗa-unbawului ɠaleɠaleni, è ɗa-ɠaluiti suleʋeleʋe, è ɠɛ ma: ‹Gè la mɔ pɔ gè ʋa ɠɛ ga duɔ!› Kɛlɛ gizeiti ma, gulu wolaiti bu, è ɗa nɔkɔ náti eɠɛ koloɠolo anzanui! 
Gè è ziinni eɠɛ leezɛn ansaɠɔ pagɔi, ani ʋɔnɔgi nii ma zii wola ʋagai. È valibogɛ ɠale nɔ̀un tetema, è ɠɛ ga kpele ɲɔi, gaawaai la ʋani? 
Anɛɛ ni ɗa ɓɔɠɔ maagbazu ga tɔbɔ kɛzɛi, anɛɛ ni ɗa sɛɠɛi wola ziɛzu ɓɔɠɔ ma, ɗa-vaaɠaaza golai ɠa yɛ è ʋa gàazu eɠɛ nɔɠɔi,» Maliɠii Ɠɔoɠɔ GALAGI wooi ɠana. 
«Ɗa zoo ɠale è ɠɛ ma: ‹Kaipa gè la dɛ ɓɔɠɔ ɠɔzɔni, gè la liini gè ʋa nɔkɔ Ɓaale wu!› È-ziɛ ʋelei ʋɛtɛ dɛɛ pɛtugi zu! Naa ɠwɛɛ, nii è kɛɛni! Eɠɛ ɲɔmɛ zaa ɓokpagi, è leʋeteʋesu adaʋɛ pɛ! 
È ɠɛa eɠɛ dɔɓɔ zoovalegi, nii maaɠoloai teʋebaiti su. A ɓɔsɔna, é ɗa fiilɛi ɠugi zo. Ɓɛ ɠa a kpeteʋe pɛɛpolu wɔin ʋa? Ma zinɛiti ti gaiziɛzu, ti la ɓɔlɔa, ta ka, a ɓɔsɔna nɔ feya. 
Dama, saʋalagi mina ɠula è-ɠɔɠɔi ʋa! Dama ga è-ɠɔdaʋɛ ná mina vɔ! Kɛlɛ ɗa ɠɛɛzu ma: ‹Wafuun kpɔlɔ ɠana! Wɛɛn ɠalagiti nɛɛʋɛ bɛ̀, tiya ɠa gè ʋilɛsu ti ʋolu.› 
Eɠɛʋelei unma nui a ɗa unfe da, siɛgi zu ti sosu da, zekana Izilayɛle ʋɛlɛyeɠei unfeni la, tiya-o, ta-masagiti-yo, ta-ɠundiɠi wolaiti-yo, ta-zalaɠa ɠula nuiti-yo, ta ta-ƓALA goo wo nuiti-yo, 
tɛiti ti ɠɛɛzu gului ma: ‹Ɗa ga kɛ̀ɛ,› ti ɠɛ kɔtui ma: ‹Ɗa ɠa è sɔ̀lɔɔni!› Ti ʋoluavega bà, ti la wɛlɛzu gàazu. Kɛlɛ maanɔɠɔ voloi, ta ɗa ɠɛ mà: ‹Wuzeɠe, è gi ɠizo!› 
Kɛlɛ, mini ɠa deɠɛmu ɗa-ɠalagiti ti ná, è ti ɓɛtɛni ɓɔɠɔ ʋɛ? Ti wuzeɠena deɠɛmu, ni ta zoo ti è ɠizo, siɛgi zu maanɔɠɔi è zoga da! Mazɔlɔɔ, ee, Zuda, ɗa-laai liegiti ti è yeema, ta tie ta galagiti ti è yeema!» 
«Leeni vaa zu wo kpɔɛi laalɛɛzu bù? Wo pɛ wo wuzeɠea dàalɔɠɔma,» Ɠɔoɠɔ GALAGI wooi ɠana. 
«Gè wo loɠani, kɛlɛ naa la faa ʋaani, wo la ɠi sɔlɔɔni naa ma. Wo wa-ƓALA goo wo nuiti paani ga boɠa zɔkpɔi, eɠɛ zalai é faa ɠoloɠologi ɠɛɛzu. 
Niizu nuɓusɛiti, à wɛlɛ nii Ɠɔoɠɔ GALAGI bosu: Nà Izilayɛle ʋɛ ga zooi é ga teʋebai ɓaa, kpidi yooi? Leeni vaa zu nà-nuɓusɛiti ti ɠɛɛzu ma: ‹Gá ziɛziɛsu ʋɛ ná nɛai gi ʋɛ, gi la wɔinni faa ʋa ɠɛ ade yɔɠɔzu›? 
Anzalopoi ɠa yeema nɛi ná-balai ma? Ɓaa anzalopoi maazogai, naa ɠa yeema nɛi ná-saamaɠiligi ma, fɛlɛai ga pagɔ? Ɓa-o, kɛlɛ wɔun wa, nà-nuɓusɛiti, wo yeema mà, kaite, ma voloiti gaa la luga. 
Ee, eɠɛʋelei è zoogai la wɛɛnziɛgi la! Anɛɛ anzanui nii gola ɲɔuɗai, ɗa zoo è kalagi ve zea! 
È yɛga su, maawɔin nuiti ti la ga sɔba nui, ti-ma ɲamai zeelia ɗa-zeɠei lakɔlɔgaʋɛti, è la ti zoni, ti ʋa ɗa ɗa-ʋɛlɛla ɓusɛ! Kɛlɛ naa pɛ su, 
ɗa ɠɛɛzu ma: ‹Ungo, nɔ̀un, peelalazu la bà! Dàaʋɛ da, ná-ziiɠaawanai ɠa ʋaazu ɓudɛzu màazu!› Deɠɛmu, nɔ̀un, nà ʋaazu è lukpɔzu, tɔɔzei ɗa ɠisiɛzu ga è la faaɠaaza nɔpɛ kɛɛni! 
É la ɓaani è ma ga è è-nɛɛɲɔɠɔi valibosu la! Tama Ezipete ɠa ʋaazu è unfesu, eɠɛʋelei Asiili è unfeni da. 
Miná ɓalaagi, ɗa ɠula ná, è-yeeiti daai è unma ga unfegi. Mazɔlɔɔ Ɠɔoɠɔ GALAGI ɠɛlɛa naati ba, niiti è ɓɔɠɔ ɠalivaazu ti ma, è la undaanɛ zɔlɔɔga ti ya.» 
