﻿Ezayi.
44.
«Kɛlɛ, nà-botiɠɛ nui Zakɔɓe ná-nuɓusɛiti, à woilo niina gòoi ma ga pagɔ, Izilayɛle, ɗa gè yiimazeɠeai ga ɗe.» 
Ɠɔoɠɔ GALAGI wooi ɠaa, nii é è ɓɛtɛni, é è ɠɛʋele ɓɛtɛni è-lee ɠoozu, zɔi é ga ɗa-ɓɔba nui: «Mina lua, nà-botiɠɛ nui Zakɔɓe, Yesulun, nii gè yiimazeɠea la. 
Mazɔlɔɔ nà ziɛi ʋu zooi ma, kpɔɔle wɔin ma, gè ziɛ wolaiti da zou vɔɔi zu. Nà zɛ̀nvui yei è-mavofodai ma, nà-tuyai ɠɛ è-ʋaalobai pɛ ba. 
Ta ʋɔnɔ, ti wɔɔlɔ eɠɛ kpalaga tufa wundui, eɠɛʋelei guluiti ta ɗa ɠɛ la ziɛlaʋɛ. 
Ta ɠa ɠɛ ma: ‹Nà ga Ɠɔoɠɔ GALAGI nɔnɔ›, zɔi Zakɔɓe laaseigi ʋɛɛ ɓɔɠɔ ʋa. Ta sɛʋɛ zeei ma ga: ‹Nà ga Ɠɔoɠɔ GALAGI nɔnɔ›, é Izilayɛle laaseigi ʋɛɛ ɓɔɠɔ ʋa.» 
Ɠɔoɠɔ GALAGI, Fai-Pɛ-Maliɠii wooi ɠaa, Izilayɛle ná-masagi ta unmɔɔ nui: «Nà ga ma mɔungi ta ma ɠaaɓelagi, é ɠula nɔ̀un polu, gala kili ge la ná. 
Ɓɛ ɠa é ga kɛ̀ʋele? É ɠula lɛɛ, é ɓɔɛ! É gaalɛɛ ga ze ga pagɔ! Kaipa gè nuɓusɛi ɓɛtɛni ɠɔoɠɔ, faiti ti ziaa, é ti wo, ta ɓalaa niiti ti ʋaazu! 
Maaɠili mina ɠɛ wo ma, nà-nuɓusɛiti, à mina lua. Gè daazeelini wo ma, gè dɛɛni ga woye, kaite naa luɠɔ, wa ga nà-zeeleiti. Gala kili ka ná nɔ̀un polu? Ɓa, fasai taɠili ge la ná, gè la gila kpalaa ɠwɛɛ.» 
Kɔɔɠɔ gani kpɛtɛ nuiti ti la ga ani nɔpɛ, ti-yiima anii ʋagɔiti pɛ ta ga wafuun faa nɔ, ta ga zeelei ga ti la wozaɠaazu, ti faa nɔpɛ gaaɠaazu, ti unfe faa letele nɔ ʋe. 
Ɓɛ ɠa a ɗa galagi ɓɛtɛ, é kɔɔɠɔ ganigi ɠaawuun, é kpɛtɛ, nii é la faa nɔpɛ paa, naama lɔnɔgi ɠa ga leeni? 
Niiti pɛ ti ʋɔɔkpɔsu ti ʋa, ta unfe, nuiti nɔ ɠa ti ti ɓɛtɛzu. Ti pɛ ti maaɓɔ lɛɛ ba ti lo ná, ti pɛ ti zasu ɠa ɓali, ti unfe. 
Ɠain bo nui ɠa ɗa kɔlu ɓuɠai ta leʋega, é kpadi ga tiɠii, é kɔɔɠɔ ganigi ɓɛtɛ ga malitoi, é kɛ ga zuvikɛi pɛ. Kɛlɛ botii ɠa ɗa pului ʋili ma, toɠa na zɛbɛ la mɔ ba. Ni é la ziɛ ɓɔleni, toɠa na é ɓɔlɔa. 
Gulu zaɠa nui ɠa ɗa kɔɠɔgi wo ga galui, é yeeʋozɛ naati ba ga ani ɠolegi, é kpɛtɛ ga gulu ɓɛtɛ ɠɔlui, é yeeʋozɛ mɛtu. É kɛ ga nuɓusɛi ʋaaɠulabai, gaazuʋɛ ɠɛ ga nui ɠɛʋele, nii a yɛ pɛlɛ wu. 
A sɛdele gului leʋena, ɓaa é yiimazeɠe ga sipɛlɛ gului ɓaa sɛnegi, é zɛ ná, suzeeli dɔɓɔzu wuluiti saama, ɓaa é gului naa zeɠe, é ga pɛingi, nii é siinni tɔ ɓɔɠɔi, tonai ʋu ma, é ɓɛtɛ. 
Tama nuɓusɛi ɠa maavai ɠɛɛzu ga niima wuluiti, é ɗa gala, é ɗa ɠɔɔlɛ da, a abui ɠaazona, é laaɠoli ga. Naama wulu ɠilagi nɔ ɠa é kpɛtɛzu ga galagi ɓɔɠɔ ʋɛ, é ɗa nɔkɔ bu, é kɔɔɠɔ ganigi ɓɛtɛ, é ɗa nɔkɔ bu. 
É ná-gului ɠilazuʋɛ lɔ abui ɠa, é suai ɠili la, é mi, é yiɠo, é ɠɔɔlɛ, é ɠɛ ma: «Ga-o, gè ɠɔɔlɛga, nà abuzogi ɠaazu!» 
É gului mɔtai zeɠe, é kpɛtɛ ga galagi, naa ɠɛ ga kɔɔɠɔ ganigi, é ɗa unpilɛ bɛ, é nɔkɔ bu, é ɗa fali ga: «Ùnmɔɔ! Mazɔlɔɔ ɗa è ga nà-galagi!» 
Niima nuiti, ɠi ge la ti ma, ti la faa ɠaaɠaazu. Ti-ɠaazuʋɛti pɛɛʋɛ ma, ti la faa yɔɠɔzuɠaazu, ta-ɠisiɛiti suɓuɠaʋɛ, ti la faa ɠaaɠaa la. 
Ti tanɔpɛ ge la ɠidaazu faa wu, ɠi pagɔ la ta ma, ɓaa keleɠelegi, é ʋa ɠɛ ma: «Gè gului nii ɠilazuʋɛ ɠalaa, gè ɓului mɔ ma abulekai ɠa, gè suai mɔ ga ma abui, gè mi. Kɔɔɠɔ ganigi gè kpɛtɛzu ga mɔtai ɓaaɠulama vaa ɠana! Gulu ɓuɠai ɠa gè ʋaazu gè la, gè ɗa nɔkɔ bu!» 
Zuʋui ɠa é ga ti-ɠɔnɔgiti, ti-yii ʋiliga, é ti ɠaka. Ti la zooga ti-yɛnvui unmɔɔsu, tiya ɓɔɠɔi ma, ti la ɠɛ ɓɔɠɔ ma: «Nii gè makɛ ba, koleʋɛ zɛɛ ɠalagi ʋe.» 
«Izilayɛle, Zakɔɓe ná-nuɓusɛiti, ɠizɛ nii zu ga pagɔ: Ɗa ga nà-botiɠɛ nui, gè è ɓɛtɛni ga è ɠɛ ga botiɠɛ nui bɛ̀, Izilayɛle, gè la yeema è ma pɛ. 
Gè ɗa-lɔ koloɠologiti kpalega, ti ɲɛɛlɛ eɠɛ tonaɓiingi. Ɗa-ɠotoiti ti ɓalega eɠɛ ɓumugi. Ɠale ma, è ʋa pɔ̀, mazɔlɔɔ gè è unmɔɔga.» 
Geeɠɔlɔgiti à ɠoozunɛ, mazɔlɔɔ Maliɠii ɠa botii ɠɛɛzu, zooi ɓomaʋɛti, à vuka ga koozunɛɛi! Guluiti, dɔɓɔiti, gizeiti, à vuka ga koozunɛɛi! Mazɔlɔɔ Ɠɔoɠɔ GALAGI Zakɔɓe unmɔɔga, é ná-lɛbiyai ɠulaa kɛlɛma Izilayɛle. 
Ɠɔoɠɔ GALAGI wooi ɠaa, è Unmɔɔ Nui, é è ɓɛtɛni è-lee ɠoozu: «Ungo, nà, Ɠɔoɠɔ GALAGI, nà ɠa gè niima aniiti pɛ kpɛtɛni. Nà ɠila kpe ka gè geeɠɔlɔgi zuvieni, gè zooi zuvie, nu nɔpɛ ge la ɓɔni bà. 
Niizu gè ungaiziɛ nuiti ta-yɛɛ vaiti kɛa ga fuun, é lo ʋelela ʋele vaiti ba. Niiti ti ʋelela ʋele vaiti bosu, gè ti ʋalaga ta-vaaɠaaɠaiti ma. Gè ɠima nuiti kulaa ʋoluzu, gè dɛɛ ga tiye, ʋelei ta-vaaɠaaɠai ga ɠimalalai la. 
Kɛlɛ nà naa ɠɛ, nii nà-botiɠɛ nui é boni. Nii nà-keelaiti ti boni, nà naama vaazeikpasui pɛ pilɛ su. Gè boga Zeluzalɛme ná-faa zu ga: ‹Sulaa ɠa ve ʋolu, ʋɛ pɛ naa ɠoloɠologai, náti ta ɓɛtɛ ʋolu.› Gè boga Zuda laa wolaiti faa zu ga: ‹Ti pɛ ta losu ʋolu.› 
Gè ɠɛ kpoloɗɛiti ma: ‹À vɔ su, nà ga wa-ɗɛiti fɔ su!› 
Nà bosu Siluse ná-faa zu ga: ‹Nà-togani makɛ nui ʋe, toɠa ziɛ ga zìima vai pɛ. Toɠa deveiti fe, tama Zeluzalɛme ɠa lo ʋolu, GALA sei ʋɛlɛi lo ʋolu.› » 
