﻿Ezayi.
54.
Wooɠula ga koozunɛɛi, ɗɛi è ɠɛni ga doun zɔlɔɔtala anzanui, è la ɠɛni doun zɔlɔɔni! Guyei loo ga koozunɛɛi, è wooɠula la, ɗɛi è la doun ɠoozuwana woni! Mazɔlɔɔ Ɠɔoɠɔ GALAGI boni ga: «Anzanui kɛlɛi wogai ba, ná-dointi ta mɔin, é leʋe anzanui nɔnɔi ʋa, nii é zini bɛ.» 
Ɗa-zeɠe ɠotai zuwɔɔlɔ, è ta ʋili ɗa-landaiti su è-zeizuʋɛ, mina naavoloi ɠaalu, nii ɗa kula! Ɗa-zeɠe ɠotai ma ɠaluiti sumɛɛn, è gulu ɠaazoɓagiti pilɛpele ɓɛtɛ! 
Mazɔlɔɔ è maa ɠa wɔɔlɔzu adaʋɛ pɛ, è-mavofodai ɠa zei zii ɠiligiti unda, ti taa wola zuɲakaiti sulaave. 
Mina lua pa, mazɔlɔɔ è la unfega, mina unfe, mazɔlɔɔ ɓaa la ɠulaa è ma. Kɛlɛ ɗa yeema è ma nu niinɛ yeei ma unfegi ma, è-ɠi ge la mɔ loa ɓaaɠulamai zu è sɔlɔɔni, è ɠɛai ma ga poanzai. 
Mazɔlɔɔ è Ɓɛtɛ Nui ɠa é ga è-zinigi, daasei ka ga: «Ɠɔoɠɔ GALAGI, Fai-Pɛ-Maliɠii». Tɔ ɠa é ga è unmɔɔ nui, Izilayɛle ná-GALA Ɲadegai, daasei ka ga: «Eteai pɛ ná-GALAGI». 
Mazɔlɔɔ Ɠɔoɠɔ GALAGI ɠa è lolisu ʋolu eɠɛ anzanui nii sinigi daalooni, é lɔ ziizoolɛi zu, sinigi tolisu ʋolu, tɛigi é ɠɛni ga naa ziɛpolu ɲɔɠɔi ma nu niinɛlai zu, kɛlɛ é ɠɛlɛ ba. Naa ɠa Ɠɔoɠɔ GALAGI ɗa-ƓALAGI bosu è ma. 
«Gè ɠɛlɛni ɗa yeeɠɛɠala go laawu, kɛlɛ nà-maawɔinɠaa wolai zu, nà yeezeizu è wu ʋolu. 
Ziiɠaawana wolai zu, gè ɠɛlɛni ga gè mina è ʋɛtɛ, yeeɠɛɠala go laawu, kɛlɛ nà-nɛɛbɛi maaʋele ma, nii kwɛ ge la ba, nà è maawɔinɠaazu.» È Unmɔɔ Nui Ɠɔoɠɔ GALAGI ɠa é boga. 
«Toɠa zèa eɠɛʋelei Nowe ná-foloiti ti ɠɛni la, gè ɠonani názu ga undaaʋili ɗɛi la mɔ ʋaa, é ʋa eteai undaaʋili. Zenɔ ɠana, nà minazeɠezu, gè la mɔ yiiɠaawanaa è laalɔɠɔma, gè la mɔ zeliloga è ma. 
Anɛɛ ni gizeiti ta zeɠe losuʋɛti, anɛɛ ni gize nɛmɛiti ta ɲiikpi, nɛɛbɛi é zìimaʋɛ è ʋɛ, é la valiboga eyɛsu pɛ, minai gè seɠea ga gè ɗa-undaanɛɛi ɓɛtɛ, é la valiboga pɛ.» Ɠɔoɠɔ GALAGI ɠa é boga, ziimaʋɛ laavegai ga gaazumaawɔinɠai è ʋɛ. 
«Ee, taai maawɔinɗai, tɔngɔlɔ fiilɛi pɛ ge vɔɔɠuzu ba, nu la ná, é ʋa ziilɛi! Tama nɔ̀un, nà ʋaazu è losu ga niinɛ ga kɔtu zɔngɔ ɓaagiti, è ma wuulaagiti ti ɠɛ ga safiilegi ma ɠɔtui. 
Nà ɗa-ziɠigi ungaʋɛti kpɛtɛzu ga kɔtu zɔngɔ ɓaagi daa ga luɓii, ɗa-ziɠidaʋɛti ti ɠɛ kɔtuiti ti volozu, siɠigi gè è maalatisu da, naa ɠɛ ga kɔtu zɔngɔ ɓaa pagɔiti. 
È-lointi pɛ ta ɠɛ ga Ɠɔoɠɔ GALAGI ná-kaladopoiti, è-lointi ta-yiilɛigi ɠa wɔɔlɔ gola. 
Ɗa ʋoluzei telebodai ʋa. Nu nɔpɛ ge la mɔ è ɠoloɠologa ʋolu. È la lua ani nɔpɛ ba, mazɔlɔɔ maalua vai maa ɠa ɠooza è ʋa, é la maaɓuɠaa ɗa pɛ. 
Ni nua ta wuzeɠena è laalɔɠɔma, pɔ̀ ge la ɠɛa naa ʋa! Tama nu-o-nu a laalɛna è wu, naa ɠa loo bu, tɔɔzei ɗa-vaa ʋa. 
Ɠida bu, nà ɠa gè ɠain bo nui ɓɛtɛni, zunui é abui ɠaazosu, é kɔɔɠɔ zɔɔlaiti kula. Kɛlɛ nà ɓalaa nɔ ɠa gè zunui ɓɛtɛa, é ti ɠoloɠolosu. 
Kɔɔɠɔ zɔɔla nɔpɛ kpɛtɛai ga é faa ɲɔu ɠɛ ga ɗe, é la faa nɔpɛ paa. Ni nu ɠa pɔ é è maalɔ tukpɔɠaaleʋezuʋɛ, ɗɔun ɗa zoo è peelala ná. Ɠɔoɠɔ GALAGI ná-botiɠɛ nuiti ta-ɠulanumai ɠana, faa zɔlegai ɠana gè ti maalobosu da,» Ɠɔoɠɔ GALAGI wooi ɠana. 
