﻿Ezayi.
53.
Ɓɛ ɠa é ɠidaaleʋea naa ma, nii ade mɛniga? Ɓɛ ɠa Ɠɔoɠɔ GALAGI ná-zobogi lɛa la? 
Mazɔlɔɔ Ɠɔoɠɔ GALAGI ɠaazu, botiɠɛ nui wɔɔlɔni eɠɛ ani ʋɔnɔ niinɛi, eɠɛ sapei é ɠulazu zou vɔɔi wu. Ɠaazulosu la ɠɛni ba, ɓaa pasu nɔpɛ, nii da zoo ɠaazulosu ba, gaazulo pelei la ɠɛni ade ɛnɛkɛga. 
Wɔinzeɠeni, nuiti ti ɠɛlɛ ba, zunui é ɠɛni nɔ taɓai laawu, kpɔlɔi ɠuboni su, é ɠɛ eɠɛ nui ti nu ɠaazulɔɔɠuzu ba. Wɔinzeɠeni, ade la ɠɛni deveni ga ani nɔpɛ. 
Tama, ada-ɓɔlɔiti ka é ti zeɠeni, Ada-zoolɛiti ka é ti zeɠeai ga ɠasɔ. Kɛlɛ de ɠɛni ɠisiɛzu ga GALA ná-doɠai ɠa é daawu ɠana, é ɗa doɠa, é ɗa unfe. 
Kɛlɛ ada-lɔ koloɠologiti faa ɠa ti bɔɔni su, ada-vaaɠaaza golaiti faa ɠa ti suɠaleɠaleni la. Maaɠoloi nii a la zeeli ade ma, de ʋa ziilɛigi zɔlɔɔ, naama ɠasɔi laani tɔun unma. Maawanani, naa ɠa é ade ɠɛdɛni. 
De pɛ de ɠɛni ga teʋeteʋe nuiti eɠɛ baalagiti, ɛsɛ ge ɗa li ga yiima ʋelei. Kɛlɛ Ɠɔoɠɔ GALAGI de pɛ da-vaaɠaaza golai laa tɔun unma. 
Ti sopele ɲɔuni, é ɓɔɠɔmaayeini, é la ɠɛni woo ɲɛ gila kpalaa boni. Eɠɛ baala ziʋoi ti liizu la paazuʋɛ, eɠɛ baalagi maaɠɛgai kpɔ loni maaleɠa leʋe nuiti kakala, é la ɠɛni woo ɲɛ gila kpalaa boni. 
Ti soni, ti tukpɔ, ti ná-fai ɠaaɓela, kɛlɛ ɓɛ ɠa é yiizoolɛni ná-faa? É leʋeni ga é ɠula vulu nuiti ta-eteai zu, saai zeelini ma ná-nuɓusɛiti ta-lɔ koloɠologiti faa zu. 
Ti maaɠuluni faa ɲɔu ɠɛ nuiti saama, ná-kabai ɠɛ naavolo nui ʋɔ bɛ, anɛɛ ni é la ɠɛni tooma ɠɛɛni, ta kaipa dakɔlɔgiti ti la ɠɛni zɛɛ woni. 
Kɛlɛ GALA ge vaani bu é vɔɔɠu ba ga kpɔlɔi. Kpega ʋoluma ga ɓɔɠɔ ɠula ga faazuɓɛtɛ zalaɠai, toɠa mavofodaiti ka, sii zu ɠa ɠooza gola. Toɠa Ɠɔoɠɔ GALAGI yiimai ɠɛ, é daazeeli mɛtu. 
Ɠɔoɠɔ GALAGI ɠɛni ma: «Mazɔlɔɔ kpɔlɔi pɛ suzoga ʋoluma bɛ, toɠa wozaɠa, undaanɛ. Tɔɔzei nui ma mɔinmɔin ka kwɛɛ, nà-botiɠɛ nui Telebogai ɠa ti pɛ kɛ ga telebo nuiti, é ta-vaaɠaaza golaiti da ɓɔɠɔ unma. 
Naa ɠa é ba, nà nɔnɔi ve zea bɛbɛ wolai naati saama, ta kɔɔzoganii ɠaaɠwɛ ta zɛbɛsu nuiti, tɔɔzei tɔ ɓɔɠɔi é ɓɔɠɔ lɔɔni saai zu, é vaani bu, é ɠaalu tɔ koloɠolo nuiti saama, mazɔlɔɔ é ma mɔinmɔin ná-kotoiti daani unma, é faa ɲɔu ɠɛ nuiti maalogi woni.» 
