﻿Ezayi.
65.
«Gè ɓɔɠɔ yɛni ná, naati ti wooɠula mà, niiti ti la ɠɛni màaɠaazaɠabosu, gè ɓɔɠɔ yɛni ná, naati ti kà, zɔiti ti la ɠɛni gàiziɛzu. Zii é la ɠɛni wooɠulazu mà, gè ɠɛni ma: ‹Nà ɠaa, nà ɠaa!› 
Yeenɔpɛ ka zèe maalegai la nuɓusɛiti ma ti la ɠoloni, ti ziɛzu ga pele ɲɔi, ti ʋilɛgai ta ɓɔɠɔ ɠisiɛ ɲɔiti polu. 
Nuɓusɛiti be ti la ɓesu zìiɠaawana vai ʋa, ta zalaɠaiti kulazu kpeleiti su, ti ɗa ansansegiti kula ga zalaɠai zalaɠa ɠula ɠɔtuiti ma zɛɛ ɠalagiti bɛ. 
Ta ɗa zei kabaiti saama, ti ɗa gɔvɛiti gaazaɠa, ti ɗa ɲi kɔtu yeɠeiti su, ti ɗa boi suai mi, ti ɗa ta-laami aniɲakaiti daave ga kɔzɔba laamianigi. 
Ta nu ta ɠomina, ti ɠɛ ma: ‹Mina maaɓuɠa bà, è ʋa vɔɔɠu bà, mazɔlɔɔ gòla ɲadegɛ è ʋɛ.› Naama ziɛ ʋeleiti lɛɛzu sòkpayeɠei zu, eɠɛ abu luului, abui é zosu foloi pɛ nɔ. 
Kɛlɛ gè ti-ziɛ ʋelei pɛ sɛʋɛa, naa li poun gè ʋa maaɠɛ kpɔ. Nà ti zalazu, é zeeli su. Nà ta-vaaɠaaza golaiti salazu 
ʋɔɔma ta ti-mɛmɛwolani tɔnɔi. Ti ansansegiti galani gizei ma zɛɛ ɠalagiti bɛ. Nà kɔɠɔgi wo, é zoloo su, ta-ɠɛɛwoti wɔlɔmaiti ma zalai.» Ɠɔoɠɔ GALAGI ɠa é boga. 
Ɠɔoɠɔ GALAGI wooi ɠaa: «Siɛgi zu nu a ziɛi ɠaa la ga mɔinga dɔɔɓɔi gwaai ma ɠɔpɔgi ta zu, ta ɗa ɠɛ ma: ‹À mina koloɠolo, mazɔlɔɔ tuya ɠa ba.› Ʋele nɔ ɠana nà kɛ la nà-botiɠɛ nuiti maaʋele ma, naa ɠa a kɛ gè mina ti pɛ koloɠolo ʋɔɔma. 
Nà mavofodai ɠula Zakɔɓe ná-nuɓusɛiti su, ta Zuda wolodai, ti nà-gizeiti zeɠe ga tɔnɔ. Zɔiti gè yiimazeɠeni ga tiye, naati ta sɔlɔɔ ga tɔnɔ, nà-botiɠɛ nuiti ta zei ná. 
Salon nɛmɛi ɠa ɠɛ ga tufa lɛnugi, daami wosuʋɛ togani goiti bɛ, Akɔɔl nɛmɛi zu ɠɛ ga sasai togani wolaiti bɛ, naa ɠa ɠɛ nà-nuɓusɛiti bɛ, ta gàiziɛ. 
Kɛlɛ wɔiti wo ɠɛlɛzu Ɠɔoɠɔ GALAGI ʋa, wo yeemazu nà-gize ɲadegai ma, wo daamianigi veezu Gade ya, undaanɛ ɠalagi, wo ɗa dɔɔ zupui ve Meni ya, sei tuɠɔ ɠalagi. 
Nà ʋaazu ga boɠa zɔkpɔi wo ʋɔ, wo pɛ wa ʋilɛ ɲiibiɠa, wo ɠɔdaaleʋe, mazɔlɔɔ gè toligi woni, wo la daazoni, gè ɓɔɛni wo ʋɔ, wo la woiloni. Kɛlɛ nii ɲɔuɗai gàazu, naa ɠa wo kɛɛzu. Nii wo yiimazeɠeni la, naa ɠa é la nɛɛni bɛ̀.» 
Naa ɠa é ba, Maliɠii Ɠɔoɠɔ GALAGI wooi ɠaa: «Nà-botiɠɛ nuiti ta ani zɔlɔɔ, ti mi, wɔun wa, wa pului ɠwɛɛ. Nà-botiɠɛ nuiti ta ɓɔɔle, wɔun wa, wa za ga kpɔɔle wɔin. Nà-botiɠɛ nuiti ta ɠɛ koozunɛɛi zu, wɔun wa, wa ɠɛ unfegi zu. 
Nà-botiɠɛ nuiti ta wooɠula ga koozunɛɛi, mazɔlɔɔ ta ɠɛ gaanɛɛi zu. Kɛlɛ wɔun wa, wa kpeei loo, wo-yiimaʋɛ laavegai ga ziizoolɛi, wa kpeei loo, wo ɓɔɠɔ maawɔin, wo yiiɠoloɠolo. 
Wo-laaseigi ɠa yɛ nà-nuiti da, gè yiimazeɠeai ga tiye, ti ɗa foovooi loo la ga: ‹Maliɠii Ɠɔoɠɔ GALAGI è ʋaa ɠanu!› Kɛlɛ toɠa daasei niinɛ ʋɛɛ ná-botiɠɛ nuiti ba. 
Zooi ɠa, niiti ta ɠɛ pɔ, ti tuya loo ɓɔɠɔ ʋɛ, ta naa ɠɛ gaama ƓALA gila kpegi laaseigi zu. Zooi ɠa, niiti ta ɠɛ pɔ ga ti ɠona, ta konai wo gaama ƓALA gila kpegi laaseigi zu.» «Zeemai ɠa wo kidaaʋili faiti ma ti leʋegai ná, naati ta ɲɛɛlɛ gàazu. 
Mazɔlɔɔ nà ʋaazu geeɠɔlɔ niinɛi ɓɛtɛzu ta zou niinɛi, nu ɠi ge la mɔ loa pɛ mɔungi vaa wɔlɔmaiti su, nu la mɔ ɠisiaa ti zu pɛ. 
À ɠoozunɛ tɔun, wo ɠɛ koozunɛɛi zu yeenɔpɛ naama vaa zu, nii gè ʋaazu kpɛtɛzu, mazɔlɔɔ nà Zeluzalɛme ɓɛtɛzu, é ɠɛ gaanɛɛi zu, ná-nuɓusɛiti ti ɠɛ koozunɛɛi zu. 
Nà ɠoozunɛ nà ɓɔɠɔi Zeluzalɛme ná-faa zu, nà-nuɓusɛiti faa ɠa ɠɛ ga nà-koozunɛɛi ma ungi, nu la mɔ kpee woo mɛniga ná, ɓaa kidaaʋili kpee. 
Nu la mɔ doungo ɠaa náʋɛ é ʋa yɛ doungoyai zu, é ʋa za, ɓaa kpakologi é la wɔlɔzaɠani gola. Mazɔlɔɔ zɔi a zaana ná-kona ungilagi (100) ma, naa zaa nu niinɛlai zu, ni nui ta la ɠɛ ɓudɛni kona ungilagi (100) maazu toɠa leve ga kotoʋɛ. 
Ta pɛlɛiti to, ti yɛ ti wu, ti leezɛn ɓeleiti da, ti ma waaiti mi. 
Ti la mɔ pɛlɛiti toga ga taɠiligaa ti zei bu ti-ʋotogi zu, ti la mɔ gulu ɓeleiti daa ga taɠiligaa ti-laamiani. Mazɔlɔɔ nà-nuɓusɛiti sii zu ɠa ɠooza eɠɛ gulu wolaiti. Nuiti gè yiimazeɠeai ga tiye, ta yiimaɠɛ ta-wotii ma lɔnɔgi zu. 
Ti la mɔ ɓɔlɔa wafuun, dointi ta ti zɔlɔɔ, naa tanɔpɛ ge la mɔ ɠɛa ná undaaʋili faa ma. Ti-ma zuwuzui ɠa ɠɛ ga nii Ɠɔoɠɔ GALAGI tuyai loai ma, ti-mavofodai nɔnɔ zɔlɔɔ ti ɠoba. 
Aisa ti ʋa wooɠula mà, gè ɓega ga ti wooɠaaʋote, aisa ti ʋa ɓe ga ɓɔɛ, gè ɓega ga ti wooɠaaʋote. 
Zuluɓui ta baala ziʋoi ta ɠɛ tufai miizu ada ɠila, zalai ɠa ɠɛ tufai miizu ga nikɛi ɠɛʋele, kaalii laamianigi ɠa ɠɛ ga fufiligi. Faa ɲɔu ɓaa faa zuɠoloɠolo faa nɔpɛ ge la ɠɛa nà-gize ɲadegai ma,» Ɠɔoɠɔ GALAGI wooi ɠana. 
