﻿Ezayi.
66.
Ɠɔoɠɔ GALAGI wooi ɠaa: «Geeɠɔlɔgi ɠa é ga nà-masa kpɔkpɔgi, zooi ɠɛ ga nà-kɔɠɔloma anii. Pɛlɛi ma zii ɓɛgele ɠa wa zoo tosu bɛ̀? Mini ɠa nà zoo zeizu ná? 
Zèei ɠa gè niima aniiti kpein kpɛtɛni la, ti pɛ ta ga nɔ̀nɔ,» Ɠɔoɠɔ GALAGI wooi ɠana. «Kɛlɛ nii gè ɠaazu ʋagɔi losu ba, naa ɠa ga zɔi zobo ge la bɛ, maawɔinɗai, é dàawooi mɛnisu, é ɗa lua, sasu ɗa ɓali. 
Ta ɗa nikɛ zinɛi ɠula ga zalaɠai, kɛlɛ ti ɗa nui ɓalaagi ʋaa! Ta ɗa baalagi ɠula ga zalaɠai, kɛlɛ ti ɗa gilɛi ʋaa! Ta ɗa ɓulu vukɔi ɠula ga zalaɠai, kɛlɛ ti ɗa boi ɲamai ʋu! Ta ɗa ansansegiti gala, kɛlɛ ti ɗa zɛɛ ɠalagiti dɛbi! Tɔɔzei ti pɛ ti yiimazeɠea ga ti ziɛ ga ti ɓɔɠɔ ʋeleiti, tɔɔzei ta-ɠɔzɔba ɠɔɔɠɔ ganiiti ti ti yiilɛizu, 
gè yiimazeɠea ga gè ɓe ti ʋa, ti yɛ ta-vaazupuiti su, nà nimizai zei ti ma, ti luazu ba. Tama, gè toligi woni, nu nɔpɛ ge ɓɔɛni. Gè ɓɔɛni ti ʋɔ, kɛlɛ ti la woiloni. Nii ɲɔuɗai gàazu, naa nɔ ɠa ti kɛɛni, ti ɠatani naa ʋa, nii wɔin la mà.» 
À woilo Ɠɔoɠɔ GALAGI laawooi ma, wɔi wo daawooi zosu, wo ɗa lua, wo ɗa ɓali: «Wo-wɔɔla zou lointi ta ná, ti la wɔinni ga woye, ti ɗa wo laaʋili nɔ̀un maaʋele ma, ɲɛɛɠulasui zu, ti ɗa ɠɛ wo ma: ‹Ɠɔoɠɔ GALAGI ná-lɛbiyai ɠula kɛlɛma, gi wa-ɠoozunɛɛi ɠa!› Kɛlɛ tiya ɠa ti lɔɔzu unfegi zu.» 
À woilo zɔngɔ wooi ma é ɠulazu taazuʋɛ, zɔngɔi tɛi ka zeɠezu GALA sei ʋɛlɛi wu, toɠa ga Ɠɔoɠɔ GALAGI wooi, é sili nuiti salazu é zoloo ti-ɠɛɛwotii ma. 
Aisa Siyɔn ʋa koozuwanai lɔɔzei, é doin zɔlɔɔga! Aisa é ʋa taɓai lɔɔzei, é doun zunui ɠaazulaa folo ma. 
Ɓɛ ɠa é naama vai ta mɛniga? Ɓɛ ɠa é naa ɠɛɠala vai ta ɠaa? Zooi ɠa zoo é zɔlɔɔ folo ɠila nɔ ɓaa? Zooi ɠa zoo nɛi zɔlɔɔsu gaamago nɔ? Tama, taɓai lɔɔ ɗa zei nɔ, Siyɔn ná-doun zunuiti gaazulaa eteai ma! 
«Nɛ̀i zèe yɛsu anzanui ʋa kogi zeeli, nà ɠɛlɛ sɔlɔɔ fai ɓaa?» Ɠɔoɠɔ GALAGI ɠa é boga. «Nɛi gè doun zɔlɔɔgi ɠɛʋele ɓɛtɛa, nà pele leʋe sɔlɔɔ fai luɠɔ ɓaa?» Ɗa-ƓALAGI ɠa é boga. 
À ɠoozunɛ ʋɔɔma wa Zeluzalɛme, à ɠoozunɛ, wo ɠɔkɔ ná-faa zu, wɔiti ná-fai nɛai wo ʋɛ! Wo wɔnɔ zɔlɔɔ ná-koozunɛɛi zu, wɔiti wo ɠɛni wɔlɔzu ná-faa zu! 
Mazɔlɔɔ wa ɠɔnɔ sɔlɔɔ ná-ɲiimii zu, é wo ɠaanɛɛnɛ, eyɛsu wo yiɠo, wa ɓɔɔle, wo daamii ʋagɔi wo, ná-lɛbiya wolai zu, pooʋaai. 
Mazɔlɔɔ Ɠɔoɠɔ GALAGI wooi ɠaa: «Nà ʋaazu ziilɛigi yeizu Zeluzalɛme ma eɠɛ ziɛ wolai, ta zii ɠiligiti ta-naavoloi eɠɛ kɔtuɗɛi é vazasu. Wa ɲiimii ɓɔle, ti wo la yeezu, ti wo la ɠɔɠɔ ma, ti ɗa yeeziɛ wo ma. 
Nà wo ɠaanɛɛnɛ, eɠɛ doungoi dee gaanɛɛnɛzu, wa gaanɛɛnɛi zɔlɔɔ Zeluzalɛme. 
Wa naa ɠa, wo ɠoozunɛ wo-yiimaʋɛ, wo-ɠaeiti ta niinɛ ʋolu eɠɛ tufai.» Mazɔlɔɔ Ɠɔoɠɔ GALAGI ɠa ná-botiɠɛ nuiti maalobo, kɛlɛ toɠa ná-ziiɠaawanai lɛ ga sili nuiti. 
Mazɔlɔɔ Ɠɔoɠɔ GALAGI ɠa yɛsu abui zu, é ɗa ʋa, ná-kɔɔɠɔ wotoloiti ta ʋaazu eɠɛ tɔngɔlɔ fiilɛi, ti ná-ziiɠaawanai ma wanai ɠula, ti ná-kpaazaɠai laazeeli eɠɛ abuzogi. 
Mazɔlɔɔ abui ta boɠa zɔkpɔi ti ka Ɠɔoɠɔ GALAGI ná-tukpɔi ɠaaleʋezu la nuɓusɛiti daalɔɠɔma, Ɠɔoɠɔ GALAGI ɠa pooma mɔinmɔin da. 
«Niiti ti ɓɔɠɔ ɲadesu yɛ, ga ti lɛ kpelei tanigaa zu, ʋɛ ti ʋaazu ti lo ná, naama nui ʋoluʋelei nii é zaamazuʋɛ, ti ɗa boi suai mi, ɓaa inɛgi, aniiti ti ɠɔzɔai. Naama nuiti undaaʋilisu nɔ ʋɔɔma,» Ɠɔoɠɔ GALAGI wooi ɠana. 
«Mazɔlɔɔ nɔ̀un nà, gè ta-ɠɛɛwotii pɛ kwɛɛ ta ta-ɠisiɛiti. Wɛlɛ, yeeɠɛɠalai zeelia, gè zii ɠiligiti pɛ gaalɛ ba, ta nuɓusɛiti zii wooi ɠilagilagi pɛ su. Ta ʋa, ti nà-lɛbiyai ɠa. 
Nà nà-zobodai ma ʋoogi ʋilɛ ti zaama. Zɔiti ta yɛ vulua nà-tukpɔɠaaleʋeai ʋoluma, nà ti leʋe zii ɠiligiti saama: Taalasise, ta Pule, ta Lude (zɔiti ti zoogai mɛɛin ʋilisu), ti li Tuɓale nuiti pɔ bɛ, ta Yavan nuiti, ta ziɛ zaama yooiti ta kpoloɗɛi laaʋɛ yooiti ti ɠoozama, ʋɛ pɛ nu la dɛ nà-faa mɛnini ná, nu la dɛ nà-lɛbiya ɠaani ná. Nà-nu leʋegaiti ta nà-lɛbiyai ɠula kɛlɛma zii ɠiligiti pɛ bɛ. 
Ta ʋa ga wo-ɠɛɛleaiti ti ɠula zii ɠiligiti pɛ saama, ti zeini sooiti kɔma, wotoloiti su, wotoloiti su seɠei ti maazu, soovale fuuluiti kɔma, ta ɲɔmɛiti, eyɛsu ti zeeli nà-gize ɲadegai ma Zeluzalɛme. Ta-vebɛanii ɠa ɠɛ ga naa bɛ̀, nà yeezei bu, eɠɛʋelei nɔ Izilayɛle nuiti ta ɗa ʋaa la bɛ̀ aniɲaka ɲadegai zu nà-pɛlɛi wu. 
Nà zalaɠa ɠula nuiti seɠe ti zaama, ta Levi nuiti,» Ɠɔoɠɔ GALAGI wooi ɠana. 
«Ʋelei geeɠɔlɔ niinɛi ta zou niinɛi gè ʋaazu ti ɓɛtɛzu, ti yɛsu ná la ɠɔ, ʋele ɠana wo-mavofodai ta wo-laaseigi a yɛ ná la ɠɔ,» Ɠɔoɠɔ GALAGI wooi ɠana. 
«Zenɔ ɠana, alu-o-alu, dooɠo folo-o-dooɠo folo, nuɓusɛiti ta ɠɛ ʋaazu, ti ɗa nɔkɔ bù,» Ɠɔoɠɔ GALAGI wooi ɠana. 
«Naazu ta ɗa ʋa, ti nuiti ma ʋoomaiti ka, tɛiti ti la ɠɛni ɠoloni bɛ̀. Mazɔlɔɔ koegi é ti miizu, é la zaa pɛ, abui é ti ɠalazu, é la zaa pɛ. Naa ɠa ɠɛ ga nuɓusɛi pɛ maalua vaa.»
