﻿Ezayi.
45.
Ɠɔoɠɔ GALAGI wooi ɠaa Siluse ʋɔ, zunui é yiimazeɠeai la, é gulɔi ziaai ma, é sogai zee ʋa, ga é zii ɠiligiti maaɠolo tuɠɔ, ga é masagiti ta-zobogi ɠula ti ya, siɠidaʋɛti ti laaɠulugai taaiti ma, ti laalao tuɠɔ: 
«Nà ɓɔɠɔi nà li è luɠɔ, ʋɛti náti ɲɔuɗai, gè ti ɠaa ɠɛ sɔli, gè kɔlu ɓɔigi ma ɓogiti suɠaleɠale, gè kɔlu zɔɠɔgiti suɓulukpulu. 
Naavoloiti ti lɔɔɠuai, nà naati fe è ya, ta kulanumaiti ti lɔɔɠuai. Ɗa suɠwɛɛ naazu ga nà ga Ɠɔoɠɔ GALAGI, nɛ̀i gè è lolisu ga è-laaseigi, nɛ̀i gè ga Izilayɛle ná-GALAGI. 
Nà-botiɠɛ nui Zakɔɓe maaʋele ma, Izilayɛle gè yiimazeɠeni la, gè è lolini ga è-laaseigi, gè lɛbiya losu veeni è ya, anɛɛ ni è la ɠɛni kwɛ̀ɛni. 
Nà ya, nà ɠa gè ga Ɠɔoɠɔ GALAGI, gala kili ge la ná nɔ̀un polu ɲɛgɛlɛin, taɠili ge la ná nɔ̀un polu. Gè è zaamaɠilini ga zɛbɛi, anɛɛ ni è la ɠɛni kwɛ̀ɛni. 
É zo folo ɠulazu, é li folo liizu, ɛsɛ pɛ ge kwɛɛ ga ani ɠili ge la ná nɔ̀un polu. Nà ɠa gè ga Ɠɔoɠɔ GALAGI, taɠili ge la ná nɔ̀un polu. 
Nà ɗa wozakalagi ɠulaa, gè kpidii ɓɛtɛ. Nà ɗa undaanɛɛi ve, gè maanɔɠɔi ɓɛtɛ. Nà, Ɠɔoɠɔ GALAGI, nà ɠa gè naa kpein kɛ. 
«Ee, geeɠɔlɔgi, kizogi ʋu, é zeɠe geezuʋɛ eɠɛ nɔɗagi! Tonaɓiingiti ti telebodai ʋu. Zooi laalao, é kizo fai yɛna, é vaza, telebodai ʋɔnɔ! Nà, Ɠɔoɠɔ GALAGI, nà ɠa gè niima vaiti kpɛtɛa.» 
Maanɔɠɔ ɠa naa ʋɛ, zɔi é Kpɛtɛ Nui zakpesu! Leeni ɠa è ga ɗe, pɔlɔ liɠii zɔɔma ʋɔlɔ liɠiiti saama? Penɛi ɠa zoo nɛi é ɠɛ kpɛtɛ nui ma: «Leeni ɠa è kɛɛzu?» Pɔlɔ liɠii ɠa ɠɛ nɛi kpɛtɛ nui ma: «È yea la ʋani?» 
Maanɔɠɔ ɠa naa ʋɛ, zɔi a zoo é ɠɛ doun kɛɛɠɛi ta ma: «Doin ma ɓɛgele ɠa é sɔlɔɔni miná?» ɓaa anzanui ta ma: «Leeni vaa zu é dointi sɔlɔɔsu?» 
Ɠɔoɠɔ GALAGI wooi ɠaa, Izilayɛle ná-GALA Ɲadegai, tɔungi é kpɛtɛai: «Wa zoo nɛi wo gàazaɠa dòinti ta-vaa zu, wo devea ve zèa, maanɛai gè kɛ? 
Nà ʋe de, nà ɠa gè zooi ɓɛtɛai, gè nuɓusɛi ɓɛtɛ, gè pu ga. Nà ya, zèeiti ka ti geei zuvieni, nà ɗa devei ve su somideɠa ɓulugiti zea. 
Nà ɠa gè Siluse logai ga telebodai, nà ná-peleiti suɓɛtɛzu. Tɔ ɠa é nà-taai losu, é nà-nuiti unmɔɔ, ti liini ga tiye duɔlai zu, unmɔɔ gani vaa la su, ɓaa lobɛani vaa.» Ɠɔoɠɔ GALAGI, Fai-Pɛ-Maliɠii ɠa é boga. 
Ɠɔoɠɔ GALAGI wooi ɠaa: «Ezipete ná-kulanumaiti ta Etiyopi ná-tɔnɔiti ta Seɓa nuiti tɔnɔi, kooza nui naati, ti pɛ ta li è ʋɔ bɛ, ti ɠɛ ga ɗɔnɔ. Nuɓusɛi niiti ta ʋilɛ è ʋolu, ti ɗa ziɛ, ti ɠiliai ga galuiti, ta nɔkɔ è wu, ti ɗa è maanɛɛnɛ, ti ɠɛ ma: ‹È ʋɔ bɛ ɠila nɔ ɠa GALA ge ná, taɠili ge la ná tɔun polu, mazɔlɔɔ zɔɔma ɠalagiti pɛ ta ga fuun gani.› » 
Ee, GALA, gaamai zu, ɗa ga GALAGI è ɓɔɠɔ lɔɔɠuzu, Izilayɛle ná-GALAGI, Kizo GALAGI! 
Kɔɔɠɔ gani kpɛtɛ nuiti pɛtɛ, ɓaaɠulaa ti ma ga unfegi. Ta liizu, ti pɛ tɔungi ʋilɛgai. 
Kɛlɛ Izilayɛle nuiti kizogɛ Ɠɔoɠɔ GALAGI ʋɛ ga ɠɔoɠɔ kizogi. Wo la unfega, ɓaa la ɠulaa wo ma, eyɛsu ɠɔ. 
Ɠɔoɠɔ GALAGI wooi ɠaa, tɔ ɠa é geei ɓɛtɛni, GALAGI nii é zooi ɠazaʋini, é kpɛtɛ, é makɛsu ma, é la kpɛtɛni ga suɲakai yɛ, kɛlɛ é kɛɛʋɛ nii a kɛ ania ti zei su: «Nà ga Ɠɔoɠɔ GALAGI, taɠili ge la ná nɔ̀un polu. 
Gè la ɠɛni ɓɔɛni dɔɔɠuzu, ɓaa adaʋɛ ta ná, ʋɛ ná zuɓidiai. Gè la ɠɛni Zakɔɓe mavofodai ma: ‹À gàiziɛ fuun!› Nà, Ɠɔoɠɔ GALAGI, nii sɔlegai, naa ɠa nà ɗa bo, nà ɗa naa lɛ, nii é ga gaamai. 
«Wɔi wo yɛgai vulua zii ɠiligiti saama, à ɠaalɛ ba, wo pɛ wo ʋa, à maaɓuɠa wo pɛ. Zɔiti ti ta-zaleiti seɠezu ti ga gului, ɓaa ti ɗa gala kiligiti fali, niiti ti la zooga ti ʋa nu ɠizo, ɠi ge la naati ma. 
À wa-vaiti bo, nii wo losu ma, wo naa lɛ! À ɓɔɠɔɠaa, wo woola ma! Ɓɛ ɠa é niima vaiti dɛɛni kaite wɔlɔwɔlɔ? Ɓɛ ɠa é ti lɛɛni ma yeeluɠɔ? Nà laade ɓaa, nà Ɠɔoɠɔ GALAGI? É ɠula nɔ̀un polu, gala kili ge la ná. GALAGI telebogai, é kizogi wosu, é ɠula nɔ̀un polu, taɠili nɔpɛ ge la ná. 
«Wo pɛ à ɠaaʋote mà, wo ɠizo, wɔi wo eteai ma zokogi pɛ su! Mazɔlɔɔ nà ga GALA, taɠili ge la ná nɔ̀un polu. 
Nà ɠonazu nà ɓɔɠɔi ma, gaamai ɠa é ɠulazu dàaʋɛ, wooi nii é la zeɠea ma pɛ: ‹Nuɓusɛi kpein ka ʋilɛ ɲiibiɠa, ti nɔkɔ bù, nɛgi pɛ ge ɠona bɛ̀ ga gaamai.› 
Ta nà-fai wo ga: ‹Ɠɔoɠɔ GALAGI ɠila kpe nɔ ɠa telebodai ta zobogi zea!› » Ti unfegai nɔ ɠa a ʋa pɔ, tɛiti ti ɠɛni laalɛɛzu bu. 
Ɠɔoɠɔ GALAGI zaɓui zu, Izilayɛle mavofodai pɛ ka telebodai zɔlɔɔ, ti ɓɔɠɔ maamusɛ. 
