﻿Ezayi.
49.
Wɔiti wo zeini ziɛ zaama yooiti ta kpoloɗɛi laaʋɛ yooiti su, à woilo gòoi ma! Nuɓusɛiti wo ɠoozamaʋɛti, à woilo gòoi ma! Gè yɛni dèe ɠoozu, Ɠɔoɠɔ GALAGI tòli, é dàaseigi woni, aisa gè ʋa zɔlɔɔ. 
É dàawooi ɠɛɛni ga boɠa zɔkpɔi gaaliai, toɠa dɔ̀ɔɠuzu zeei ma niinigi wu. É kɛ̀ɛni ga mɛɛn ɠaazoɓagi, é dɔ̀ɔɠuni ná-mɛɛn ʋili ɓɔlɔi zu. 
É ɠɛni mà: «Ɗɛi è ga Izilayɛle, ɗa ga nà-botiɠɛ nui, nii gè nà-lɛbiyai pɛ kulazu kɛlɛma ga tɔun maaʋele.» 
Anɛɛ naa ʋe, nɔ̀un gè ɠɛni: «Gè ɓɔlɔni nɔ fuun, é nɔ ga faa ɲaka lein nɔ, ungo, tooya vaa nɔ ɠa gè suvikɛi ʋuai ya la. Kɛlɛ Ɠɔoɠɔ GALAGI ɠa ɓaazu nà-tɔnɔgi maazu, nà-kulanumai ɠa nà-GALAGI ʋɔ bɛ.» 
Niizu Ɠɔoɠɔ GALAGI ɠa ɓɔɛzu, tɔ ɠa é kpɛ̀tɛni dèe ɠoozu, gè ʋa ɠɛ ga ná-botiɠɛ nui. Toɠa pɔ ga gè ʋa ga Zakɔɓe mavofodai tɔun pɔ, gè Izilayɛle nuɓusɛiti gaalɛ ba tɔun koba. Gè maamusɛi zɔlɔɔni Ɠɔoɠɔ GALAGI ɠaazu, mazɔlɔɔ nà-GALAGI ɠa é ga nà-zobogi. 
É boni ga: «È la ɠɛɛzu ga nà-botiɠɛ nui Zakɔɓe ná-bolodamaiti buzeɠe vai nɔ ma, ɓaa niiti gè ti makɛgai Izilayɛle nuiti su, naati gaalɛ ba vai nɔ ma pɔ̀ bɛ. Nà è losu, è ɠɛ ga zii ɠiligiti ta-wozakalagi, nà-kizo fai ʋa ɠula kɛlɛma, eyɛsu zou ɓela ga.» 
Ɠɔoɠɔ GALAGI wooi ɠaa, nii é Izilayɛle unmɔɔsu, é ga ná-GALA Ɲadegai, toɠa ɓɔɛzu è ʋɔ, ɗɛi è ga nui ti wɔinzeɠezu, nuiti ti ɗa ɓaaɠula ma, ɗɛi è ga deve wo nuiti ta-luɔi: «Masagiti ta è ʋɛtɛ, ti wuzeɠe ta-masa kpɔkpɔgiti ga. Siɛgi zu kundiɠiiti ti è ʋɛtɛsu da, ta nɔkɔ è wu, ga ti Ɠɔoɠɔ GALAGI lɛbi, nii é ga wooɠɛɠila nui, ungo, Izilayɛle nà-GALA Ɲadegai, é yiimazeɠeai ga ɗe.» 
Ɠɔoɠɔ GALAGI wooi ɠaa: «Gè è wooɠaaʋoteni yeeɠɛɠala ʋagɔi, kizogi ma voloi gè ɓɔni è ʋa. Nà è makɛ, gè è zei ʋele ɓɛtɛ, è minazeɠe kɛ nuɓusɛiti bɛ, è zooi unbuzeɠe, zou ɲadegai ʋɛti náti koloɠologai, è naama yooiti gaaɠwɛ, 
ga è ɠɛ kasoɠa nuiti ma: ‹À ɠula,› ta niiti ti kpidii zu: ‹À ɓɔɠɔ lɛ!› Ta ɠɛ eɠɛ togani ɓulugiti, ti-laamiizuʋɛ ga pele ɠobaʋɛ, ti ti-ɠɔnɔgi zɔlɔɔ gizeiti ma. 
Pului la mɔ ti zoga ɓaa kpɔɔle wɔin. Diegi é teʋebai zu ta foloi, naati ti la ti ɠalaa, mazɔlɔɔ zɔi é ti nɛai ʋɛ, naa lo ti luɠɔ, é li ga tiye ziɛungiti pɔ bɛ. 
Nà nà-gizeiti pɛ falibo, ti ɠɛ ga peleiti, nà-peleiti buu ɠa zeɠe, ti ɠaaɠooza. 
Wɛlɛ tiya ɠanu ti ʋaazu. Ta zeɠezu ɠoozama, tanigaa lɛkpɛmaʋɛ nu ɠɔʋɛzuʋɛ, tanigaa folo liizu ʋelei, ti ʋa kpoloɗɛi ɠa, tanigaa lɛkpɛmaʋɛ nu yeezazuʋɛ, ti zeɠe Ezipete yooi zu.» 
Geeɠɔlɔgiti, à wa-ɠoozunɛɛi ɠula kɛlɛma! Zooi, ɠɛ koozunɛɛi zu! Gizeiti, à ɠɔkɔ ga koozunɛɛi! Mazɔlɔɔ Ɠɔoɠɔ GALAGI ná-nuɓusɛiti gaanɛɛnɛa, ná-nuiti ti maawɔinɗai, é ti maawɔinɠaa. 
Siyɔn ɠa ɠɛɛzu ma: «Ɠɔoɠɔ GALAGI ɠɛlɛ bà, Màliɠii yeema mà!» 
«Anzanui ɠa yeema nɛi ná-doun ɲɛgi ma, é kulazu su? Toɠa ɓe ná-doin nɛɛzuʋɛ é sɔlɔɔgai? Anɛɛ ni doun deeiti ta yeema ti-lointi ma, gè la yeema è ma pɛ! 
Wɛlɛ gè è-laaseigi zɛʋɛa zèaʋɛti, ɗa-ziɠigiti ta gàazu yeenɔpɛ. 
Zɔiti ti ʋaazu è losu ʋolu, naati gaazuvilɛʋɛ ga ti ʋa, zɔiti ti è woloni ta zɔiti ti è ɠoloɠoloni, naati ti lia, ti maaɠooza è ʋa. 
Ɠaazu wuzeɠe, è wɛlɛ è-maaɠoolii zu, ti ɠaalɛa ba ti pɛ, ti ɗa ʋa è ʋɔ bɛ. Eɠɛʋelei gè vulua la ga ɠite, ɗa ti loo ɠɔba, eɠɛ kɔbu ani ʋagɔi, è ɓɔɠɔ maaɠili ga tiye, eɠɛʋelei anza ɓeai a ɗa ná-saamaɠiligi ɠili la,» Ɠɔoɠɔ GALAGI wooi ɠana. 
«Mazɔlɔɔ ɗa-yooi koloɠolo suɲakai, gaaʋalagai ba, su ɠa lɔizu ɗa-nuɓusɛiti ma, zɔiti ti ɠɛni loozu è ma, naazu naati ti ʋelaa, ti maaɠooza è ʋa. 
Ɗa è-lointi goomɛni ʋolu, niiti è ɠɛɛzu, è ʋalani ti ma, ti ɗa ɠɛ ʋolu: ‹Adaʋɛ tɛi wola lɔiʋɛ gi ma. Seizu ve gi ya, ʋɛ gá zei ná!› 
Ɗa ɠɛ ɓɔɠɔ ɠaazaɠasu naazu ga: ‹Ɓɛ ɠa deɠɛmu é niima lointi pɛ sɔlɔɔgai bɛ̀? Gè ʋalani dòinti ma, ki ge la ɠɛa na ga nà taɠili sɔlɔɔ, ti kpɛ̀ɛ, gè li duɔlai zu kɛlɛbai zu. Ɓɛ ɠa é niiti kulani su? Nà ɠila nɔ ɠa gè ɠɛni ʋa, niiti ma, mini ɠa ti ɠɛni ná?› » 
Maliɠii Ɠɔoɠɔ GALAGI wooi ɠaa: «Nà yeelɛɛzu zii ɠiligiti ma, gè poogi lɛ ga nuɓusɛiti, ta è-loun zunuiti pɛɛ yiila, ti ʋa ga tiye, ti è-loun anzanuiti zei ɠɔma, ti ʋa ga tiye. 
Masagiti ta ɠɛ ga è-lointi kala nuiti, masagiti ti-loun anzanuiti ti ɠɛ ga ti ɠulasu nuiti. Ta nɔkɔ è wu, ti unpilɛ zooi ma, ti è ɠɔɠɔa zaʋalagi ma vufiligi ɠɔmɔ. Ɗa suɠwɛɛ naazu ga nà ɠa gè ga Ɠɔoɠɔ GALAGI, zɔiti ta ɠito bà, ti la unfega pɛ.» 
Kɔɔɠuluɓai ná-kɔɔzoganii, naa ɠa zoo ɠulazu zea nɛi ɓaa? Fɔɔnɛ nui ná-kɔɔ luɔi, nu ɠa zoo nɛi é kula zea ɓaa? 
Ɠɔoɠɔ GALAGI wooi ɠaa: «Ungo, kɔɔɠuluɓai ná-kɔɔ luɔi ɠa ɠula zea, fɔɔnɛ nui ná-kɔɔzoganii ɠa ɠula zea. Nà ɓɔɠɔ ɠa gè è zakpe nui zakpesu, gè è-lointi unmɔɔ. 
Nà ɓɔi è zili nuiti da, ti ɗa ɓɔɠɔ ma zuai mi, ti ti-ɲamai ɓɔle, é ɗa ti zo eɠɛ dɔɔ niinɛi. Nuɓusɛi pɛ ka kwɛɛ naazu ga nà ɠa gè ga Ɠɔoɠɔ GALAGI, è Ɠizo Nui, è Unmɔɔ Nui, Zakɔɓe ná-Zɛbɛ-Su-ƓALAGI.» 
