﻿Ezayi.
48.
À woilo nii ma, Zakɔɓe ná-nuiti, wɔiti Izilayɛle laaseigi ʋɛai wo ʋa, wɔiti wo ɠulaai Zuda mavofodai zu. Wa konai wosu Ɠɔoɠɔ GALAGI laaseigi zu, wa Izilayɛle ná-GALAGI valizu, kɛlɛ wo la kɛɛzu gaamai zu ta telebodai! 
Wo ɓɔɠɔ laasei pɛa ga taa ɲadegai zu nuiti. Wɔi wo ʋoluzeiɗai Izilayɛle ná-GALAGI ʋa, nii daa ga Ɠɔoɠɔ GALAGI, Fai-Pɛ-Maliɠii. 
«Faiti ti leʋegai kaite suɠooza, gè naati boni wo ma. Gè ti laazeelini wo ma, gè wo loo ɠisu é lo ti ʋa. Gaamanɔ gè botii ɠɛɛni, ti pɛ ti ɠɛɛni. 
Gè kwɛni ga wa-vai ɓaaʋɛ, è-ɠɔgi ɠɛɛʋɛ eɠɛ kɔlu lukpɔi, è-loʋalaʋɛ ɠa ga kɔlu ɓɔigi. 
Kaite gè niima vaiti boni è ma ná luɠɔ, gè ti woni, è ti mɛni, aisa ti ʋa ɠɛ, naa ɠa a kɛ è mina ɠɛ ma: ‹Nà-kɔɔɠɔ ganigi ɠa é niima vaiti kɛai, nà-vololibai ɓaa nà-kɔlu ɠaawuungai ɠa é ma leveiti feeni.› 
È mɛnini ga pagɔ, wɛlɛ ga ɠaazuʋɛ, ti pɛ ti ʋilɛga su. Wa ɓalaa wo la daazeelia? Nà ga faa niinɛiti bo è ma, ti lɔɔɠuai, è la ti ɠwɛɛ. 
Ti ɓɛtɛa nɔ ɠa niizu, é la ga kaite, eyɛsu za voloi è la ɠɛni dɛ ta mɛnini, é ʋa wo, è ʋa zoo ɠɛɛzu ma: ‹Gè ɠɛa niina kwɛɛ!› 
Ɓa, è la ɠɛni ta mɛnini, è la ɠɛni tanɔpɛ gaaɠaani kaite, ta la looni è woizu. Mazɔlɔɔ gè ɠɛni è ɠwɛɛ, gè è ɠwɛɛni ga yaava nui. Ungo, è-laasei ka ga: ‹Zɛgai dee ɠoozu é ɠɛ ga kololala nui!› 
Kɛlɛ tɛi gè ga GALA, gè nà-ziiɠaawanai zuzoni. Nà-lɛbiyai maaʋele ma, gè ɓɔɠɔ zo, gè mina è-ma zuwu ɠaaleʋe. 
Gè è ʋoluɠulaa, é la ga walii ɠaawuun faa, ungo, maanɔɠɔi ma liɠii ɠa gè è ʋoluɠulaai su. 
Nà-nɛɛbɛi maaʋele ma, nà ɓɔɠɔi nà-nɛɛbɛi vaa ɠa gè kɛɛzu ma, mazɔlɔɔ gè la zooga gè ʋa va bu, ga tɔ̀ɠɔi ʋa ɠoloɠolo. Lɛbiyai a ve bɛ̀, gè la zooga gè ʋa va bu, naa ʋa ve taɠili bɛ. 
«Woilo gòoi ma, Zakɔɓe mavofodai, Izilayɛle, ɗɛi gè è lolini, nà ɠɛʋele ma yeenɔpɛ, nà ga ma mɔungi nà ga ma ɠaaɓelagi ɓalaa. 
Nà ɓɔɠɔi zèeiti ka gè zooi ɓɛtɛni la, zèezai ɠa gè geeɠɔlɔgiti kpɛtɛni la, nà ti lolina, ta ɗa ʋa ʋɔɔma, ti ɓɔɠɔ lɛ.» 
Wo pɛ à ɠaalɛ ba, wo woilo! Ɓɛ ɠa é ti zaama, é niima vaiti boni ti ɠɛɛzu? Zɔi Ɠɔoɠɔ GALAGI nɛai ʋɛ, naa ɠa é ʋaazu ziima vaiti kɛɛzu Ɓaɓilɔne laalɔɠɔma, zeei ɠa wuzeɠe Ɓaɓilɔne nuiti daalɔɠɔma. 
«Nà ʋe, nà ʋe de, gè ɓɔɛni, nà ɠa gè tolini, gè ʋaa la. Nà ɠɛ ga zaɓu zeavaiti suɓɛtɛ. 
À maaɓuɠa bà, wo nii mɛni! Kaipa tɔɔzeizu gè la ɓɔɛni dɔɔɠuzu, niima vaiti tɔɔzei yeei gè ɠɛni ná.» Niizu, Maliɠii Ɠɔoɠɔ GALAGI tèʋegɛ ga ná-Zɛnvui. 
Ɠɔoɠɔ GALAGI wooi ɠaa, è Unmɔɔ Nui, Izilayɛle ná-GALA Ɲadegai: «Nà ga Ɠɔoɠɔ GALAGI, ɗa-ƓALAGI, nà è ɠalasu ɗa-ɠulanuma vai ma, gè pelei lɛ ga ɗe, nii maanɛai è ziɛ la. 
Ee, ni è ɠoloni ga pagɔ nà-deveiti bɛ! Ɗa-yiilɛigi a la ɠɛ yeizu eɠɛ ziɛ wolai, da-lelebodai ɠɛ eɠɛ kpoloɗɛi ma lakpatakpagiti. 
È-mavofodai ɠa mɔin, eɠɛ ɲaɠaegi é kpoloɗɛi laaʋɛ, daaseigi ɠaa la ʋalaga ba, é ʋa ɲɛɛlɛ gàazu pɛ!» 
À ɠula Ɓaɓilɔne ʋa! À ɓizɛ Ɓaɓilɔne nuiti ba! À ɠoozunɛ, wo zeze ga ma wooi! À daazeeli, wo faza ɠoozamaʋɛti, eyɛsu zou ɓela ga, wo ɠɛ ma: «Ɠɔoɠɔ GALAGI ná-botiɠɛ nui Zakɔɓe unmɔɔga.» 
Siɛgi zu é loni la ti luɠɔ, ti ɗa ziɛ teʋebai zu, kpɔɔle wɔin la ɠɛni ti ɓɔlɔni, mazɔlɔɔ é ziɛi ɠulani ti ʋɛ fasai ʋa, é kɔtu wolai ʋalini su, ziɛi zulu. 
Kɛlɛ Ɠɔoɠɔ GALAGI ɠɛ: «Ziilɛi ge la faa ɲɔu ɠɛ nuiti bɛ pɛ!» 
