﻿Ezayi.
46.
Galagi Ɓɛle loa bu, galagi Neɓo zuɓiliga. Ma kɔɔɠɔ ganigiti ti vea suaiti zea, ta toganiiti ti ɗa ɠasɔ ti wu. Kɔɔɠɔ ganigi tɛiti wo ɠɛni ti zeɠezu, tiya ɠa na ti ɠɛa ga kasɔi suaiti bɛ, ti ɓɔlɔai. 
Galagi naati ti ɓiliga, ti loa bu ʋɔɔma, ti la zooni ti ʋa ti ma niinigiti kizo, tiya ɓɔɠɔi ta ga li duɔlai zu. 
«À woilo gòoi ma, Izilayɛle nuiti, Zakɔɓe ná-nuɓusɛi mɔtaiti, wɔi wo yɛgai wo-lee ɠoozu, gè ɗa wo maavaiti kɛ, aisa wo ʋa zɔlɔɔ, gè wo zeɠe ga ɠasɔ. 
Nà yɛ ɠɛʋele ma wo ʋɛ, eyɛsu wo wɔlɔzaɠa siɛgi zu, nà wo-maavai ɠɛ eyɛsu wɔundeɠai ɠole. Nà ɠa gè wo-maavaiti kɛɛni, nà ziɛ wo wu, ungo, nà wo-maavaiti kɛ, gè wo unmɔɔ. 
«Gá ɓɛ ɠa wa gi la ɓɔɠɔ ma, gi ʋa ɠɛ tie? Ɓɛ ɠa wo ɠɛɛzu ga ɠɛɠalai ga tɔun? Ɓɛ ɠa wa pokɔɠɔ mà, gi ʋa ɠɛ tie? 
Nui tanigaa ta ta-ɓɔlɔi zuwosu, ti walii ta zanugi ɠɔɠɔ kiloi ɠa, ti kpɛtɛ nui zala, ga é kɛ ti ʋɛ ga galagi, ti ɗa fali, ti ɗa nɔkɔ bu. 
Ta ta-ɠalagi zeɠezu, ti da ɠɔma. Ʋɛ ta da ná, miná é yɛsu ná. É la ɲiikpiga daazuʋɛ. Ni nu a wooɠulana ma, é la gooɠaaʋote fea, é la nu ɠizoga faaɓaagi ma.» 
«À ɠitoo naa zu, wo zɛbɛzeɠe ʋolu, wɔi wo kololalai ɠɛɛni, à nimiza wo-yiimaʋɛ, wo zeɠe niima faiti polu! 
À ɠitoo faa wɔlɔma mɔungiti su, mazɔlɔɔ nà ga GALA, taɠili ge la ná nɔ̀un polu. Nà ga GALA, taɠili nɔpɛ ge la ɠulani ga ze. 
Nà ɗa bo tɔɔzeizuʋɛ nɔ, nii é ʋaazu ɠɛɛzu ma luɠɔi zu, naa yɛ poun, é la dɛ ɠɛɛni. Nà ɠa gè bosu, nà-faazeikpasui laa ɠa zeeli, ungo, nà zìima vai pɛ kɛ. 
Wɔnii é zɔiti miizu, nà tolisu, é zeɠe folo ɠulazu ʋelei, toɠa ga zunui é zìima vaiti daazeelizu, gè toli zooi zu, ʋɛ ná maaɠoozaai. Nii gè boni, nà naa ɠɛ, nii gè deveni, nà naa ɠɛ. 
À woilo gòoi ma, nuiti ti la faa ɠaaɠaa fala, wɔi wo maaɠoozaai telebodai ʋa. 
Su la mɔ ɠoozazu, gè ʋa gè tukpɔi ɠaaleʋe, nágo ʋe na, gè la mɔ lɛbisu, nà ɓɔɠɔi ɠa gè ʋaazu ga unmɔɔ fai Siyɔn ʋɔ, gè nà-lɛbiyai ve Izilayɛle ya.» 
